१ कोरिन्थी 16 - थुलुङ राईमाम्चु़नीकु मु़चु़मिमलाई ख्लो़मु ग्वा-ग्वा 1 यरूशलेमडा बाट्पा माम्चु़नीकु मु़चु़मिमकाम लागि ग्वा-ग्वा फमुकु दुथाम गलातियाडाम मण्डलीमिमलाई गो बेबेत्तोमिम होम्साकाङा गानी बेनी। 2 खोत्ले हप्ताकु ङादोमनेम गानी खोत्लेका त्वा-त्वाहोम खउलुङ डु़प्निमकु किचो़ खउलुङ फ्वाक्निमा जु़ल्तोङा बेनी, मेम्साका गो रोङुलो ग्वा-ग्वा फबेन्मु मेबासिनु़। 3 मेम्मा गो रोङुमा छेम-ल्वाकु सेलाखाजेम र्याक्साका गानी र्वानिमिम मु़चु़मिमलाई ग्वा-ग्वा सोप्डा यरूशलेम थु़रुमी। 4 गो वो लमु जो़पा दु़म माला गोनुङ मेर्मिम लमी। पावलका र्वाक्ताम उ त्वापगोडाम ल्वामिम 5 गो माकेडोनिया दु़म्साका लङुमिम चङडा इनीमाडा रोङु, हेङोलोने गो माकेडोनिया दु़म्तोङा लमु बासी। 6 गो गानीनुङ कोलेम-नलेम बुङु डे, जुथारीका वो मेसिन्डाङा बुङु। मेम्मा गो बान्ते लङु लोवो गानी गोलाई लाम्दीकाम लागि ख्लो़मु चाम्ङिनी। 7 ओराम थारीका गानीनुङ घरिकोङ कोङङा घ्रो़म्साका लमु आमा न मिबु। ङाचो़कु न होङङा दु़स्ता माला इनीमाडा रोमुमा किचो़ हापाङा बुमु न बेउतोम बु। 8 पेन्तिकोसकु चाडसम्म गो आसि एफिससडाङा बुङु, 9 आमा कोर्थो़लाम बक्पा मु़चु़ हापाङा बुमी लोवो आसिन्डा ङाचो़कु डोक्पु खारी बोमु लागि जो़पा थारी ल्वाउतोम बु। 10 तिमोथी इनीमाडा रोलो मिम्ताम-सो़र्ताम मेबेसाका गानीनुङ बुमु ग्वाक्नी। हेङालोने गुका वो गो होम्साकाङा ङाचो़कु खारी बेत्तोङा लेडु़। 11 मेम्मिमका सु़का वो गुलाई छेम छेम मेदु़मिनु़, मा गु आमाडा ख्लोसिमा रोलो उमा लाम्दीडा न भ्रसिबेट्निमा थु़र्नी। वाङमिम थो़रलु़पामिम वो गुनुङ रोमी र्वाक्साका गो लथाक्पु। 12 ल्वाक अपोल्लोसकु दुथाम ने गो र्वाङु, वाङमिम वा-ल्वाकमिमनुङ कोयो इनीमाडा लक्नी र्वाक्साका गुलाई छो़म र्वाङ्डोम बाइडा। गु ओम्लो इनीमाडा रोमु नङा मेबु़वा, लावो उमा लागि जो़पा थारी दु़म्लो इनीमाडा रो। 13 चङचङया बानी, छो़म थो़रनुङमा दु़म्नी, डोक्पु थो़म्बोकनुङमा दु़म्नी मा छो़म सोनुङमा दु़म्नी। 14 गानी हाम बोनी रिखामनुङमा दु़म्निमा बेबेनी। 15 वा-ल्वाकनी, गानी ओराम ल्वा चनी, स्तिफनासकु नेमडाममिम अखैयाडा खोत्लेडाम ङादो थो़रलु़पा मु़चु़मिम सो़। मेर्मिमका माम्चु़नीकु मु़चु़मिमकाम चापे-डुपे बोमुडा खोत्ले उनी न-गोङा ग्वाम्डिम बु। गो गानीलाई छो़म र्वाङु, 16 गानी मेर्मिम मु़चु़मिमकु ल्वाड्डा बानी। मेर्मिम नुङ मेम्माम ङा ब्राम्दु़ल्वा बेपा वाङमिम मु़चु़मिमकु ल्वाडा वो बानी। 17 स्तिफनस, फोर्टुनाटस नुङ अखाइकस आसिन्डा रोम्डिमडाम गो गेर्सिक्पा बुङु। हेङालोने गानी मेबानिवालो मेर्मिम रोम्डिमका गानी ङा आसिन्डा बान्निम होङङा लु़ङ्डो। 18 मेर्मिमका इनीमा न-गो भ्रसिबेट्मिडिम होङङा आमा वो न-गो भ्रसिबेट्मिडी। गानी आरेप्माम मु़चु़मिमलाई डोक्पु मिम्मु बासी। पावलकाम चक्थो़म सेव 19 एशिया क्षेत्रडाम मण्डलीमिमका गानीलाई सेव र्वाम्डिम बु। अकिलास नुङ प्रिस्किलाका मा उची नेमडा खोम्सिक्पा मण्डलीका वो ङाचो़कु नङडा गानीलाई उनी न-गोलामका ङा सेव र्वाम्डिम बु। 20 खोत्ले थो़रलु़पा वा-ल्वाकमिमका गानीलाई सेव र्वाम्डिम बु। थो़रलु़पा दु़म्सीकु रिखामका गानी सेव साबेनी। 21 गो पावल, आ त्वाकु ल्वाकाङा ओराम सेव र्याक्तोङा लेट्पु। 22 कोङनिमका ङाचो़लाई रिखाम मेबु़ माला मेरामडला वाइतो रोनु़। आकीमा ङाचो़, योक्नी! 23 ङाचो़ येशूकु दिदाम गानीनुङ दु़म्नु़! 24 ख्रीष्ट येशूडा आमा रिखाम गानी खोत्लेनुङ दु़म्नु़। आमेन। |
© Wycliffe Bible Translators, Inc. All rights reserved.
Wycliffe Bible Translators, Inc.