1 Samuel 19 - Toba del Oeste

Saúl jetaque yalat ñe'me David

¹ 'Uo jo'me nolo', Saúl yiyaĝana ñe'me c'oĝot Jonatán nataq'aen ena'uaque jogaa'me nejoĝonaqa, qama'le damajoĝolegue ñe'me David qaedi qoyalat. Qalaĝaja ñe'me Jonatán jo'ne yataqachiñe noqopita joñe'me,

² yamaĝa ga'me 'laqatac, t'aqataĝanem joñe'me David: «Ñe'me taĝadena' jetaque am yalat. 'Noota qom anetelela't: qom 'yoĝoñi qama'le anañoĝochiñe, oue'ta ga'me 'nonaĝa jo'ne ja di'yaqa'a ta'le oue'ta.

³ Da'me jayem qa'a ñepoda ñe'me taĝadena' qaedi yec'ata ga'me oue'ta da'me anañoĝochiñe, qama'le jojapegue', jiyamaĝate'tape gaa'me 'yaqataqa jouaĝat am, qaedi qaya'te am 'yetec. Yem qama'le am ja'aĝatem ga'me eeta joga'me 'uo.»

⁴ Nete' laqaya qama'le Jonatán dojapegue' ñe'me let'a queda'me David naqaeñe lalemaĝajet jo'ne yataqachiñe onaĝaic ga'me ya'uo ca'li, qama'le yitaĝa noqotenegue ga'me 'laqatac: «Am jaliaĝanec, ena'te aua'uo ga'me adaviyaĝajet da'me anautena ñe'me adalemaĝajet David, qa'a joñe'me qaya'te ya'uo ta'le ja no'en, ta'le am nautena, maq joda'me yema joga'me ya'uo mach'e liyamaĝac da'me adejaliaĝa.

⁵ Qa'a joñe'me ja uenate'ta da'me nejiyaĝauayaĝac ca'li deloi'ye' ñe'me filisteo le'ec, qama'le nach'eñe joñe'me jo'ne chiyaqayi da'me qo'mi nec'alaĝatedegue ñe'me Jaliaĝanec Qanedios. Da'me am jaliaĝanec, ca'li auana da'me dojo' qama'le yataqachiñe am matac, nataq'aen auanem adamaic joñe'me. Chane'eja, ¿toqoch'e jetaque aua'uo da'me adaviyaĝajet da'me jetaque auelagaĝat jaga'me tauo' ñe'me David, jo'ne qaya'te laviyaĝajet? Yataqachiñe ja yelo'teguet ta'le naq'aeta.»

⁶ Qama'le Saúl 'yamaqaten ga'me enaac ñe'me Jonatán, qama'le 'naĝatot ñe'me Jaliaĝanec queda'me ja yitaĝa yequeuogaĝan da'me nejiyaĝauayaĝac ñe'me David.

⁷ Yem qama'le Jonatán yiyaĝana ñe'me David, qama'le t'aqataĝanem yema ga'me 'laqatac da'me dojetapegue' ñe'me Saúl. Chane'eja ñe'me Jonatán yauega ñe'me David, qaedi yajoĝona'aguet joñe'me Saúl, da'me yitaĝa t'onataĝaneuo'o ñe'me, ena'am ca'li yemta.

⁸ Jaa'me noloqo'ote ca'li, gaa'me filisteopi choqoga'me Israel laje'pi yitaĝa yovita da'me nalada't. Chane'eja ñe'me David nach'e ena'am deloi'ye'to jogaa'me, qama'le noma't nataq'aen e'n dajodegue ena'uaque jogaa'me.

⁹ Qalaĝaja 'uo jo'me nolo' da'me yitaĝa chiyaqaje'ma ñe'me Jaliaĝanec ñe'me nepaqal jo'ne ja no'en, qama'le taue ñe'me Saúl nale 'nomategue, neta'ña ga'me 'lachaqa'. Temaqaedi ñe'me David yiviquiitapiye jaga'me leviqui, qama'le joñe'me Saúl lajoqot'a jaga'me nemiyoĝo.

¹⁰ Qampaja'a Saúl yajaĝac jaga'me miyoĝo joñe'me David, lelnataĝac da'me leuota'ya da'me yajaĝac ñe'me, qalaĝaja David ja nalajaĝata't da'me 'ñiiñe, qama'le jaga'me miyoĝo nach'e netaye ga'me lae ga'me emec. Qama'le David dajoye, qama'le nach'ejo jo'me pi'yaq da'me ec, ca'e di'me nejaliaĝaiqui.

¹¹ Qama'le Saúl damajoĝona ga'me 'lachaqa' ñe'me David qaedi qoyevite'ta, qaedi qoyalat da'me yamta'le nete'. Qalaĝaja Mical, jo'ne loua ñe'me David, dojapegue' joñe'me: «Qom ja aua'uo da'me jetaque adec'alegue jena'me jenjo' pi'yaq, qama'le qom nete' male am qoyalat.»

¹² Qampaja'a Mical 'uo ga'me yecoñetec qama'le lecochiya ñe'me David da'me nenotaĝañe, en ta'uet ga'me ventana, qama'le David dajoye.

