Marko 11 - ONUGBÙ NYƐNYÃ VUVƆ

Yerusalɛm Tɛtsutsoku Nɛ Kabhaŋɛŋa

¹ Gɛ be bunɔ Yerusalɛm pɛ le be ku Betfage nɛ Betania nɛ Olivɛ Butu nɛa bha, Yesu akpɛ yɛ badɔkpasɛ tɛabha,

² etsre alɛ, “Nɔ vɛ ɔmabhli nɛ gɛ oli wɔnɔ otugba nɛ mɛ, onu gɛ no tsoku ɔlɛ mɛ ko, nɔ bɔ mɔ Kitukuagaeyi teli nɛ ohwi mɛ, gɛ anɔnyanɔ aka za yɛa bha edi, no bule yɛ tɛ nɔ yɛkɔ mɛna ɔkɛ̃.

³ Onu gɛ anɔ teli ebisi wɔnɔ sɛ ‘Kidee pɛ nɔɔ bhɛtɛ ana?’ No tsre yɛ ɔsɛ, ‘Apalete nɛ ya pɛɛ yɛ, klɛ le be tsodzinɛ yɛ amɛna nɛ kibe kplitaa mɛ.’ ”

⁴ Ba vɛ bada mɔ kitukuagaeyi nɛ kidzo nu tɔ, gɛ ba kpaka nɛ kedunu. Kibe lɛ gɛ be bule yɛ nɛ,

⁵ banɔ teli gɛ be li ɔkɛlɛ nee bisi asɛ, “Kide nɔɔ bhɛtɛ, pɛ noo bule kitukuagaeyi nɛ?”

⁶ Be bu ishu nu ansɛ gɛ Yesu etsre alɛ sɛ ba ɖɔ, klɛ banɔ na kɔ balɛ kidzo klɛ ba shɛ.

⁷ Gɛ ba yɛkɔ kitukuagaeyi nɛ amɛna Yesu pɛ ba yɛkɔ balɛ bawidzidze nɛ atrɔ yɛa bha beke, Yesu ewoku yɛa bha.

⁸ Banɔ gelee be bule balɛ bawidzidze nɛ elu kidzo nɛa bha, klɛ beteli ba yɛkɔ awɔlakpa gɛ be dzyini edenɔ ayakpa mɛ nɛ elu kesi akɔ yɛ.

⁹ Ba gɛ be putɔ nɛ bagɛ balɛ yɛe de naa kpɛ igugu asɛ, “Hosiana!” “Ba yula anɔ nɛ gɛ aaba nɛ Apalete nɛ kinyi mɛ!”

¹⁰ “Bayula bulɔ aka Daviti bukusiŋɛŋa nɛ gɛ buba ba!” “Hosiana nɛ Ɔɖɛɖamakɔdɛ!”

¹¹ Yesu eku Yerusalɛm klɛ avɛ Kpayavu nɛ mɛ. Elu awɔ̃ edi kɛdɔnyɛdɔ, pɔ gɛ keli kefli bele so, ekoeyi nɛ yɛ banɔkpɛkpɛ lɔfɔntɛabha nɛ avɛ Betani.

Yesu Akɛka Badɔdɛ Nɛ Ebu Nɛ Busɔlɛvu Nɛm

¹² Kelizɛza nɛ gɛ baa shɛ nɛ Betani nɛ, Bubhɛ baa yi Yesu.

¹³ Amɔ kabhɔ nɛ kalɛ awulakpa teli asɛsɛ nɛ odzidzekɔ, avɛ asɛ tɛ ede di asɛ eyuyu teli akpasɛ ɔlɛ mɛ dza. Gɛ eku ɔlɛ ɔbha nɛ, awulakpa ko amɔ, alasɛ kibee lɛ nɛ dɛ nu osi nɛ kiyu be.

¹⁴ Klɛ etsre osi na sɛ, “Anɔnyanɔ atɛa ŋa wɔ eyuyu denɔ ɔtsɔ̃ nɛ ɔyɛkɔ vɛ nɔ.” Klɛ yɛ badɔkpasɛ nɛ be nu kibui nɛ gɛ aɖɔ.

¹⁵ Gɛ be de ku Yerusalɛm nɛɛ, Yesu etsoku busɔlɛvu buka nɛ mɛ, klɛ akpa bagɛ aba dɛ kɛdɔ anɛ bagɛ bee dzi dɔ nɛ ɔkɛlɛ. Etsyina bagɛ balɛ atsrakɛ ehoeyi nɛ baa kplɔ̃ nɛ ekumu, anɛ bagɛ bala dɛ bagɔgɔwi nɛ bugbu dzidze petee ekumu.

¹⁶ Adɛ kɔ kidzo sɛ anɔnyanɔ aflanɔ kɛdɔ dɛdɛ kanyaka nɛ busɔlɛvu buka nɛ mɛ.

