1 Kɔrintioanɛ 15 - ONUGBÙ NYƐNYÃ VUVƆ

Kristo Tɛnyɛnyɛmɛ Denɔ Bekpumɛ

¹ Ɔtsɔnɛ epɛɛ sɛ tɛ ɛbakanɔ kibui dzyɔgo gɛ ɛba ɖɔ kɔ nɔ, gɛ nɔ yɛkɛ klɛ kɛlɛ abha nɔ tsri.

² Ganɔ kibui dzyɔgo nɛabha be bhuinɔayɛkɛ, onugɛ nɔnyɛna gɛganɛ kibui dzyɔgo nɛ gɛ ɛɖɔ tsre nɔ. Odunusɛ, wunɔ kabhaŋɛŋa kɛdinu kɛdɔ dzyɔgo.

³ Alasɛ kɛgɛ ɛyɛkɛ ɛshɛnahwɛ kɛ lɛ shu kɔ nɔ anasɛ kɛ tɛtɔpu gɛ kɛŋaedzi, sɛ Kristo etsi nɛ bulɔɛ tɔkpu nɛ Kpayaeplukpa nɛ nu,

⁴ sɛ ba vubɔ yɛ, sɛ ba nyɛmɛ yɛ nɛ kiwui kɛtramɛ nɛabha nɛ Kpayaeplukpa nɛ nu,

⁵ klɛ sɛ ebu shu akasɛ Petro, kɛlɛede kɔ kɛfɔnɛ tɛabha.

⁶ Nɛ kɛlɛede, ebu shu akasɛ banɔ gɛ baza yɛede, bekpe adɛ kɛfɔɛfɔ ɛzakɔ titi nɛ kibe trikpo mɛ gɛ be teli aka lɛ nɛ kpã, kɛlɛlɛmɛ sɛ be teli ti tsi.

⁷ Kɛlɛede ebu shu akasɛ Yakobo, kɛlɛede kɔ yɛ banɔkpɛkpɛ petee,

⁸ klɛ gɔgɔɛ nɛ petee ebu shu akasɛ mɛ tsyɛ, anasɛ kɔ agɛ yɛ ewui la dɛna flogo gɛ bamɔ.

⁹ Alasɛ mɛ nu agugɔɛ nɛ banɔkpɛkpɛ nɛ shi klɛ amasɛ tɛ be klu mɛ sɛ anɔkpɛkpɛ, alasɛ epɛɛ buzizi kɔ Kpaya busɔlɛha.

¹⁰ Pɔ nɛ Kpaya ɛyɛmɛyuyɔ enu agɛ enu, klɛ yɛ ɛyɛmɛyuyɔ kɔ mɛ kɛdi dzi kɛkpɛkpa. Oo, ɛwa kɛxwɛ dɛ balɛ petee—ganɛ mɛ nahwɛ, pɔ Kpaya ɛyɛmɛyuyɔ kɛlɛ za plɛnɔ mɛ.

¹¹ Kɛbadzi, nɛlɛede, kɛ nu sɛ mɛ, pɛnɔ balɛ, kɛnɛ nɛko bulɔ petee bu ɖɔ, klɛ kɛnɛ kɔɛlɛ nɔ yɛkɛŋa.

Banɔtsitsi Tɛnyɛnyɛmɛ

¹² Pɔ onugɛ baɖɔ sɛ ba nyɛmɛ Kristo denɔ bekpui mɛ, kɛlalɛ kideso gɛ wunɔ be teli nɔ ɖɔ sɛ be tsitsi nyɛnyɛmɛ denɔ bekpuimɛ ma?

¹³ Onugɛ tɛnyɛnyɛmɛ ma kɔ be tsitsi, kɛlalɛ Kristo tsyɛ ba dɛ nyɛmɛ yɛ.

¹⁴ Klɛ onugɛ ba dɛ nyɛmɛ Kristo, bulɔ Kpayɛbui ɖɛɖɔ dɛ nu kɛdɔnyɛdɔ klɛ kana wunɔ tɛyɛyɛkɛŋa tsyɛ.

