Joel 3 - Toba del Oeste

Ne'uaĝanague'j gaa'me noyaqa jo'ne laute'u jena'me Dios lec'oqo'tepi

¹ Yitaĝa nenaĝategue joñe'me Jaliaĝanec, enaac: «Qom yovita da'me dojo', male ñojouoĝochiñe da'me ladiquiyaĝac di'me noic Jerusalén nataq'aen yema di'me aleua jo'ne Judá.

² Male japotena't yema jogaa'me noyaqa, qama'le jaueguelo di'me c'ama'ague jo'ne lenaĝat da'me Josafat. Qama'le ua'a da'me ja'uo yec'atenaĝanaĝac, yajouaĝat ca'li joga'me 'yeteque jena'me yalaqapi jo'ne Israel laje'pi: ua'a ca'li male nelagaĝa, laguedelegue jena'me aleua; chayovida'a da'me necolaĝachidegui di'me mach'e 'ñaleua.

³ Necolaĝachidegui jena'me yalaqapi, nalichiguilo jogaa'me, qama'le qoyeme'n gaa'me ñoqolqapi nataq'aen gaa'me ñoqolel, qaedi ch'e yeualaĝae'n jajo'me laicaua, e'n lajo'vi'y joga'me lataĝa nataq'aen jogaa'me quejeguetaĝael.

⁴ Ami noyaqa Tiro choqodi'me Sidón, nataq'aen yema ga'me aleua jo'ne Filistea: ¿jach'e ga'me ami je'eteque ca'li? ¿Qo'li jetaque auauoyi lajo'vi ga'me ami je'eteque ca'li? Qalaĝaja qom naq'aeta qama'le paja'a da'me ami janema joga'me mach'e ane'uaĝanaguequi.

⁵ Qa'a auachiyi ca'li jajo'me plata nataq'aen jajo'me oro jo'ne mach'e yoqote; qama'le jaa'me yoqo'te jo'ne onaĝayaqa, ca'li auachiyauelo naa'me anetamenaĝaiquidi'.

⁶ Nataq'aen ca'li aueñi qaya'alo joga'me jiyaĝadipi jo'ne Judá lec'oqo'tepi, chayovida'alo ga'me Jerusalén laje'pi, qama'le auemeñi' jogaa'me qaedi qoye'n ne'uaqa, auañema ca'li gaa'me Grecia laje'.

⁷ Qalaĝaja yitaĝa jeuodaĝaneque jo' qomle, jachiyoĝoteda'ague ga'me te'me aueñi neda'ña, qama'le ami jene'tema qomle da'me adachoĝodequi jo'ne ena'ama ca'li jogaa'me.

⁸ Jeme'n qomle jogaa'me ac'oqo'chedi' nataq'aen gaa'me ac'oqocheldi', qama'le janema joga'me Judá laje'pi, qaedi jogaa'me yitaĝa yeme'n, yanema gaa'me Sabá laje', jiyaĝa'u jo'ne qaya'ague di'me 'lachaqa't. Jayem Jaliaĝanec, naqaena jenjo' 'yaqatac.»

⁹ Nach'ena jenjo' a'uaĝachitapema yema jena'me aleua laje'pi: ¡A'uaĝachi da'me qoya'uo qomle joga'me nalada't! ¡Aviyaĝañiyalo jogaa'me yataqata 'uañaĝayaqa: 'noota qom niyamaĝate'tape, qama'le natequena qomle!

¹⁰ A'vichi' qomle gaa'me adedaĝanaqachidi', aueñi chiyoqodayi joga'me laicaua jo'ne aleua lo'o, nataq'aen gaa'me adechiquenaldi', aueñi chiyaqayilo gaa'me adequejoĝonaqa'chidi'; chayovida'a ga'me choĝolaĝaic, 'noota qom enaac: «¡Jayem 'uañaĝaic!»

¹¹ Yema ami jo'ne noyaqa jo'ne neje'gue, ¡ami eneguelo, 'noota qom ademiya'a't! Qama'le, am Jaliaĝanec, ¡anamaĝatequena qomle jogaa'me nalada't lo'ol jo'ne yataqachiñe 'uañaĝayaqa!

