Jeremiah 21 - Tedim Bible

Jerusalem A Siat Ding Kigenkhol

¹ Zedekiah kumpipa in Malkhiah’ tapa Pashhur le Maaseiah’ tapa Zefaniah-te, Jeremiah kiangah sawl a,

² “Kote a dingin Topa’ kiangah thu hong dotsak in. Babylon kumpipa Nebukhadnezzar in a sim dingin hong umcih hi. Topa in a na lamdangte khat kei’ tungah hong zang leh amah kilehkiksak thei kha ding hi,” ci-in a dongsak hi.

³ Tua ciangin Jeremiah in dawngkik a,

⁴ “Zedekiah kiangah hih bangin na genkik un, ‘Topa, Israel mite’ Pasian in a genin-ah: En un, khuakulhpi pualamah a hong umcih Babylon kumpipa le Khaldea mite na dona uh ahi, na khutsung uha na kep na galhiamte uh bangmahin a kimang lo ka suaksak ding a, amaute khempeuh hih khuapi laizangah kong paipih ding hi.

⁵ Kei mahmah in hehna le thangpaihna lianpi tawh ka khut zanin, a hat mahmah ka khut tawh note kong do ding hi.

⁶ Hih khuapi sungah a tengte a mi a sa ci loin ka thatlum ding a, pulnatna tawh a bei khin ding uh hi.

⁷ Tua khit ciangin, Topa in kong cihin-ah, Judah kumpipa Zedekiah le a nasemte, le pulnatna, namsau, le kialin a si lo a nungta laiteng pen, amau’ galte le amaute a thatnuam Babylon kumpipa Nebukhadnezzar’ khut sungah ka pia ding hi. Amah in amaute namsau tawh that ding a, hehpih loin, zong a maap kei ding a, itna lungsim a nei kei ding hi,’ va ci un,” a ci hi.

⁸ Topa in Jeremiah hopih a, “Jeremiah aw, hih mite kiangah, ‘Topa in a cihin-ah: En un, na mai uhah nuntakna lampi le sihna lampi ka khung hi.

⁹ Hih khuapi sunga om mi peuhmah namsau tawh ahi a, kial tawh ahi a, pulnatna tawh ahi zongin a si ding uh hi. Ahi zongin pusuak khia-in note a hong sim Khaldea mite kiangah a lut peuhmah suakta liailiai ding uh hi.

¹⁰ Bang hang hiam cih leh Topa in kong cihin-ah, hih khuapi hoihna ding hi lo, a siatna dingin ka lungsim ka khensat khinzo hi. Babylon kumpipa’ khut sungah ka pia ding a, amah in mei tawh a hal ding hi,’ na ci ding hi.

Judah Kumpite Tungah Thupiang Dingte Genkholhna

^11-12 “Judah kumpite’ innkuan tungah hih bangin va gen in: David’ suante aw, Topa’ kammal ngai dih un. Topa in a cihin-ah: Zingsang simin mantakin thu khen unla, mi bawlsia pa’ khutsung pan a bawlsiat pa honkhia un. Tua bang na hih kei uhleh siatna na bawlnate hangun mei bangin ka hehna hong kuang ding a, kuamah in a phelhzo kei ding hi.

¹³ Mualkuam zang pan kilaamto a, zanglei lak a suangtum bangin a sangto Jerusalem aw, Topa in kong cihin-ah, na langkhatah ka pang ding hi. Nangmah in, ‘Kua in kei hong simsuk ding a, ka omna-ah kua hong lut ding ahi hiam?’ na ci hi.

¹⁴ Na gamtatna tawh kizui-in gimna ka hong pia ding hi, Topa in kong ci hi. Tulaka sing hoihte tawh a kilam na kumpi innte uh mei tawh kihal ding a, a kimkot khempeuh ka kangtumsak ding hi,” a ci hi.