¹³ Yem qama'le Mical yacona ga'me nequi'i jo'ne 'noĝonec, yachalegue ga'me nela'; ga'me najaĝanaqa' yachalegue ga'me 'noĝonec jo'ne chiyaqayi ga'me layoĝot jaga'me quetaq, qama'le lapaĝalegue ga'me ualoq.

¹⁴ Ca'li gaa'me lamaĝa's ñe'me Saúl yovi't da'me jetaque yecoñe't ñe'me David, jañe'me Mical t'aqataĝanema queda'me yeleuac joñe'me, uetalegue ga'me lela'.

¹⁵ Chane'eja jogaa'me namaĝa's eque' qaedi t'aqataĝatem ñe'me Saúl, qalaĝaja Saúl yitaĝa e'n 'viyela' jogaa'me qaedi yauata ñe'me David, qom maliaĝa ue'ta di'me 'lachaqa', qama'le eetac ga'me 'laqatac: «Temaq'aen qom uetalegue ga'me lela', qalaĝaja auachiyoĝochiyalegue qama'le anaviyequena qaedi jalat.»

¹⁶ Gaa'me namaĝa's yenoĝode'uo ga'me 'lemec ñe'me David, qalaĝaja ga'me yauata jo'ne uetalegue ga'me lela' ch'e nequi'i jo'ne 'noĝonec, nataq'aen ga'me jaĝanaĝala' jo'ne 'nonatac jo'ne chiyaqayi ga'me lo'oc jaga'me quetaq.

¹⁷ Chane'eja Saúl yiyaĝana jañe'me Mical qama'le enapega: «¿Toqoch'e jayem auoqovin? ¿Toqoch'e auajeta da'me dajoye ga'me yauteua?» Qama'le Mical 'yateguet joñe'me: «Qa'a jo'me 'uo da'me lajauaqataĝanaĝac joda'me jayem. Eetac ga'me 'laqatac qom ja yecochiya da'me dajoye, qama'le jayem yalat.»

¹⁸ Qama'le naq'aeta da'me David dajoye, yec'ata di'me Ramá jo'ne neta'ña ñe'me Samuel. Qama'le t'aqataĝanem da'me eeta ñe'me Saúl da'me jetaque yalat. Qama'le David nataq'aen Samuel yec'adeta di'me noic laqaya jo'ne qoyoqo'ta, lenaĝat da'me Naiot, male neteda'ña.

¹⁹ Qalaĝaja ca'li Saúl nomaye queda'me David nataq'aen Samuel ueteda'a di'me Naiot,

²⁰ qama'le yauo'oe gaa'me lamaĝa's, damajoĝonalo joñaa'me qaedi qoyauegalo joñe'me. Qalaĝaja da'me yovidi't, yauata gaa'me Dios 'laqatanaĝanaĝanaqa da'me yema'a't qaedi t'aqataĝa'tape, jo'ne nach'eñe ñe'me Samuel da'me lajoĝola't. Qampaja'a da'me lañoqotaĝanaĝac joñe'me Dios neda'ñalo gaa'me namaĝa's, qama'le nach'e ena'ama jogaa'me male t'aqataĝa'tape, 'yaĝatetedac ga'me 'laqataĝanaĝac ñe'me Dios.

²¹ Da'me noma'a da'me dojo' ñe'me Saúl, yitaĝa yauo'oe gaa'me yama', qalaĝaja nach'e ena'am da'me lañoqotaĝanaĝac joñe'me Dios neda'ñalo jogaa'me, qama'le jogaa'me 'yaĝatetedac da'me 'naqataĝanaĝac jo'ne onaĝaic. Qama'le Saúl yitaĝa yauo'oe gaa'me lamaĝa's laqaya', qama'le nach'e ena'ama jogaa'me t'aqataĝa'tape, 'yaĝatetedac da'me 'naqataĝanaĝac jo'ne onaĝaic.

²² Chane'eja mach'eñe ñe'me Saúl male dajoyi di'me Ramá. Da'me yovita jaga'me limaĝañi lat'edae jo'ne na'ña di'me Secú, male denataĝan: «¿Jach'e ga'me ueteda'a jaa'me Samuel nataq'aen David?» 'Uo joga'me jiyaĝaua 'yateguet joñe'me: «Ueteda'a di'me Naiot jo'ne qoyoqo'ta di'me Ramá.»

²³ Qama'le Saúl dajoyi, yelapiyi joñaa'me. Qalaĝaja da'me lañoqotaĝanaĝac ñe'me Dios nach'e ena'am neda'ña joñe'me: mane'e da'me que'tague ga'me ladic, joñe'me 'yaĝatetac ga'me 'naqataĝanaĝac jo'ne onaĝaic, chayovida'a da'me yec'ata di'me Naiot.

²⁴ Da'me yovida'a ñe'me Samuel, nach'e ena'am naqa't gaa'me leuo, yataqachiñe jale'tague, qama'le ja 'nemaĝañe da'me t'aqataĝatac, 'yaĝatetac ga'me onaĝaic 'naqataĝanaĝac yema ga'me nolo' nataq'aen yema ga'me pi'yaq. Chiyaqa'ña jo'me nolo' ca'li gaa'me jiyaĝadipi 'uo ga'me 'laqatac jo'ne eetac: «¿Qo'li nach'e ena'am ñe'me Saúl uetauelo jogaa'me Dios 'laqatanaĝanaĝanaqa?»