¹² ¡'Noota qom aniyamaĝacheta't, ena'uac ami jo'ne noyaqa laqaya'! ¡Auec'achiya jodi'me c'ama'ague 'me lenaĝat da'me Josafat! Qa'a male ua'a da'me ya'uo lec'atenaĝanaĝac joñe'me Jaliaĝanec, qaedi ye'uaĝa'n qomle yemeda naa'me noyaqa jo'ne neje'gue.

¹³ Qa'a naajo' naqaenaua jo'ne yataqata ja 'noe'n, qaya'te ta'le ena'ama. Chane'eja avichaqaidegue qomle, ena'am joga'me trigo jala nale joote cop'a da'me yajoq, qa'a male laloqo' da'me qonaqat ga'me nanec. Yataqata qopiyilo, ena'am jaga'me uva nale, qa'a male laloqo' da'me qoya'uo ga'me lataĝa.

¹⁴ Yataqata jalcote gaa'me ueteda'a di'me c'ama'ague jo'ne ua'a da'me male ya'uo ñe'me Jaliaĝanec ga'me lec'atenaĝanaĝac, qa'a nadi'tequena ga'me nolo' qom ya'uo ga'me le'uaĝanaĝanaĝac.

¹⁵ Jañe'me ajeua nataq'aen joñe'me auoĝoic ja yauote lauaq, male 'naltapiye qomle; chayovida'a naa'me uaqachiñil male yem da'me edañguilo.

Judá lec'oqo'tepi uauelo qomle gaa'me noloqo'ote jo'ne onaĝayaqa

¹⁶ Ga'me ua'a qama'le joñe'me Jaliaĝanec da'me lajamaĝa ena'am jaga'me qajoĝonaĝa nale ne'uaĝanaĝatapiñi, chimaqapi'ña di'me Sión, jo'ne nach'edi di'me noic Jerusalén, qama'le jena'me piyem nataq'aen jena'me aleua yataqata deda'y qomle. Qalaĝaja joñe'me Jaliaĝanec naqaeñe 'me nañoĝotaqa' ga'me Israel laje'pi mach'e lec'oqo'tepi.

¹⁷ Qama'le enaac ñe'me Jaliaĝanec Dios: «Chane'eja yataqachiñe jayem auatetoñi qomle, da'me naqayem jo'ne Jaliaĝanec mach'e Anedios, jo'ne joue'ta jenjo' qajoĝonaĝa Sión, mach'e yoĝot jo'ne ja 'nalegue. Qama'le di'me noic Jerusalén yataqata ja 'nalegue qomle, male ja yitaĝa tade'ga jogaa'me jo'ne ja jayem 'te yateto'n.

¹⁸ Male jalcote joga'me uva li'i qomle, nataq'aen jaga'me lochi', ena'am joga'me noĝop nale quetayelo gaa'me qajoĝona'a jo'ne qayaje'meque nataq'aen gaa'me davichidiñe, qama'le naa'me noĝop lete' di'me Judá yataqachiñe najaqachiguilo jo' qomle. Jena'me ñetamenaĝaiqui 'uo jo' qomle ga'me noĝop jo'ne natajeguem jo'ne nach'ega yepapiaĝatac ga'me c'ama'ague jo'ne lenaĝat da'me Sitim.

¹⁹ Di'me Egipto 'uo qomle joda'me qoyen lachoĝodec, nataq'aen jodi'me Edom qoyen napalaĝa q'aen, qo'ene'tem ga'me aleua jo'ne totapega't, yajouaĝat da'me dalataĝañilo ca'li gaa'me 'lachaqa't ga'me Judá lec'oqo'tepi, qama'le 'uo jajo'me netauo' jo'ne qoyelagaĝategue da'me qoyala't jogaa'me qaya'te laviyaĝaje't.

²⁰ Chane'eja jena'me Judá lec'oqo'tepi nach'e eta't da'me uo'oe, nataq'aen di'me Jerusalén nach'e eta't uo'oe gaa'me neteda'ña,

²¹ qa'a jichoĝode'n qomle jogaa'me, qama'le paja'a ja'uo lovi' ga'me loecoyaĝa'j gaa'me laute'upi. Qa'a naqayem jo'ne Jaliaĝanec, joneta'ña jodi'me qajoĝonaĝa jo'ne Sión.»