¹⁵ Ɔyɛkɔ dɛa na, ba ba mɔ lɔ asɛ bu nu otro bebuimɔɖɔ denɔ Kpaya shu, alasɛ bu tɛ bu ɖɔ denɔ Kpaya shu sɛ anyɛmɛ Kristo denɔ bekpu mɛ. Pɔ adɛ nyɛmɛ yɛ onu gɛ ki nu kɛgbɛagba sɛ ba taa nyɛmɛ be tsitsi.

¹⁶ Alasɛ onugɛ ba dɛ nyɛmɛ be tsitsi, kɛlɛalɛ ba dɛ nyɛmɛ Kristo tsyɛ.

¹⁷ Klɛ onugɛ ba dɛ nyɛmɛ Kristo, wunɔ tɛyɛyɛkɛŋa ma, nɔ kɔ lɛ wunɔ buizizi nɛ mɛ.

¹⁸ Kɛlalɛ ba gɛ ba lɛ tsyɛ be tsi nɛ Kristo mɛ ba lɛla.

¹⁹ Onugɛ kanɔa nɛ mɛ ko budi dzo kɔ Kristo, alasɛ tɛ be di lɔ eshutukubui dɛ banɔ pete.

²⁰ Pɔ kɛgbɛagba lɛ nu sɛ ba nyɛmɛ Kristo denɔ bekpuimɛ, eyuyu tɛtɔpu kɔ ba gɛ be tsi.

²¹ Alasɛ denɔ kibelɛlɛ nɛ gɛ butsi ba ganɔ anɔ abha, be tsitsi tɛnyɛnyɛmɛ tsyɛ ba denɔ anɔ abha.

²² Alasɛ anasɛ nɛ Aɖam mɛ banɔ petee bɛ tsi, kanake nɛ Kristo mɛ banɔ petee ba ba bhɛtɛ alɛ ba mɔ ɛkpã

²³ Pɔ anɔnyanɔ nɛ yɛ kibe, Kristo eyuyu tɛtɔpu, kɛlɛede, kibenɔ nɛ gɛ aba ba, aba gbanɔ ba gɛ benu yɛ ayalɛ.

²⁴ Nɛlɛede kanɔ tɛbɛbekɛ ba ba, kibenɔ nɛ gɛ ashɛnahwɛ bukusiɔŋakɔ nɛ akɔ Kpaya Aka kɛlɛede gɛ ezi kabhaŋɛŋa ɛfufɔɛ kabhaŋɛŋa nɛ bupu.

²⁵ Alasɛ tɛ aza ŋaɛabha ɔdɔtɔnɔ kibenɔ nɛ gɛ ayɛkɔ ba gɛ be gu yɛ petee akpɛ yɛ butsrɛ esi.

²⁶ Agugɔɛ gɛ adɛ pɛɛ yɛ bui gɛ ebe yii yɛ nu butsi.

²⁷ Alasɛ yɛ “ayɛkɔ kɛdɛnyɛdɔ akpɛ yɛ bu tsrɛ esi.” Ɔtsɔ̃nɛ kibenɛ gɛ kɛ ɖɔ sɛ “kɛdɔnyɛdɔ” akpɛ yɛ esi, kɛlɛmɛ bhui sɛ kɛnɛ kɛ dɛ klu Kpaya nahwɛ akpɛ, agɛ yɛ ayɛkɔ kɛdɔnyɛdɔ akpɛ Kristo ahwɛ.

²⁸ Kibelɛlɛ gɛ abhɛtɛ ebuianɛ beke, ɔkɛlɛ Eyi nahwɛ ba ba yɛkɔ yɛ shu akpɛ agɛ ayɛkɔ kɛdɔnyɛdɔ akpɛ yɛ esi, sɛ tɛ Kpaya ebe dzi yɛ petee nɛ kɛlɛ petee mɛ.

²⁹ Ɔtsɔnɛ onugɛ tɛnyɛnyɛmɛ denɔ bekpuimɛ ma, kide ba lɛlɛ nɛ ba babhɛtɛ be tsitsi gɛ bakpɛ buni kɔ? Onugɛ ba dɛ nyɛmɛ be tsitsi nɛ kura, kideso gɛ ba kpɛ buni kɔ alɛ?

