Ester 1 - Toba del Oeste

Yataqata t'adaic ca'li ga'me leualayaĝac ñe'me jaliaĝanec Asuero

¹ Naajo' uo'oe joca'li ñe'me Asuero nejaliaĝatelo'te ciento veintisiete gaa'me ale'u laqaya' jo'ne laguelegue di'me India chayovida'a loiquiaqa' di'me Etiopía,

² qama'le da'me lejaliaqa' nach'edi di'me noic let'adaic jo'ne Susa, di'me aleua jo'ne Persia.

³ Ca'li male tres jaa'me 'uoidi da'me 'uo ga'me lejaliaĝa ñe'me Asuero, qama'le ya'uo joga'me neualayaĝac let'adaic qaedi yanema gaa'me jaliaĝanaqa jo'ne lecochaĝa'u nataq'aen gaa'me najoĝola'te jo'ne yelodelegue di'me Persia choqodi'me aleua laqaya lenaĝat Media. Nataq'aen yiyaĝanalo gaa'me coico lejaliaĝanaqa chayovida'alo yemeda gaa'me nejaliaĝanaqa nataq'aen gaa'me necochaĝa'u jo'ne yelolo'te gaa'me ale'u laqaya'.

⁴ Nalo'taguet da'me seis gaa'me auoĝoyaqa da'me yaloĝo'tape joga'me leuoyaĝac jo'ne yauana ca'li; yaloĝon da'me eja yataqata p'ajaye joga'me 'uo da'me lichic, chayovida'a da'me lañoqotaĝanaĝac ga'me lejaliaĝa.

⁵ Yem da'me dojo', qama'le yitaĝa damaĝajoĝolegue qaedi qoya'uo joga'me neualayaĝac laqaya jo'ne qoyacha'ña di'me dajoya'ya ga'me nejaliaĝaiqui jo'ne onaĝaic, nalo'taguet da'me siete gaa'me noloqo'ote da'me deualaĝai'tape. Qama'le yiyaĝanalo yemeda gaa'me neda'ña di'me noic Susa, gaa'me neuoyaĝadi chayovida'alo gaa'me qaya'te yauata.

⁶ Jogaa'me jotenaĝal lat'edael jo'ne mármol qoyanayelo ga'me netaĝanaĝat jo'ne pagaĝaic nataq'aen malaĝadaic, 'uo joga'me netaĝatañe jo'ne 'loyaĝac da'me pit'aladic, lale'gue ga'me oro li'i ca'li, qoyauo'oe gaa'me je'onaĝaiqui' jo'ne 'loyaĝa'j da'me oro nataq'aen plata, joga'me napiaĝala' qamqa'me mármol pagaĝaic, lae da'me ledaĝaic, ga'me li'yoĝodaĝa't qoyauo'oe jo'ne qadi onaĝayaqa.

⁷ Qoyanegue jaga'me jalcote lataĝa, qa'a joñe'me jaliaĝanec 'uo da'me lichoĝodenataĝanaĝac. Jogaa'me yomaĝaiqui' jo'ne uedañgui ga'me lataĝa yataqata onaĝayaqa, qa'a oro jogaa'me, chayovida'a uo'oe naa'me ledaqa'te jo'ne jaliaĝanec loqo'te.

⁸ Qalaĝaja joñe'me Asuero yamaĝalo'te jogaa'me yatedapeguegue joga'me naquip da'me ja jetaque yiyaĝatot ga'me ja niyom, dite qom mach'e yataqata lelnataĝac ga'me.

⁹ Qama'le jañe'me jaliaĝana Vasti nach'e ena'am dachetaĝan ua'a ca'li di'me lejaliaĝaiqui ñe'me jaliaĝanec Asuero, qaedi nataq'aen qoya'uo ga'me neualayaĝac jo'ne loĝo't gaa'me yauodipi jo'ne quetapegue'to gaa'me le'mi ca'li.

Jañe'me jaliaĝana Vasti ja ya'uo 'laqatac ñe'me jaliaĝanec Asuero

¹⁰ Ca'li nolo' jo'ne siete joga'me neualayaĝac, ñe'me jaliaĝanec Asuero yataqata matac, qa'a niyomigui ga'me lataĝa, qama'le yiyaĝanalo gaa'me siete jiyaĝa'u jo'ne yataqata 'yamaqate'n, lenaĝa't da'me Mehumán, Biztá, Harboná, Bigtá, Abagtá, Zetar nataq'aen ñe'me Carcás.

