Wiyaegü 54 - Tupanaarü Ore

Yumüxẽ i nawa Tupanaarü ngü̃xẽxẽca̱x íca̱xaxü̃

¹ Pa Tupanax ¡cumatama choxü̃ ínanguxuchixẽxẽ naxme̱xwa i chorü uanügü! ¡Rü choxü̃ ínapoxü̃ namaxã i curü pora!

² Pa Tupanax ¡choxü̃́ nüxü̃ naxĩnü i chorü yumüxẽ rü ẽcü irüxĩnü i chorü dexa!

³ Erü duü̃xü̃gü i to i nachixü̃anecüã̱x chauxca̱x ínayaxüãchi rü ngẽma máxwa̱xegüxü̃ rü choxü̃ nima̱xgüchaü̃. Rü ngẽma duü̃xü̃gü rü tama cuxü̃ namuü̃e, Pa Tupanax.

⁴ Natürü nüma ya Cori ya Tupana rü chorü ngü̃xẽẽruxü̃ nixĩ. Rü nüma nixĩ i choxna nadauxü̃ nax tama chayuxü̃ca̱x.

⁵ Rü nüma ya Tupana rü tá naxca̱x nanatáeguxẽxẽ i ngẽma chixexü̃ i chorü uanügü chauxca̱x nagu rüxĩnüexü̃. Pa Tupanax, cuma rü aixcümacü quixĩ, rü ngẽmaca̱x chanaxwa̱xe nax icuyanaxoxẽẽxü̃ i ngẽma chorü uanügü.

⁶ Rü choma rü chorü ngúchaü̃maxã tá cuxna chanaxã i chorü ãmare i cuxca̱x chiguxü̃. Rü tá cuxü̃ chicua̱xüxü̃ erü cuma rü cumecümaxü̃chi.

⁷ Rü cuma rü choxü̃ ícunguxuchixẽxẽ nawa i guxü̃ma i chorü guxchaxü̃gü. Rü chauxetümaxã nüxü̃ chadau nax chorü uanügüxü̃ curüporamaexü̃.