³⁰ Klɛ anasɛ kɔ bulɔ, kideso gɛ kibenyɛbe bu kpɛ ishu tɔ?

³¹ Ɛtsi kiwuinyɛwui—Kana mɛ ɛɖɔ—anasɛ kɛgbɛagba kabhaŋɛŋa lɛ ma hwɛ nɛ Kristo Yesu bulɔ Apalete mɛ.

³² Onugɛ ɛgɔnɛ nɛ agavuga nɛ Efeso nɛ anɔdzyrame kibui nu so, kide mɛ mɔ nɛ kɛlɛ mɛ? Onugɛ ba dɛ nyɛmɛ be tsitsi, “Nɔ kɔlɔ ŋa tɛ bu wɔɛ̃ dɔ, alasɛ kivu bu ba tsi.”

³³ Nɔ tɛ kɔ la wɔɛ nɔ: “Ɔhazizi kpɛkpɛ lɔ zi ɛkpã dzyɔgo.”

³⁴ Nɔ tsodzi ɔvɛ ishui mɛ tɛ nɔ zukɔlɔ ebui kpã bhɛbhɛtɛ, alasɛ beteli alɛ gɛ be tinyi Kpaya—ɛɖɔ kibui nɛ kɔ nɔ tɛ kwɔ̃ɛ ku nɔ.

Ishuidzya Nyɛnyɛmɛ

³⁵ Pɔ anɔ teli ebe bisi asɛ, “Kɛlɛ la nyɛmɛ be tsitsi? Ishuidzya ɖuweɖu di ɛlɛ ba ba yɛkɔ mɛna?”

³⁶ Agã wɔ nu! Kɛdɔ gɛ ɔɖa kɛ tɛ ba yi ɔdɔgɔsɛ kɛ tsi.

³⁷ Kibenɔ nɛ gɛ ɔɖaɛdɔ, ɔtɛ ɖa kɛlɛ osi gɛ lɔ bɔ pɛ̃ pɔ kiyi, kɛbadzi kinikpeyi pɛnɔ kɛdɔ bhlatɔ kiyi.

³⁸ Pɔ Kpaya akɔ lɛ shupi anasɛ gɛ apɛɛ, klɛ kɔ kiyi nyɛyi nɛ kɛlɛ nahwɛ ishupi.

³⁹ Ishuidzya petee lɛ dɛ nu tirikpo: Banɔ kɛdzya tirikpo ɛdi kɛlɛ lɛ balɛ ahwɛ, baga kɛ bhlatɔ kɛlɛ lɛ alɛ ahwɛ, buzhuɔɛ yɛ bu bhlatɔ klɛ kɛnimɛdzya bu bhlatɔ.

⁴⁰ Owũsise dɔ shuidzya tsyɛ lɛ klɛ kesukpaɛ dɔ yɛ tsyɛ lɛ, pɔ owũsise nɛ mɛ dɔ tɛpupudi nɛ nu tili di, klɛ kesukpɛa nɛa bha dɔ nɛ tɛpupudi tsyɛ ka nu tili di.

⁴¹ Kiwui tɛtɛtã kɛpudi gɛ kɛ gatɔ, wele tɛtɛtã pudi gatɔ, klɛ awuwɔɛ̃ alɛ tɛ pupudi gatɔ nɛ aglɔ shu.

⁴² Kɛlɛ so kanake kɛ baza kɔ betsitsi nɛ tɛlɛlɔ denɔ bekpui mɛ. Ishuidzya gɛ ba vubɔ kɛ nu kɛdɔ tsɛtsɔmɔ, pɔ ba nyɛmɛ alɛ matsɔmɔ matsɔmɔ,

⁴³ Ba vubɔ yɛ nɛ kedzi maŋamaŋa, ba nyɛmɛ yɛ nɛ̀ kabhaŋɛŋa, ba vubɔ yɛ nɛ̀ tɛgbugblɔdzɔ mɛ, ba nyɛmɛ yɛ nɛ bupu,

⁴⁴ bavubɔɛ nɛ yɛ tɛmumɔ shuidzya mɛ, ba nyɛmɛ yɛ nɛ̀ ɔfufɔɛ shuidzya. Onugɛ tɛmumɔ shuidzya lɛ, ɔfufɔɛ tsyɛ shuidzya lɛ.

