Sawltak 2 - Tedim Bible

Kha Siangtho Hong Paina

¹ Pentekos ni hong tun ciangin Jesuh a um mi khempeuh mun khatah kikhawm uh hi.

² Tua laitakin huihpi nung bangin huging khat hong tungvat a, amaute’ kikhopna innsung khempeuh hong dim hi.

³ Tua ciangin leii tawh a kibang meikuang bang pian amaute lakah hong kithehthang a, tuate in mi khempeuh sukha kim hi.

⁴ Amaute khempeuh Kha Siangtho tawh kidim uh a, tua Kha in minam dangte’ pau tawh amaute a pau theisak hi.

⁵ Tua laitakin biakna pawi siim dingin gam tuamtuam panin a hong pai Jew mi biakna hahkat mi tampi tak, Jerusalem khua sungah a om uh hi.

⁶ Hih huging a zak uh ciangin mihon tampi tak hong kikhawm uh a, hih Jesuh a um mite’ thugen pen amau’ pau ciatin za uh ahih manin lamdang a sa mahmah uh hi.

⁷ Amaute in hih thu lamdangsa mahmah uh ahih manin, “Hih thugen mite pen Galilee mi vive hi lo ahi hiam?

⁸ Tua hinapi-in bang hangin amaute’ thugen pen eima pau ciatin za ihi hiam?

⁹ Eite pen Parthia gam, Media gam, Elam gam, Mesopotamia gam, Judea gam, Kappadosia gam, Pontas gam, Asia gam,

¹⁰ Frigia gam, Pamfilia gam, Egypt gam, le Sairin khuapi gei-a om Libya gamte pan ihi a, pawlkhatte Rom gam pan ihi hi.

¹¹ Jew mite le Gentail mi Jew biakna a zuite ihi a, pawlkhatte pen Krete gam le Arabia gam pan ihi hi. Tua bang hinapi-in, Pasian’ sep na lamdang liante a kigenna eima pau ciatin i za hi,” a ci uh hi.

¹² Amaute in lamdangsa-in lungmang mahmah uh a, “A bangci thu ahi hiam?” ci-in khatlekhat a kidong uh hi.

¹³ Ahi zongin mi pawlkhatte in hih Jesuh a umte simmawhbawl uh a, “Zukham ahi uh hi,” ci-in a zahko uh hi.

Pentekos Ni-a Peter’ Thugenna

¹⁴ Tua ciangin sawltak sawm le khatte tawh a omkhawm Peter hong dingto-in, mihonte tungah nakpitakin thu hong gen a, “Ka mipih ahi Jew mite le Jerusalem khuasunga om mi khempeuhte aw, hih thupiang hong gen ding ka hih manin limtakin na ngai un.

¹⁵ Tuhun pen zingsang nai kua hi pan ahih manin, note’ ngaihsut bangin hih mite zukham hi lo uh hi.

¹⁶ Hih thupiang pen kamsang Joel in a gensa thu hi a, tua sungah,

¹⁷ ‘Pasian in hih bangin gen hi: Nitawp ni ciangin, mi khempeuh tungah ka Kha ka sung ding a, na tanute uh le na tapate un keima thu taangko ding uh hi; na tangvalte un maang mu ding uh a, na puteekte un mang man ding uh hi.

¹⁸ Tua ni ciangin ka nasem numeite le ka nasem pasalte’ tung nangawnah ka Kha ka sung ding a, amaute in keima thu gen ding uh hi.

¹⁹ Tua ciangin vantung le leitungah hilhkholhna lim le nalamdang ka bawl ding hi. Sisan kiluansakna, meikatna le meikhu sahpi hong om ding hi.

²⁰ Topa’ ni, a lian thupi ni, hong tunma-in ni hong mialin, kha, sisan hong bang ding hi.

²¹ Ahi zongin Topa tungah huhna a ngen khempeuh in hotkhiatna ngah ding uh hi,’ ci-in a kigelh hi.

²² “Ka mipih Israel-te aw, hih ka thugen na ngai un: Nazareth khuami Jesuh tungtawnin Pasian in lim le na lamdangte bawlin na hong sem ahih manin, Jesuh pen Pasian’ sawl nasem ahihna teltakin na thei uh hi. Hih thu pen note lakah a piang thu ahih manin nomau mahmah in na thei uh hi.

²³ Pasian in thu a ma theihkholhna le ama geelna tawh kizui-in note’ khut sungah tua Jesuh a hong piak ding a ngaihsutsa hi a, note in singlamteh tungah khai-in migilote’ khut tawh amah na that uh hi.

