Sofonías 3 - Toba del Oeste

Qoye'uaĝa'n qomle jogaa'me uetedaue di'me Jerusalén

¹ ¡Degueja qomle da'me lachoĝode'j jogaa'me uetedaue di'me noic Jerusalén, noic jo'ne nechiyoĝojoĝola't, jo'ne yataqata paĝachigui nataq'aen etapega qaleuaĝaic!

² Yataqata ja domachita da'me 'laqatac ñe'me Jaliaĝanec; nataq'aen ja yoqochideta joñe'me. Ja p'iida'a joñe'me Jaliaĝanec mach'e Nedios, uotaĝa ta'le nachoĝodetot joñe'me.

³ Gaa'me lejaliaĝanaqa ena'ama gaa'me jauaĝayaqa nale de'uoya'ape; gaa'me c'atenaĝanaĝayaqa ena'ama jogaa'me yaliaĝadi nale quetedalegue ga'me 'nonaĝa; nale deque'y qama'le yataqata qaya'te lapat uotaĝa p'inec ta'le ueta'añdi.

⁴ Jogaa'me te'me 'laqatanaĝanaĝanaqa yataqata 'yoĝodenaĝayaqa nataq'aen qovinaĝanaĝayaqa. Nataq'aen jogaa'me tamenaĝaiqui lo'ol, jo'ne tadoue nale ñe'me Dios 'lemec qama'le e'n ja ja 'nalegue joga'me niyamaqatac, nataq'aen netauoĝodelegue da'me lamajoĝonaĝac joñe'me Jaliaĝanec.

⁵ Qalaĝaja joñe'me Jaliaĝanec quetalegue jena'me jenjo' noic; da'me 'lonataĝanaĝac nach'eda da'me chimaqachiñe, ja ja no'en joñe'me. Nale nete' ja qaya, qama'le eja ya'uo lec'atenaĝanaĝac nale. Qalaĝaja jogaa'me ja 'noe'n qamqa'me ja yaĝadiñe da'me 'letaĝaloĝo'j, qa'a yataqata qaya'te lepocoĝo'j.

⁶ 'Laqatac joñe'me Jaliaĝanec: «Joote japalaĝa't ca'li gaa'me noyaqa laqaya', jen ca'li qa' lojoche jogaa'me te'me lequepaĝanaqa'te; male totelo'te naa'me nadico, qa'a qaya'te jiyaĝadipi ta'le ta'yalo jodia'me noyaqa. Qama'le naa'me 'nachaqa'te, ¡yataqata qaya'te ta'le onolec da'me nec'aletaye!

⁷ Qama'le ja'uo ca'li da'me yelnataĝac: “Ja'uo jenjo' qaedi jena'me noic Jerusalén male jayem yoqo'cha qomle, uotaĝa qom ja'uo ga'me 'yaqatac qama'le yataqata jayem naquiaĝana, qaedi nach'e eta't qouenata yema da'me jaqatelegue ca'li.” Qalaĝaja yataqata let'adaic joga'me nechiyoĝojoĝo'j; yema da'me ja no'en yauote.

⁸ Chane'eja nayi, cha'li jayem auajoi'ta da'me joñejeguem qomle qama'le yitaĝa ja'uo ga'me 'yaqatac, qaedi ami ja'aĝatema da'me 'uo joga'me je'eteque gaa'me noyaqa. Nach'ena jenjo' ñenaĝategue, mach'e jayem jo'ne Jaliaĝanec: male jen dajoya't yemeda gaa'me 'nachaqa'te, nataq'aen jiyaĝanalo jogaa'me lejaliaĝanaqa jogaa'me, qaedi male jecodelo'te jogaa'me da'me yalemataic, nataq'aen joda'me yec'atenaĝanaĝac jo'ne ja 'nalegue. Qa'a jena'me yalemataic ena'am ga'me dole' t'adaic, qama'le japalaĝat jo' qomle yema da'me 'nachaqayaĝac.

Qonec'alaĝatedegue qomle jogaa'me p'iida'a joñe'me Jaliaĝanec

⁹ »Qom yovita jenjo', male jen onaĝaic da'me 'loyaĝa'j gaa'me noyaqa, qaedi male yema jayem qo'nonaĝachigui, nataq'aen male yema uaqatapega't da'me jayem t'onataĝadeuo'o.

¹⁰ Jena'me yalaqapi male jayem nec'adeta, chiyoĝotegue di'me lajego di'me ñache jo'ne ua'ague di'me Etiopía, qaedi yataqata jayem qo'nonaĝachigui; male jayem qoneda'a jo' qomle joga'me lajaqaje'.

