Jeremiah 43 - Tedim Bible

Egypt Gamah Lalna

¹ Topa Pasian in mi khempeuh kiangah a hong sawl hih thuteng ka gen khit ciangin

² Hoshaiah’ tapa Azariah le Kareah’ tapa Johanan a kipan migilo dangte khempeuh in kei kiangah, “Nang in zuau na phuak hi. Topa i Pasian in, ‘Egypt gamah a teng dingin pai kei un,’ ci-in a gen dingin nang hong sawl lo hi.

³ Neriah’ tapa Baruk in Babylon mite’ khut sungah kote hong pia nuamin, hong kithahna ding ahih kei leh Babylon-ah saltang dingin hong kilak theih nading deih ahih manin ko a hong langpang dingin nang a hong zang ahi zaw hi,” a hong ci uh hi.

⁴ Tua ahih manin Kareah’ tapa Johanan le galkapmangte khempeuh a kipan mi khempeuh in Judah gamah omsuakna ding Topa’ thugenna a mang kei uh hi.

⁵ Tua ciangin Kareah’ tapa Johanan le galkapmangte khempeuh in, a kihawlkhiatna uh gam khempeuh panin a hong ciahkik mite le Judah gamah a omlaisun teng Egypt gamah a paipih uh hi.

⁶ Papi, nupi, naupang, kumpipa’ tanute a kipan kumpi cing galkapmang Nebuzaradan in Ahikam’ tapa, Shafan’ tupa ahi Gedaliah’ kep dingin a nusiat mi khempeuh a paipih uh hi. Neriah’ tapa Baruk le kei zong a hong kipaipih hi.

⁷ Amaute in Topa’ thu mang lo uh a, Egypt gamah pai-in Tahpanhes khua dong kitung hi.

⁸ Tua ciangin Tahpanhes khua-ah Topa in kei hong hopih a,

⁹ “Suangtum gol pawlkhat la inla, Tahpanhes khua Faro kumpi inn lutna suangphah nuai-ah phum in. Na phumlam Judah mi khempeuh musak in.

¹⁰ Tua ciangin amaute kiangah, ‘Vanglian Topa, Israel mite’ Pasian in hong genin-ah: En un, keimah in ka nasempa ahi Babylon kumpipa Nebukhadnezzar ka la ding a, hih ka suang phumte tungah ama kumpi tokhom hong phut ding a, tuate tungah a kumpi puanbuk a lam ding hi.

¹¹ Amah hong pai-in Egypt gam hong simgawp ding a, pulnatna tawh a si ding mite pulnatna tawh si-in, sala mat dingte salin kimanin, namsau a si ding mite namsau tawh kithat ding uh hi.

¹² Egypt pasian-te a kibiakna biakinnte hal ding a, a pasian-te uh halin a puakhia ding hi. Tuucingte in a puan tung uha om khahte paai-in a siansak uh bangin amah in Egypt gam siangsak ding a, tua khit ciangin ngaihmuang takin a ciahkik ding hi.

¹³ Amah in Egypt gam Heliopolis khua-a mual suangte susia ding a, Egypt pasian-te a kibiakna innte mei tawh a halsak ding hi, ci hi,’ ci-in va gen in,” hong ci hi.