Wiyaegü 82 - Tupanaarü Ore

Ãẽ̱xgacügü i guxchaxü̃arü mexẽxẽruü̃étüwa nangẽxma ya Tupana

¹ Rü Tupana ãẽ̱xgacü íyixĩxü̃wa i daxũguxü̃ i naanewa rü inachi nax poxcu namaxã naxueguxü̃ca̱x i ngẽma ãẽ̱xgacügü i guxchaxü̃arü mexẽẽruü̃gü i chixri norü duü̃xü̃gümaxã icua̱xgüxü̃. Rü ñanagürü:

² —¿Ñuxguratáta i nüxü̃ perüchauxü̃ nax chixri duü̃xü̃gümaxã ipecuáxü̃ rü ngẽma chixri maxẽxü̃étüwaama nax pexügüxü̃?

³ Rü dücax, rü name nixĩ i nüxü̃ perüngü̃xẽẽgüxü̃ i ngẽma duü̃xü̃gü i taxucürüwa nügü ípoxü̃güxü̃ rü ngẽma taxcutagü. ¡Rü ẽcü nüxü̃ perüngü̃xẽxẽ i ngẽma ngearü diẽruã̱xgüxü̃ rü ngẽma nüxü̃́ nataxuxü̃ i norü ngẽmaxü̃gü!

⁴ ¡Rü ngẽma chixexü̃ i duü̃xü̃güme̱xẽwa ípenanguxü̃xẽxẽ i ngẽma taxucürüwama nügü ípoxü̃güxü̃ rü ngẽma ngearü diẽruã̱xgüxü̃!

⁵ Natürü i pemax, Pa Ãẽ̱xgacügüx, rü tama peãẽxü̃ pecua̱x rü peechitamare pemaxẽ. Rü ngẽmaca̱x nangẽxma i taxü̃ i chixexü̃ i petanüwa rü ngẽma duü̃xü̃gü i namaxã pecuáxü̃ rü pemaxã nanue.

⁶ Rü choma rü marü pexü̃ chaxuxgu rü tupanagü pixĩgü erü chauxacügü pixĩgü i choma nax Guxãétüwa Changexmaxü̃.

⁷ Natürü i pema rü guxü̃ i duü̃xü̃gürüxü̃ tá peyue. Rü ngexü̃rüüxü̃ i ãẽ̱xgacü i chixri norü duü̃xü̃gümaxã icuáxü̃rüü̃ãcü tá peyue —ñanagürü ya Tupana.

⁸ Pa Tupanax ¡ẽcü inachi rü nüxna naca i norü chixexü̃chiga i ñoma i naanecüã̱xgü i ãẽ̱xgacügü! Erü cuma nixĩ i norü yora quixĩxü̃ i guxü̃ma i nachixü̃anegü.