१ कोरिन्थी 5 - थुलुङ राईमण्डलीडाम नाम्सु़रु़ 1 गानीगोडाम कोङनिमका नाम्सु़रु़ बेन्निम बु ए र्वाक्पा ल्वा गो थो़उतोम बु, मा गानीगोडाम कोलेका उमा रेन्दु़मो माम ङा जु़ल्लु़म बु ए। आरेप्माम नाम्सु़रु़ ने वाङसामामिमगोडा वो मेदु़म। 2 लावो गानी ने इनी त्वापङा डोक्पु लिन्सिनी! गानी ने इनी न नो़मु मेबासावा रे, मेम्मा आरेप्माम खारी बेपा मु़चु़लाई इनी सामा-घ्रो़म्सीलामका ख्लुमु मेबासावा? 3 आमा मिरो़म गानीनुङ मिबु लोवो आमा न ने गानीनुङङा बु। गो गानीनुङङा बुङुमिम होम्साकाङा आरेप्माम घ्रामलु़पा खारी बेपाकु निया बोमु दु़म्तोम बु। 4 गानी इकी ङाचो़ येशूकु नङडा खोम्सिनिलो आमा न नुङ ङाचो़कु यु़म गानीगोडा दु़म्लो, 5 मेराम मु़चु़लाई शैतानकु ल्वाड्डा ग्वाक्नी। मेम्मा मेरामकु छु़ल बेपा मिरो़म ने पुयु़लुनु़ मा ङाचो़का निया बोमिमिमनेम उमा पेल सेल्सिनु़। 6 गानी डोक्पु लिन्सिनिमिम ने जो़पा मेएँ। कतिकलङ लङखामका ङोल्मा फुला खोत्लेङा लङखामनुङमा दु़म्बेडु़ र्वाक्पा हाम गानी मेचनी? 7 ओ ङादोम छु़लकु लङखाम गानी पार्नी, मेम्साका गानी लङखाम मान्थिम जो़पा लाले फुला होङ्ङा सेपा दु़म्नी, आच्छाङा गानी मेप्माम ङा बुनी। हेङालोने ख्रीष्ट ने गुइलाई सेल्मु लागि सासेन्सिम्डिम बु, गुमीङा इकीमा सेल्सिमुनेम चाडकाम भेन्दाचो़ सो़। 8 मेम्मिमका गुइ ङादोम मेजो़पा खारी नुङ छु़लनुङङा ङादोम लङखामकु सो़बेम पेसाका मेएँ, लावो लङखाम मेङोल्मा थो़रलु़इमिम नुङ आच्छाङाकाम सो़बेम पेसाका चाड मानेबिइ। 9 नाम्सु़रु़ बेपामिमनुङ कोदेप मेबानी र्वाक्साका गो गानीलाई आमा सेलाखाजेमडा र्याक्तोम बाइडा। 10 मेराम र्वाक्मा ओराम सु़म्दिसेरडाम नाम्सु़रु़ बेपामिम, रारी बेपामिम, मु़चु़लाई रोट्पामिम, ङाटा सेव साट्पामिमनुङ कोदेप मेबानी र्वाङ्डोम मेएँ। मेम माला ने गानी सु़म्दिसेरलाम पाखा लुमु बासावा। 11 लावो उहेमका उ त्वाप ख्रीष्टडा थो़रलु़पा र्वा मा वो नाम्सु़रु़ बु़, रारी बु़, ङाटा सेव साडु़, वाङमिमलाई डक्साका जे, छो़म डु़सेवा बु मा वाङमिमलाई रोडु़मी, मेप्माम मु़चु़नुङ कोदेप मेबानी र्वाक्साका र्याक्तोम बाइडा। पोमु-डुमुङा वो मेप्माम मु़चु़नुङ मेपेनी। 12 मण्डलीडाम्मा पाखाडाम मु़चु़मिमकु निया बोमु आमा खारी मेएँ। लावो मण्डलीगोडाम मु़चु़मिमकु निया बोमु इनीमा खारी मेएँ मा? 13 मण्डलीडाम वाङमी मु़चु़मिमकु निया माम्चु़नीका बोमी। माम्चु़नीकु सिजेमका र्वा, “गानीगोलामका रु़चो़ मु़चु़लाई ख्लुन्सोट्नी।” |
© Wycliffe Bible Translators, Inc. All rights reserved.
Wycliffe Bible Translators, Inc.