Oseas 8 - Toba del Oeste

Qoya'uo lachoĝodec di'me Israel qa'a yajouaĝa't gaa'me p'iyapegalo

¹ Yitaĝa enaac joñe'me Jaliaĝanec: «Auajediye jana'me adajeede, qa'a yovita qomle ñe'me dalataĝanac, ena'am ga'me uole, qaedi yala't jogaa'me yalaqa. Ya'uo jenjo' yajouaĝat da'me ja 'yamaqate'n da'me 'ñaĝataĝac, qama'le ja 'yamaqate'n jogaa'me 'yaqataĝanaĝaco.

² Jayem nec'adeta nale qama'le 'yalaqa'tape, etapega't: “Am Qanedios, yataqachiñe am jatetonaq, da'me qo'mi Israel lec'oqo'tepi.”

³ Qalaĝaja jena'me jenjo' Israel laje'pi ja yacoteguet da'me 'noota ladic; qo'oche' male yecaa'tape naa'me laute'upi.

⁴ »Yauote ca'li joga'me lejaliaĝane'j, qalaĝaja ja jayem 'te yenadetec ga'me mach'e yiquiyac; nataq'aen ca'li yauote gaa'me lajoĝola'te, qama'le ja jayem 'te yanomaĝanaĝa'n. Nataq'aen yacota jaga'me plata nataq'aen jaga'me oro qaedi yauote joga'me netametot nale, qalaĝaja chiyaqayi da'me dojo' male qoyolaĝachigui qomle da'me nejiyaĝauayaĝa'j.

⁵ Yataqachiñe ami jalematayalo, ami Samaria laje'pi, yajouaĝat na'me uaca lequi'i jo'ne a'vichi ca'li qaedi qonetametapecot nale. ¿Jach'e joga ga'me ua'a da'me aĝañiñi?

⁶ Ami Israel lec'oqo'tepi, ¡dijo' uaca le'em ja naqaedi ta'le Dios! Qa'a ch'e jiyaĝaua 'lonatac, qama'le 'uo joga'me ua'a qomle yitaĝa qoyolaĝat.

⁷ »Naa'me naajo' 'uo da'me lanaĝanaĝa'j ca'li: ena'am ta'le yaadiñe ca'li joga'me layat, qama'le ¡naqachidiñe qomle jaga'me qada'che lat'edae! Qa'a joga'me lanaĝanaqa't qaya'te 'uo joga'me chiyaqayi, nataq'aen joga'me nanec, qaya'te 'uo joga'me harina ta'le chiyaqayi. Chayovida'a qom 'uo joga'me te'me chiyaqayi, qama'le gaa'me jiyaĝa'u jo'ne ja 'lachaqa'tena, naqaegaua yali'j qomle.

⁸ ¡Israel ena'am ta'le 'uo joga'me yeuoĝonañe! Qama'le yema ga'me aleua laje'pi yauata qomle jena'me Israel da'me ena'am ga'me naco'na jo'ne dolayi, qa'a yataqachiñe qaya'te lajo'viyaĝac.

⁹ Qa'a ena'am joga'me ajena jo'ne viaĝajec jo'ne yataqachiñe yejomac, da'me dajotegue ca'li di'me aleua jo'ne Asiria qaedi qoyichoĝode'n, qama'le uo'oe gaa'me yeyala'aque qaedi qolecochiyalo.

¹⁰ Qalaĝaja mate mane'e yauote neme' gaa'me noyaqa, da'me jayem male jemata'a't jogaa'me, qaedi 'uo qomle ga'me lachoĝode'j let'adaic, yajouaĝat ga'me qaleuaĝaic jo'ne nejaliaĝatelo'te.

¹¹ »Qa'a joñe'me Efraín jalcote gaa'me 'lonataqa jo'ne c'atonaĝala'te, qalaĝaja nach'edata da'me chiyaqayi da'me jalcote da'me ja no'en jo'ne qoya'uo.

¹² Mate mane'e jalcote gaa'me yedii's jo'ne yapaĝaguenataĝanaĝaco da'me janema ca'li jogaa'me yalaqapi, qalaĝaja naa'me naajo' ja 'yamaqate'n da'me 'yaqatac: ena'am ta'le e'n ja tachiguilo jonaa'me.

¹³ Yataqachiñe noqopideta da'me yeguedoue ga'me lajaqaje'j, qama'le yali'j ga'me lapat joga'me qoyen lajaqaje'j. Qalaĝaja da'me jayem jo'ne Jaliaĝanec ja jetaque jaconegueta gaa'me lajaqaje'j, dite da'me male ñetouetaque daa'me 'lonataqa jo'ne ja 'noe'n, qama'le je'uaĝa'n qomle jogaa'me: ¡male yitaĝa qoyauegalo qomle di'me Egipto!

¹⁴ »Naa'me Israel laje'pi yauote ca'li gaa'me nejaliaĝaiqui', qalaĝaja yataqachiñe jayem yapalaĝateteda'a, da'me jayem jo'ne 'netoqo't. Naa'me Judá laje'pi yauo'oe ca'li gaa'me noyaqa jo'ne 'uañaĝayaqa, qalaĝaja jen qoyaviyaĝa't qomle gaa'me, chayovida'alo gaa'me nejaliaĝaiqui' yataqachiñe yavi'j qomle.»