¹¹ Qama'le paja'a da'me damaĝajoĝolo'te qaedi qoyelaque jañe'me jaliaĝana Vasti, nataq'aen ya'uo 'laqatac qaedi ua'ña da'me yec'ata joñe'me, 'noota ta'le yaeñi jaga'me noqop'a jo'ne onaĝae, qaedi ga'me jiyaĝadipi chayovida'alo gaa'me jaliaĝanaqa laqaya' qoyauana joda'me yataqata onaĝae jañe'me Vasti.

¹² Qalaĝaja ca'li qo'yaĝatem da'me 'laqatac ñe'me jaliaĝanec, jañe'me jaliaĝana ja yoqo'cha. Qama'le ca'li noma'a jenjo', ñe'me jaliaĝanec yataqata dalemata.

¹³ Chane'eja ñe'me Asuero paja'a yemata'a't gaa'me yatenaĝanaĝayaqa qaedi yayaten jach'e jogamaĝa 'yetec qomle, qa'a 'loyaĝac ca'li dojo' da'me qoyena't jogaa'me jo'ne yataqata yayate'n naa'me naqataĝaco.

¹⁴ Gaa'me yataqata lecochita ca'li jena'me jenjo' qa'a Carsená, Setar, Admata, Tarsis, Meres, Marsená nataq'aen Memucán. Naa'me naajo' siete qa'a najoĝola'te di'me Persia choqodi'me aleua laqaya lenaĝat Media, qama'le neteda'ajop nale ñe'me Asuero qaedi yelodelegue yema ga'me aleua.

¹⁵ Qama'le ñe'me Asuero yena't ca'li: «Jañe'me jaliaĝana Vasti ja ya'uo da'me 'yaqatac, qama'le ¿jach'e ga'me ualegue na'me naqataĝac? ¿Jach'e jogamaĝa qo'yetec qomle jañe'me?»

¹⁶ Memucán paja'a 'yateguet ñe'me jaliaĝanec nataq'aen gaa'me necochaĝa'u laqaya': «Am jaliaĝanec, jañe'me jaliaĝana Vasti ja nach'edata da'me am nautena, dite da'me nach'e ena'am nautenalo yemeda gaa'me adecochaĝa'u, chayovida'a yema ga'me le'emdipi.

¹⁷ Qama'le nayi yemeda gaa'me yauodipi jo'ne 'lachaqa't jena'me jenjo' Persia, qom nomedaye da'me ja am 'te yoqo'cha jañe'me jaliaĝana, qama'le nach'e ena'am da'me ye'ue'tape qomle gaa'me mach'e loua'. Qa'a eetojo' qomle ga'me 'laqata'j: “Ñe'me jaliaĝanec Asuero damajoĝolegue da'me qoyelaque jañe'me jaliaĝana Vasti, qaedi ua'ña da'me yec'ata joñe'me, qalaĝaja jañe'me ja yoqo'cha.”

¹⁸ Chiyaqayi nayi, gaa'me yauodipi jo'ne qo'yaĝatema da'me dojo', male ja yauote ga'me 'laqatac gaa'me lóua', dite da'me yataqata 'yota'tape qomle jogaa'me qama'le yalemataĝanaĝa'n.

¹⁹ Chane'eja, qom naq'aeta da'me adelnataĝac, paja'a auamaĝalegue jañe'me Vasti qaedi male ja yitaĝa jaliaĝana qama'le ja yitaĝa ta'le am ue'tajop. Jenjo' at'aqatac, 'noota ta'le yataqata t'añañi q'aen, qama'le qoyediñe qaedi qoyayaten yema jena'me jenjo' Persia nataq'aen di'me Media. Yem qama'le auelaque jaga'me jaliaĝana dalaĝae jo'ne yataqata 'noota nataq'aen joĝodae, ja ena'am jaga'me Vasti.

²⁰ Ga'me ua'a qom qonoma'a joga'me adamajoĝonaĝac jena'me jenjo' adejaliaĝaiqui let'adaic, yemeda jogaa'me yauodipi yataqata uate'calo naa'me loua', uotaĝa te'me qaya'te yauata, chayovida'alo gaa'me neuoyaĝadi'.»

²¹ Joñe'me Asuero nataq'aen gaa'me lecochaĝa'u yataqata 'yamaqate'n jenjo' nelnataĝac, qama'le joñe'me Asuero ya'uo da'me dojo':

²² yamaĝalo jaga'me lediije yemeda naa'me 'nachaqa'te jo'ne uo'oe ga'me aleua, jaga'me nediije ualo'te da'me mach'e 'laqataqa gaa'me neteda'ña, da'me nenaĝategue da'me naqaega ga'me le'em jo'ne nejaliaĝatelo'te gaa'me mach'e 'lachaqadiaĝa'u, qaedi yataqata qoya'uo joga'me mach'e 'laqatac.