2 Samuel 4 - Toba del Oeste

Qoyalat di'me Is-bóset

¹ Ca'li ñe'me Is-bóset, jo'ne c'oĝot ñe'me Saúl, noma'a di'me Abner da'me yeleu ua'a di'me Hebrón, joñe'me yataqachiñe qaya'te 'lañaĝac ca'li, nataq'aen ena'uaque jogaa'me Israel laje' jaqachiguilo ca'li da'me loqolanaqa't.

² Ñe'me Is-bóset uo'oe gaa'me dojolqa lamaĝa's nach'egaua lajoĝola'te gaa'me cachaĝayaqa. Ñe'me onolec qa'a lenaĝat da'me Baaná, ñe'me laqaya qa'a lenaĝat da'me Recab. Joñaa'me qa'a c'oqo'te ñe'me Rimón jo'ne Beerot le'ec; joñaa'me etapela'ajalo c'oqo'te di'me Benjamín, qa'a gaa'me Beerot laje' chiyoĝoteguet ca'li di'me Benjamín.

³ Qa'a jogaa'me 'uaechidiñe Beerot laje' yec'adeta ca'li di'me Guitaim qa'a dajodegue, ch'e neteda'ña jodi'me ja yataqachiñe ta'le 'lachaqa't chayovida'a nayi.

⁴ Ñe'me Jonatán, c'oĝot ñe'me Saúl, 'uo ca'li ñe'me c'oĝot lenaĝat da'me Mefi-bóset, ñe'me jo'ne choĝolaĝayaqa daa'me lichel. Ca'li da'me 'naqataĝanaĝac yovita di'me Jezreel queda'me Saúl choqodi'me Jonatán yele'u, ñe'me Mefi-bóset yauanalo cinco gaa'me ne'uoidi. Jañe'me neteloqo't 'uo da'me loqolanaĝa ca'li, qama'le dajoye lequiaĝaua joñe'me. Qalaĝaja jañe'me, da'me 'uo da'me liyalaĝa, ñe'me Mefi-bóset 'naqañe ca'li qama'le ua'a da'me choĝolaĝaic.

⁵ Ñe'me Recab nataq'aen ñe'me Baaná, jo'ne c'oqo'te ñe'me Rimón jo'ne Beerot le'ec, dajotegue ga'me 'lachaqa' ñe'me Is-bóset: ca'li yovi't t'ochetac joñe'me, qa'a yovita jo'me nolo' jo'ne yataqachiñe nepiyañe.

⁶ Jañe'me lamaĝaje ñe'me Is-bóset jo'ne netela ga'me jom, yiyotac ca'li ga'me trigo, qalaĝaja jañe'me nach'e ena'am t'oche ca'li. Chane'eja ñe'me Recab nataq'aen ñe'me laqaya Baaná yepitaqatedac ca'li da'me ja qoyauañiyilo qama'le yenoĝodeuo.

⁷ Da'me yauata da'me t'ochetac joñe'me Is-bóset, yenoĝodeuo qama'le yala't joñe'me, qama'le yichaĝadegue ga'me laqaic. Yem qama'le yachi'y joga'me laqaic da'me eque'. Yema jo'me pi'yaq da'me yeuo'tape, tade'ga ga'me naq'aic jo'ne yelo'tegue di'me Arabá

⁸ qaedi yate'm ñe'me David jo'ne ue'ta di'me Hebrón. Qama'le eetac ga'me 'laqata'j: «Am jaliaĝanec, jenjo' jena'me laqaic di'me Is-bóset, c'oĝot di'me Saúl, jo'ne mach'e adauteua nataq'aen jetaque am yalat ca'li. Qalaĝaja nayi ñe'me Jaliaĝanec ya'uo lajo'vi ga'me jo'ne jetaque am 'yetec di'me Saúl choqogaa'me c'oqo'tepi.»

⁹ Ñe'me David 'yategueta: «Eja 'ñaĝatot ñe'me Jaliaĝanec, jo'ne nach'eñe jayem nec'alaĝategue nale 'uo ga'me yachoĝodec,

¹⁰ queda'me 'uo ca'li ga'me etapega onaĝaic ga'me 'laqataĝanaĝac, jayem nec'ata qama'le jayem 'yaĝatem queda'me Saúl joote yeleu, qama'le jen lajo'vi da'me jalat joga'me jo'ne t'aqataĝatac, ua'a di'me Siclag.

¹¹ Chane'eja nayi, p'ajaye da'me ami je'eteque, aueñiya'am jodi'me: ami qaleuaĝayaqa, qa'a aualachi di'me jiyaĝaua jo'ne qaya'te laviyaĝajet, a'nochitalegue da'me t'ochetac nataq'aen ue'ta ga'me mach'e 'lachaqa'. Chane'eja, jen auejechiñe da'me dojo' leleuaĝa: ¡ami japalaĝa't jena'me jenjo' aleua!»

¹² Qampaja'a ñe'me David yamaĝalo'te jogaa'me lalemaĝaje'te qaedi yala't jogaa'me; yichaĝadegue gaa'me loua' nataq'aen gaa'me lapia'te, qama'le qoyen netaĝatedañe qoyoqo'ta jaga'me noĝop lae't di'me Hebrón. Yem qama'le yacota ga'me laqaic di'me Is-bóset qama'le yachedaue jaga'me napa'l lae't jo'ne qoyachaue ca'li di'me Abner, na'ña di'me Hebrón.