⁴⁵ Kɛlɛso baŋlɔmɛ elu asɛ: “Anɔ tɛtɔpu Aɖam ebedzi ɛkpã anɔ” agɔgɔɛ Aɖam ɛkpã kukɔ ɔfufɔɛ.

⁴⁶ Ɔfufɔɛmɛ ayɛ nɛ edi putɔ aba, pɔ kanɔmtɛzɛza ayɛ, klɛ kɛlɛede flogo pɛ ɔfufɔɛmɛ yɛ nɛ aba.

⁴⁷ Anɔ tɛtɔpu kesukpaɛ tisi kɛlɛ ba yɛkɔ abhɔ yɛ nɔ, anɔ bhla ede owũsise.

⁴⁸ Anasɛ gɛ dzi kɛsukpaɛabha banɔ, so balɛ nu bagɛ alɛ kɛsukpa nɛ mɛ, klɛ anasɛ banɔ nɛ gɛ be de owũsise, so balɛ tsyɛ be dzi bagɛ be nu owũsise yɛ ayalɛ

⁴⁹ Klɛ anasɛ gɛ bamɔ lɔ gɛ bu yi kɛsukpaɛmɛ anɔ, so nɔ kɔ lɔ dzi owũsise mɛ banɔ.

⁵⁰ Ɛbu tsre nɔ, badzya mɔ, sɛ ishuidzya anɛ dzyosu ba tɛ ba ŋa Kpaya bukusiɔŋakɔ, ɔdɔgɔsɛ kɛgɛ ba zi nɛ ba ŋa kɛgɛ tɛ ba zi.

⁵¹ Nɔ tatɔ, itsre nɔ kibui kpukpui nɛ: Bulɔ petee butɛba tsi, pɔ ba be tysina lɔ tɛzɛzɛ mɛ—

⁵² nɛ bulɔ amɛ futsitse, awɔ̃hu dɛda terikpo mɛ, nɛ kaxũlɛ̃ gɔgɔɛ bubɔɛ mɛ. Alasɛ kaxũlɛ nɛ kebe yi, ba ba nyɛmɛ be tsitsi matsɔmɔ matsɔmɔ, klɛ ba be tsyina bulɔ tɛzɛzaɛ mɛ.

⁵³ Alasɛ kɛ tsɛtsɔmɔ nahwɛ ba nyumu kɛ matsɔmɔ matsɔmɔ, klɛ kɛtsitsi tɛ ba dzi kɛ matsimatsi.

⁵⁴ Kibenɔ nɛ gɛ kɛ tsɛtsɔmɔ ba nyumu kɛ matsɔmɔ matsɔmɔ klɛ kɛ tsitsi ba dzi kɛ matsimatsi, kɛlɛede kibui ɖɛɖɔ gɛ ba ŋlɔmɛ elu kɛ ba badzi kɛgbɛagba: “Kabhaŋɛŋa munɔ bu tsi,”

⁵⁵ “O butsi, fakɔ wɔ kabhaŋɛŋa na lɛ? O butsi, fakɔ wɔ ɔtato nɛ lɛ?”

⁵⁶ Butsi ɔtato nɛ nu kizizi, klɛ bupu kɔ kizizi nu ɔshã.

⁵⁷ Pɔ ahwɛhuhu alɛ nu Kpaya ayɛ! Yɛ akɔ lɔ kabhaŋɛŋa aganɔ bulɔ Apalete Yesu Kristo abha.

⁵⁸ Kɛlɛso, mɛ badzya mumɔa, nɔ za nɛ awɔ̃ gɛganɛ. Nɔ tɛkɔ kɛdɛnyɛdɔ ge nɔ. Kibenyɛbe nɔ yɛkɔ wunɔ ishu kɔ bui bhɛbhɛtɛ kɔ Apalete nɛ kɛxwɛ, alasɛ nɔ nyi sɛ wɔnɔ kɛxwɛwɛwa anɛ́ Apalete nɛ mɛ kɛtɛ ba dzi kɛkpɛkpa.