¹¹ Chane'eja, ami yalaqapi, qom yovita ga'me nolo', qama'le yataqata ja adepocoqoilegue yema ga'me auauoyi ca'li te'me jayem anaucheñiya, qa'a ami jachiyoĝotauelo qomle jogaa'me 'yoĝodenaĝayaqa jo'ne ch'e ni'yoĝodela'ajalo. Qama'le ja yitaĝa ta'le ami 'yoĝodenaĝayaqa qom anec'achiije'ma jena'me 'yachaqa' jo'ne ja 'nalegue.

¹² Da'me ami jo'ne ami choĝodayaqa nataq'aen ami joĝodayaqa, male ami ñec'alaĝatedegue jo' qomle, qaedi yataqata jayem auapiyeñiyot.

¹³ Jogaa'me Israel laje' jo'ne qonec'alaĝatedegue qomle male ja yitaĝa yauote da'me ja no'en, male ja doqovinaĝa'n, nataq'aen ja dajotedaqueda nale doje'tape. Male yataqata machidiñe nale deque'tape, uotaĝa nale 'nomatedegue jogaa'me yataqata qaya'te t'oitedaque.»

Nalac jo'ne lamaic di'me Jerusalén

¹⁴ ¡A'uonaĝan nayi, am noic jo'ne Sión laje'pi! ¡A'uonaĝañi nayi, qa'a ami made'tape, ami Israel lec'oqo'tepi! ¡Ami made'tape, ami Jerusalén laje'pi! ¡Yataqata let'adaic da'me adamaiqui jo'ne auachiyoĝochiyauelo naa'me adai'lidi'!

¹⁵ Joñe'me Jaliaĝanec male yaĝañi da'me ya'uo adachoĝodequi qama'le ami de'uolo'te, qa'a male yamaĝadegue jogaa'me adaute'udi'. Joñe'me Jaliaĝanec mach'e nejaliaĝatelegue di'me Israel, qama'le yataqata ami uetauelo nayi: male yataqata qaya'te at'oiitaque.

¹⁶ Qom yovideta naa'me naajo' uo'oe, male qot'aqataĝanem di'me Jerusalén: «¡Ena'te at'oitac nayi, am noic jo'ne ona'ña di'me Sión, nataq'aen ena'te auaje'tema naa'me adoua' ta'le qaya'te 'lañaĝa'j!»

¹⁷ Joñe'me Jaliaĝanec mach'e Anedios male yataqata am ue'tajop: ¡yataqata p'ajaye joñe'me, qama'le am nec'alaĝategue qomle! Joñe'me Jaliaĝanec yataqata matac que am, da'me loqopich'i joñe'me am yadalaĝat qomle; yataqata let'adaic da'me lamaic joñe'me, qama'le t'onaĝan qomle,

¹⁸ ena'am ga'me nolo' nale qoya'uo neualayaĝaiqui. Joñe'me Jaliaĝanec yitaĝa ya'uo da'me 'laqatac, enaac: «Male jen anec'alegue, qa'a jen oca'e qomle da'me ja no'en jo'ne te'me am qoyamaĝaguet ca'li; am joĝotaĝanec qomle da'me adepocoĝoc jo'ne te'me am yep'aĝañe ca'li.

Ga'me nolo' qom yitaĝa yema nec'alegue

¹⁹ Qom yovita ga'me nolo' male ja'uo lachoĝode'j yemeda jogaa'me te'me ami nautenalo. Yecochiyalo qomle jogaa'me jo'ne ena'ama gaa'me 'nanaĝatel nale te'me ja qode'uolo'te, nataq'aen ñedodeuo qomle jogaa'me te'me yejoma'ape. Mane'e ca'li yataqata qoye'ue'tape jogaa'me, qalaĝaja nayi male ja'uo qomle da'me 'lonaĝa'j jogaa'me nataq'aen da'me li'yoĝodi'j, ¡qaedi yataqata qo'nonaĝachidegui yema jena'me aleua!

²⁰ Qom yovita ga'me nolo', male ami ñeda'alo jena'me 'yachaqa', male ami japetena't; male jen dalaĝaic da'me anejiyaĝauayaĝaqui, qama'le ja'uo da'me at'onaĝaqui nataq'aen da'me ani'yoĝodenaĝaqui da'me ami, qaedi yemeda naa'me noyaqa jena'me aleua male ami 'nonaĝachedigui qomle. Mach'e jayem Jaliaĝanec jo'ne ja 'nalegue: naq'aeta da'me 'yaqatac.»