¹⁷ Gɛ aakasɛ balɛ kɛdɔ, aɖɔ asɛ, “Sɛ ba ŋlɔmɛ elu asɛ, “ ‘Bee klu mɛ bupa nɛ asɛ amadi nɛ petee kpaya oklukɔ?’ Pɔ nɔ yɛkɔ ɔklɛ ɔbhɛtɛ ‘bezi ɔzakɔ.’ ”

¹⁸ Gɛ Kpayaɔzakɔanɔ anɛ eshãdɔkasɛ nɛ be nu ana, ba kpa kidzo pɛ nɛ yɛ shu kɔ tiyiyi, alasɛ bee si yɛ kifu, alasɛ yɛ kɛdɔ kɛkasɛ nɛ yinɔ banɔɛza nɛ petee.

¹⁹ Gɛ owulago nɛ ɔna, be koeyi nɛ ɔmagbla nɛ mɛ.

Kabhɔ Tsitsi

²⁰ Nɛ kɛvulɔ nɛ mɛ, gɛ baa fla nɛ, ba mɔ kabhɔ nɛ gɛ ketsi denɔ kalɛ igu nɛ mɛ.

²¹ Petro abaka klɛ etsre Yesu asɛ, “Adɔkasɛ, di! Kabhɔ nɛ gɛ ɔɖɔɛbuiɔkpɛ nɛ ke tsi!”

²² Yesu aɖɔ sɛ, “Yɛkɛ Kpaya kabha ɔŋa.”

²³ “Itsre nɔ kibuigba sɛ, onu gɛ anɔ teli ebe tsre butu nɛ asɛ, ‘Vɛ tɛ ɔdɔ tɛɛku aƒu mɛ,’ klɛ ɔyɛkɛ ɔŋa nɛ idzyim sɛ kɛ gɛ aɖɔ nɛ kɛ ba bhɛtɛ nɛ, kɛ ba ba klɛ mɛ kɔ wɔ.

²⁴ Klɛso nɛ itsre wɔnɔ sɛ, kɛdɔnyɛdɔ gɛ wɔ anɔ obo klu Kpaya obisi nɛ, yɛkɛ ɔŋa sɛ ɔtɛ yɛkɛ kɛlɛ, klɛ kɛba dzi wɔɛ yɛ.

²⁵ So, onu gɛ oli pɛ oklukpaya, pɛ anɔ teli kibui zizi kpasɛ wɔ ishu mɛ, yɛ kɔ otsye yɛ, tɛ wɔ aka nɛ owũsise tsyɛ ayɛkɔ wɔ buzizi nɛ etsye wɔ.”

²⁶ [Pɔ onu gɛ nɔ dɛ yɛkɔ otsye, klɛ wɔnɔ aka nɛ owũsise tsyɛ atɛ ba yɛkɔ wɔnɔ buzizi nɛ etsye nɔ.]

Yesu Kabhaŋɛŋa Nɛ Shu Ebui Bibisi

²⁷ Be ze be ku Yerusalɛm, klɛ gɛ Yesu aaga nɛ busɔlɛvu buka nɛ mɛ, kpayaɔzakɔanɔ anɛ ɛshãdɔkasɛ anɛ beshishe ba ga ebunɔ yɛ.

²⁸ Be bisi Yesu asɛ, “Kabhaŋɛŋa ɖuweɖu mɛ ɔyɛkɔ bhɛtɛ ebui anɛ?” “Klɛ anee yakɔ wɔ kabhaŋɛŋa nɛ asɛ tɛ ɔbhɛtɛ ebui anɛ?”

²⁹ Yesu ebu aɖɔ sɛ, “Ɛba bisi wɔnɔ kibui tirikpo. Nó bui lɛ nu ɔkɔ mɛ, klɛ ɛba tsre wɔnɔ ɔkɛlɛ gɛ idenɔ kabhaŋɛŋa pɛ ɛbhɛtɛ ebuia nɛ petee.

³⁰ Yohanɛsɛ bunikpɛkpɛ nɛ, owũsise bu de pɛnɔɔ banɔdzyrame ɔkɔ? Nɔ tsre mɛ!”

³¹ Ba nyɛna kibui nɛ aglɔm klɛ laa ɖɔ asɛ, “Bu ɖɔ sɛ, ‘Kpaya ɔkɔ nɛɛ,’ ebe bisi asɛ, ‘Kɛlɛ kide so pɛ bu dɛ yɛkɛ yɛ kabha ŋa?’

³² Pɔ onu gɛ buɖɔ sɛ, ‘Kide banɔdzyrame ɔkɔ’....” (Bee si banɔ, alasɛ anɔnyanɔ ayɛkɛ aŋa sɛ Yohanɛsɛ nɛ atɔnu yɛ edzi.)

³³ So bebu klɛ nu akɔ Yesu asɛ, “Bu tinyi.” Yesu asɛ, “Mɛ tsyɛ ɛtɛ ba tsre wɔnɔ ɔkɔ nɔɔ nɛ gɛ idenɔ mɛ kabhaŋɛŋa nɛ gɛ ɛyɛkɔ bhɛtɛ ebui nɛ nɔ.”