Oseas 10 - Toba del Oeste

Qoyapalaĝa't jo' qomle gaa'me c'atonaĝala'te joga'me Israel

¹ Gaa'me Israel laje'pi eda'am ca'li joga'me uva lichidic jo'ne yataqachiñe jalcote da'me lejalayaĝac. Qalaĝaja ca'li nichiquetaye da'me leuoyaĝa'j, male ja jayem 'te yane'm da'me lamai'j, dite da'me jalcote jogaa'me c'atonaĝala'te laqaya' jo'ne qoyauo'oe ca'li. Nataq'aen ca'li jalcote da'me laqataĝanaĝa'j jo'ne yachiyoĝoteda'ña jena'me 'naleua', qama'le yataqachiñe onaĝayaqa jogaa'me qadi jo'ne yauote qaedi qonetametapecoto.

² Israel yataqachiñe ja yataĝalegue da'me 'loyaĝac, qama'le nayi male qoya'uo lachoĝodec, yajouaĝa't daa'me loeco. Qa'a joñe'me Jaliaĝanec yapalaĝa't qomle gaa'me lec'atonaĝala'te, nataq'aen e'n 'naqadañe jogaa'me qadi jo'ne qop'iya'alo.

³ Qama'le nayi naa'me naajo' jiyaĝadipi male enapega't: «Male qaya'te 'uo ga'me qadajoĝola', qa'a yataqachiñe ja jeuaqate'ca ca'li joñe'me Jaliaĝanec. Qalaĝaja, qom te'me 'uo ga'me qadajoĝola', ¿jach'e jogamaĝa yaqanatet ta'le qo'mi yichoĝode'n?»

⁴ Yejamaq da'me doje'tape, qalaĝaja daa'me 'laqataĝanaĝaco ja yataĝalo'te nataq'aen qaya'te chiyaqayi ga'me nededelegue. Chane'eja 'uo qomle ga'me nejetenague'j jo'ne ja no'en, ena'am jaga'me chimaĝadae jo'ne nolelijeguem da'me uetauelo gaa'me lanaqa jo'ne onaĝayaqa.

⁵ Jogaa'me Samaria laje'pi yataqachiñe deda'y nataq'aen noye'tape, yajouaĝat da'me male qoyajaĝañe ga'me uaca lequi'i jo'ne qonetametapecot nale di'me noic Bet-avén. Nach'e ena'ama gaa'me tamenaĝaiqui lo'olpi jo'ne neteleta nale yataqachiñe noyetedapelegue, qa'a joda'me 'lonaĝac male qaya.

⁶ Nach'ejo jo'me nequi'i male qoyeda'a qomle jodi'me Asiria, qaedi qoyen najaqajec jo'ne qoyanem joñe'me nejaliaĝanec jo'ne p'ajaye. Chane'eja gaa'me Israel laje'pi yataqachiñe 'uo qomle ga'me lepocoĝo'j, qa'a nepocoĝodelegue ga'me te'me p'iida'a.

⁷ Qalaĝaja joñe'me lejaliaĝanec di'me Samaria ena'am ta'le qoyayoĝon qomle, ena'am ga'me netauoĝojet epaq lae jo'ne yayoĝon ga'me ñache let'adaic.

⁸ Yataqachiñe qoyolaĝa't qomle gaa'me tamenaqa'te jo'ne uetalo'te gaa'me qajoĝona'a, qa'a jenjo' Israel laje'pi ueteda'a nale qaedi yauote loe'j. Chane'eja gaa'me c'atonaĝala'te nadije'ma qomle gaa'me laĝadiijat nataq'aen jaga'me yaĝat. Qama'le jogaa'me jiyaĝadipi enapegalo qomle gaa'me qajoĝona'a: «¡'Noota qom male qo'mi auoĝochidiñe!» Nach'e ena'am enapegalo qomle gaa'me comada'a: «¡'Noota qom a'naqaiñe, qo'mi ayilo'te qomle!»

'Lataĝac joñe'me Jaliaĝanec jo'ne yanema gaa'me Israel lec'oqo'tepi

⁹ Nenaĝategue ca'li ñe'me Jaliaĝanec jenjo': «Ami Israel lec'oqo'tepi, yataqachiñe ja aĝañiñi da'me adoequi, chiyoqo'teguet ca'li ovi'ta di'me Guibeá chayovida'a nayi. Chane'eja chiyoqochi'ña qomle di'me dijo' Guibeá, male ami novitalo joga'me nalada't.

¹⁰ Qama'le ja'uo qomle adachoĝodequi, qa'a naq'aeta da'me yelnataĝac. Jena'me jenjo' yataqachiñe qoyemalegue qomle naa'me ale'u lael, qa'a naq'aeta da'me ami janema da'me yec'atenaĝanaĝac, yajouaĝat da'me adoequi jo'ne yataqachiñe let'adaic.

¹¹ Jaa'me noloqo'ote jo'ne 'uaechidiñe, Efraín ena'am jaga'me uaca nale yataqata 'noyaĝanataje, jo'ne noqopita da'me pelegue ga'me auaqapi jala. Qalaĝaja nayi male ja'uo loqolac, naayi jenjo' onaĝaic loqojot, qaedi male nauela't jaga'me cadeeta. Nataq'aen di'me Judá yauec qomle jañe'me jegaĝanaqate, qama'le joñe'me Jacob yauec qomle jañe'me nepolgaĝanaqate.

¹² Ja'aĝatem ca'li jenjo': 'Noota qomle aueñi joda'me 'noota ladic, qama'le eja 'uo qomle adaqataĝanaĝaqui jo'ne nichoĝodenataĝanaĝac. Yataqata a'vichi jena'me aleua, qaedi yitaĝa 'uo qomle adaniqui dalaĝaic, qa'a joote yovita da'me laloqo' da'me jayem qoyelaque, mach'e jayem Jaliaĝanec, chayovida'a qom yitaĝa 'ñiyelaq qama'le yi'yac uotep jo'ne chiyaqayi nec'alaĝa jo'ne ami uauelo.

¹³ Qalaĝaja da'me ami maq jena'me ne'uenaĝanaĝac auaañiñe ca'li, qama'le 'uo nayi naqataĝanaĝac joda'me ja no'en jo'ne ami qo'yeteque qomle, nataq'aen 'uo joda'me noqovinaĝanaĝac jo'ne ena'am ta'le aualiqui. Yajouaĝat da'me yataqata a'uamaqachiñe ca'li joga'me cadeeta nalada't lo'o, jo'ne jalcote jogaa'me lataĝanaĝayaqa,

¹⁴ qama'le 'uo qomle da'me lajamaĝac da'me deloiquitapega't joga'me jiyaĝadipi, qama'le yema gaa'me adequepaĝanaqa'te male qonolaĝachidiñe qomle, ena'am ca'li ñe'me jaliaĝanec Salmán en yavic di'me noic Bet-arbel, jo'me nolo' ca'li 'uo jo'me nalada't, ca'li yataqata qopiyilo gaa'me nat'el capegue'to jogaa'me c'oqo'te ca'li.

¹⁵ Jenjo' qomle naq'aeta ga'me ami uauelo, ami jo'ne oñita'ña jenjo' Betel, qa'a jalcote da'me adoecodi'. ¡Joñe'me jaliaĝanec jenjo' Israel yeleu qomle novitequena ga'me nolo' dalaĝaic!