²⁴ Ahi zongin Pasian in misite lak panin amah hingkiksak a, sihna in amah lencip zo lo ahih manin sihna hanga gimna panin amah a suaktasak hi.

²⁵ Bang hang hiam cih leh David in ama thu a genna-ah, “‘Topa ka maingat tawntung a, ka taklamah amah om ahih manin lungkhamna ka thuak kei ding hi.

²⁶ Tua ahih manin ka lungdam a, kei ka nuam hi. A si thei mihing ka hih lel hangin lungmuang takin ka om ding hi.

²⁷ Bang hang hiam cih leh misite’ gamah kei nong nusiacip kei ding a, na nasem keimah muatna nong thuaksak kei ding hi.

²⁸ Nangmah in nuntakna lampi na hong lak khin a, nong ompihna tawh kei nong lungdamsak hi,’ ci hi.

²⁹ “Sanggamte aw, note’ theih dingin i pupi David’ thu a teltakin kong gen ding hi. Amah si-in kivui a, a han zong tu mahmahin eite kiangah omlai hi.

³⁰ David pen kamsang hi a, ama tunga Pasian’ thuciam a thei hi. Ama suante khat, amah bang teek mahin kumpi-in a bawl nading Pasian in thu a ciam hi.

³¹ Pasian in a sep ding thu David in mukhol ahih manin, ‘Mi site gam sungah amah kinusia lo a, a sa a muat kei hi,’ ci-in a gen ciangin, Khrih’ thawhkik nading thu a gengen ahi hi.

³² Pasian in sihna panin hih Jesuh hingkiksak a, kote khempeuh pen hih thu a thei teci vive ka hi uh hi.

³³ Amah in Pasian’ taklamah omna dongin liatna ngah a, ama tungah Pasian in a ciamsa Kha Siangtho zong a ngahkhin hi. Tu laitak a na muh na zak uh nate pen kote tungah a hong piak tua Kha Siangtho ahi hi.

^34-35 David pen vantungah a kahtoh loh hangin amah in, ‘Topa in keima Topa kiangah: Na khe nuai-ah na galte kong koihsak matengin ka taklamah na tu in, ci-in gen hi,’ ci hi.

³⁶ “Tua ahih ciangin singlamteh tungah na thah uh hih Jesuh pen Pasian in Topa le Khrih in a bawl khitna thu, Israel mi khempeuh in teltakin thei ta un,” a ci hi.

³⁷ Amaute in hih thu a zak uh ciangin a lungsim uh nakpitakin sukha a, Peter le sawltak dangte kiangah, “Sanggamte aw, bangci gamtat ding ka hi uh hiam?” ci-in a dong uh hi.

³⁸ Tua ciangin Peter in amaute kiangah, “Na mawhna uh kisik unla, na mawhna uh hong kimaisak theih nadingin Jesuh Khrih min tawh tui kiphum ciat un. Tua hileh Pasian’ piakkhong Kha Siangtho na ngah ding uh hi.

³⁹ Bang hang hiam cih leh Pasian in ama kamciamna pen note tung, na suan na khakte uh tung le gamlapi-a om mi khempeuh, i Topa Pasian in a sap mi khempeuh tungah a hong bawl ahi hi,” ci-in a dawng hi.

⁴⁰ Tua ciangin Peter in amaute tungah thu tampi genthuahin hanthawn a, “Hih migilote’ gimthuak ding na tuahkhak loh nadingun nomau mah in na suahtak nading uh lampi zong ciat un,” a ci hi.

⁴¹ Mi tampi in ama thugen umin tui kiphum uh a, tua ni-in mihing tulthum bang kibehlap uh hi.

⁴² Amaute in sawltakte tung panin thu sinin amaute tawh kikhawl uh a, amaute tawh an nekhawmin, thu zong a ngenkhawm uh hi.

Thu Umte Lakah Nuntak Zia

⁴³ Sawltakte in lim le nalamdang tampi bawl uh a, mi khempeuh in lamdang sa mahmah uh hi.

⁴⁴ Thu um khempeuh kikhawlin omkhawm uh a, a neihsate uh zong a neikhawm uh hi.

⁴⁵ Amaute in a neih a lamteng uh zuak uh a, a sumte pen amau kisapna tawh kizui-in amaute lakah a hawm uh hi.

⁴⁶ Nisimin biakinn-ah kikhawm uh a, a innte uhah an nekhawmin, lungdamna le kiniamkhiatna tawh a ne ciat uh hi.

⁴⁷ Pasian phat uh a, khatlekhat thupha kideihsakin a om uh hi. Pasian in nisimin hotkhiatna a ngah mi kibehlapsak tawntung hi.