Nehemías 6 - Toba del Oeste

Gaa'me laute'u ñe'me Nehemías jetaque 'yedetec ga'me ja no'en

¹ Qama'le joñe'me Sambalat, joñe'me Tobías nataq'aen ñe'me Guésem jo'ne Arabia le'ec, choqogaa'me qadaute'u laqaya', nomeda'a ca'li da'me male jomataq da'me jadalaĝataq jena'me nequepaĝanaĝat jena'me noic, qalaĝaja maliaĝa ja qoyanayelo jogaa'me najo'mi.

² Chane'eja jayem 'nelopaĝata joñe'me Sambalat nataq'aen ñe'me Guésem jo'ne eetac: «Jetaque am qauajoya'aguet qomle, jenjo' c'ama'ague Onó.» Qalaĝaja joote jetaden da'me 'uo joga'me ja no'en jo'ne jetaque jayem 'yedetec.

³ Chane'eja je'elopeque da'me 'yaqatac ñaa'me yamaĝa's da'me jeetac: «Ja jaqanatet ta'le ami jec'atalo, qa'a jema'alo jogaa'me 'nonataqa jo'ne yataqata qayoĝode'. Ta'le ami jajoyilo, qama'le ja joma't naa'me naajo' 'nonataqa.»

⁴ Qama'le cuatro da'me 'viyelaĝadelegue da'me jayem yiyaĝata, qalaĝaja nach'e eta't jamaĝalo da'me dojo' 'yataĝac jo'ne jeetac: «Ja jaqanatet ta'le ami jajoyilo».

⁵ Yem da'me dojo' qama'le Sambalat yitaĝa cinco da'me 'viyelaĝadelegue da'me jayem yiyaĝana, da'me male jayem namaĝa joga'me lamaĝajec jo'ne lajoqot'a jaga'me lediije jo'ne 'nouateta'ñeguet.

⁶ Janjo' lediije ñe'me Sambalat eetac: «Am qo'naĝatetapiye jena'me jenjo' noic jo'ne jonaqata'ña, nataq'aen ñe'me Guésem joote qo'mi 'yaĝatema, da'me am choqogaa'me judiopi 'uo da'me adelnataĝaqui jo'ne jetaque anaucheñiya ñe'me Artajerjes, da'me tadenochaĝa a'noĝoñijeguem joga'me nequepaĝanaĝat di'me Jerusalén. Qama'le jenjo' nepi'ic qa'a da'me am jetaque aua'uo mach'e anachiyoĝotela't queda'me jetaque am jaliaĝanec.

⁷ Qo'oche' aviyaĝanalo jogaa'me Dios 'laqatanaĝanaĝanaqa qaedi am qo'yalegue da'me ua'a di'me Jerusalén, qaedi qo'eetac da'me yitaĝa 'uo joga'me jaliaĝanec ue'ta jena'me jenjo' aleua jo'ne Judá. At'oiya'aguet da'me dojo', qa'a jenjo' yovita qomle joga'me lequetela lac joñe'me jaliaĝanec Artajerjes. Chane'eja da'me am 'noota qom qo'mi anec'atalo nayi qaedi jojaqatapega't.»

⁸ Qama'le ja'ateguet: «Jenjo' jo'ne a'uaĝatetac qa'a ja eja. Mach'e am jo'ne qovinaĝanaĝaic.»

⁹ Qa'a jogaa'me mach'e qadaute'u jetaque qo'mi yoqolanaqate't qaedi qanejaliñe, qama'le ja jomataq jenjo' qat'onatac jo'ne jadalaĝataq ga'me nequepaĝanaĝat di'me Jerusalén. Qalaĝaja da'me jayem ma'ejama'le 'ñañaĝat.

¹⁰ Qama'le paja'a jajoyi di'me 'lachaqa' ñe'me Semaías, mach'e lec'oĝot ñe'me Delaías nataq'aen laual di'me Mehetabel, jo'ne napadela't joga'me 'lemec, qama'le jayem dojapegue', enaac: «Jajoĝogue di'me netamenaĝaiqui joñe'me Dios, qama'le japadenaĝayilo gaa'me jo'mi qaedi qaya'te yaqanatet ta'le taue, qa'a qom pi'yaq male na'j gaa'me adaute'u da'me jetaque am yala't.»

¹¹ Qalaĝaja ja'ateguet ca'li: «Ena'te auetapega ta'le jayem qolanaqaic. Gaa'me jiyaĝa'u jo'ne yelodelegue ga'me noic, ja 'noota ta'le yec'adeta ga'me tamenaĝaiqui da'me nañoĝochidiñe qaedi ja yele'u. Chane'eja da'me jayem ja ja'uo da'me dojo' jo'ne auenaac.»

¹² Qa'a janoma'a da'me ja chiyaqayi ñe'me Dios da'me dojo' 'naqatac jo'ne jayem yanem ñe'me Semaías, dite da'me eetac da'me lojaĝac qa'a ñe'me Tobías nataq'aen ñe'me Sambalat yejete'n ñe'me.

¹³ Eetac da'me dojo' qa'a jogaa'me jetaque jayem yoqochoqote't, qaedi ja'uo joga'me yoec, qama'le naq'aeta da'me yauata jo' ga'me ladi'j qaedi jayem qodachinataĝalegue.

¹⁴ Male ñetamen: «Am Ñedios, anetouetac qomle jena'me jenjo' jo'ne yauote joñe'me Tobías nataq'aen ñe'me Sambalat, jo'ne jetaque jayem nauteta. Nataq'aen 'noota qom ja auapalaĝate'ta jañe'me 'naqatanaĝanaĝana Noadías, nach'e ena'ama jogaa'me 'naqatanaĝanaĝanaqa laqaya' jo'ne jetaque jayem yoqochoqote't.»

¹⁵ Ca'li joote yenoĝodegue cincuenta y dos gaa'me noloqo'ote, qama'le yema ga'me nequepaĝanaĝat di'me Jerusalén male yem, jo'me nolo' jo'ne veinticinco, jo'me auoĝoic sexto jo'ne Elul.

¹⁶ Chane'eja ca'li jogaa'me qadaute'u male nomeda'a, qama'le yemeda jogaa'me jiyaĝadipi jo'ne qo'mi nalo'ojopa male 'uo da'me loqolanaqa' nataq'aen nometeguet da'me lepocoĝo'j, qa'a yayate'n da'me nach'eñe joñe'me Qanedios jo'ne qo'mi yotaua'n qaedi jomataq jenjo' qat'onatac.

¹⁷ Jaajo' noloqo'ote uo'oe qayoĝode' gaa'me ledii's gaa'me judiopi lajoĝola'te jo'ne qoyamaĝa ñe'me Tobías, jo'ne nach'e ena'am da'me yamaĝalo gaa'me 'lataĝaco,

¹⁸ qa'a jogaa'me qoyeladelo'te da'me lecochita joñe'me Tobías, yajouaĝat da'me nach'eñe 'lonaĝanec ñe'me Secanías, lec'oĝot di'me Árah, nataq'aen yajouaĝat da'me 'uo ga'me lec'oĝot ñe'me Tobías, lenaĝat da'me Johanán, jo'ne loua jaga'me lec'oqote ñe'me Mesulam, lec'oĝot ñe'me Berequías.

¹⁹ Naajo' najoĝola'te jayem 'yaĝatema nale daa'me onaĝayaqa 'lonataqa ñe'me Tobías, qama'le eque' qaedi yanema yemeda daa'me 'yaqataqa joñe'me. Qalaĝaja ñe'me Tobías qamqa'me jayem namaĝalo gaa'me lediijel qaedi jayem yoqochoqotet.