2 Samuel 9 - Toba del Oeste

David yichoĝoden ñe'me Mefi-bóset

¹ 'Uo jo'me nolo' ñe'me David denataĝan: «¿Qo'li maliaĝa 'uo jogamaĝa 'noquetac ga'me c'oĝot di'me Saúl? Qa'a ñetouena di'me mach'e yataqachiñe ñaigaĝaua Jonatán, nach'ega jo'ne jetaque janem da'me yichoĝodenataĝanaĝac.»

² Qama'le qoyiyaĝana ñe'me Sibá, nach'eñe lalemaĝajet ca'li di'me Saúl, qaedi dajoya'aguet ñe'me David. Ca'li male dajoya'aguet ñe'me jaliaĝanec David yachimaĝata joñe'me: «¿Qo'li naqa'am am Sibá?» Joñe'me 'yateguet: «Jaa'a naqayem. Am jo'onataĝaneuo'o, am yejaliaĝanec.»

³ Joñe'me David yachimaĝata: «¿Qo'li maliaĝa 'uo joga'me nec'aletaye gaa'me c'oqo'te di'me Saúl? Qom 'uo, qama'le jetaque janem da'me yichoĝodenataĝanaĝac, qa'a naq'aeta da'me 'yaqatac janem ca'li ñe'me Dios.» Ñe'me Sibá 'yateguet: «'Uo ñe'me 'noquetac c'oĝot di'me Jonatán, nach'eñe jo'ne choĝolaĝayaqa naa'me lichel.»

⁴ Ñe'me jaliaĝanec enaac: «¿Jach'e ga'me ue'ta?» Ñe'me Sibá 'yateguet: «Ue'ta di'me Lodebar, 'lachaqa' ñe'me Maquir, jo'ne c'oĝot ñe'me Amiel.»

⁵ Qama'le ñe'me jaliaĝanec David damajoĝolegue ñe'me Mefi-bóset qaedi ca'e joga'me neta'ña.

⁶ Ca'li ñe'me Mefi-bóset, jo'ne c'oĝot ñe'me Jonatán nataq'aen laual di'me Saúl, yovita ñe'me David, naĝa'ñijop qa'a 'uo da'me lauategaĝa. Ñe'me David netonec joñe'me eetac: «¡Mefi-bóset!» Ñe'me Mefi-bóset 'yateguet: «Am jo'onataĝaneuo'o, am yejaliaĝanec.»

⁷ Qama'le David enaac: «Ena'te ado'e, qa'a yataqachiñe am jichoĝoden nayi, jouaĝat da'me ñetouena di'me Jonatán, mach'e adet'a. Qomle jen am qo'yiyelaĝatot ena'uac ga'me 'naleua di'me adapena' Saúl, nataq'aen nach'e eta't da'me am ñeuanaĝaua da'me jeque'yaq.»

⁸ Qalaĝaja ñe'me Mefi-bóset yitaĝa naĝa'ñijop qama'le enaac: «¿Toqoch'e jayem auenate'ta, am yejaliaĝanec? Jayem adalemaĝajet, jo'ne jena'am ga'me pioĝo leuaĝaic.»

⁹ Qama'le ñe'me jaliaĝanec yiyaĝana ñe'me Sibá, jo'ne jalchi'ena lalemaĝajet ca'li di'me Saúl, qama'le dojapegue', enaac: «Ga'me loĝot ca'li di'me adadipa choqogaa'me c'oqo'te, ena'uac male janem ñe'me laual.»

¹⁰ Chane'eja da'me am, choqogaa'me ac'oqo'te nataq'aen gaa'me adalemaĝaje'te, a'uonataĝañilegue ga'me 'naleua joñe'me qama'le aniquipiñi gaa'me jalayaĝac, qaedi ja youetedaque ga'me yali'y gaa'me c'oqo'te di'me adadipa, temaq'aen da'me Mefi-bóset, jo'ne laual jodi'me, nach'e eta't da'me ñeuanaĝaua. Ñe'me Sibá jo'ne quince gaa'me c'oqo'tepi nataq'aen veinte gaa'me lalemaĝaje'te,

¹¹ 'yateguet ñe'me jaliaĝanec: «Ena'uac ga'me jayem auamaĝalegue, am yejaliaĝanec, jayem jo'ne mach'e adalemaĝajet, ja'uo jaĝa'te.» Qama'le Mefi-bóset nach'e eta't da'me neuat'ai ñe'me David nale deque'e, ena'am ta'le mach'e c'oĝot ñe'me jaliaĝanec.

¹² Nach'e ena'am Mefi-bóset 'uo ga'tae'me c'oĝot jo'ne ja 'yaĝaic lenaĝat da'me Micaías, qama'le ena'uaque gaa'me c'oqo'te ñe'me Sibá nataq'aen gaa'me neteda'ajop male t'onataĝadeuo'o ñe'me Mefi-bóset.

¹³ Qalaĝaja Mefi-bóset, jo'ne choĝolaĝayaqa naa'me lichel, na'ña ca'li di'me Jerusalén, qa'a nach'e eta't da'me neuanaĝaua ñe'me jaliaĝanec nale dajoyalegue ga'me niqui'yaĝala'.