Yema Cuáü̃ nüxü̃ dauxü̃ i yixcüra tá ngupetüxü̃chiga 11 - Tupanaarü Ore

Taxre ga orearü uruü̃chiga

¹ Rü yemawena choxna nanaxã ga wüxi ga dexnemena̱xã ga ngugüruxü̃ ixĩxü̃ne. Rü gumá choxna naxacü rü ñanagürü choxü̃: “¡Inachi rü nangugü ya yima Tupanapata ya taxü̃ne rü ngẽma ãmarearü guruxü̃! ¡Rü yaxugü rü ñuxre yixĩxü̃ i ngẽma duü̃xü̃gü i ngéma Tupanaxü̃ icua̱xüü̃güxü̃!

² ¡Natürü ngẽma naa̱xtü ya Tupanapata ya taxü̃ne, rü taxũtáma cunangugü! Erü ngẽma duü̃xü̃gü i tama Tupanaaxü̃́ yaxõgüxü̃na marü nanaxã. Rü nümagü rü 42 ya tauemacü tá chixri namaxã inacua̱x ya yimá ĩane ya üünene.

³ Rü choma rü tá chanamu i taxre i chorü orearü uruü̃gü i témüxü̃maxã ixãxchiruxü̃ nax 1,260 i ngunexü̃ duü̃xü̃gümaxã nüxü̃ yaxugüxü̃ca̱x i chorü ore”, ñanagürü choxü̃.

⁴ Rü ngẽma taxre i orearü uruü̃gü nixĩ i norü cua̱xruxü̃ i ngẽma taxre i nanetü i oribugü rü ngẽma taxre i omüarü üruü̃gü i tórü Cori ya ñoma i naanearü yora ixĩcüpe̱xewa ngẽxmagüxü̃.

⁵ Rü ngẽxguma texé chixexü̃ nape̱xewa ügüchaü̃gu i ngẽma taxre i orearü uruü̃gü, rü nümagü rü üxüema ya naã̱xwa ínacuexechinemaxã tüxü̃ tá ínagu. Rü ngẽmaãcü tá inayanaxoxẽxẽ i norü uanügü. Rü ngẽmaãcü tá tüxü̃ nadai ya yíxema chixexü̃ namaxã ügüchaü̃xẽ.

⁶ Rü ngẽma taxre i orearü uruü̃gü rü nüxü̃́ nangẽxma i pora nax íyachaxãchixü̃ca̱x ya pucü nax tama napuxü̃ca̱x i guxü̃ma i ngẽma 1,260 i ngunexü̃gü i nagu Tupanaarü orexü̃ yaxugüxü̃. Rü ngẽxgumarüxü̃ ta nüxü̃́ nangẽxma i pora nax nagüxü̃ yaxĩxẽẽgüãxü̃ca̱x i dexá. Rü ngẽxgumarüxü̃ ta nüxü̃́ nangẽxma i pora nax ñoma i naanewa namugüãxü̃ca̱x i naguxü̃raü̃xü̃ i guxchaxü̃gü nax ngẽmaãcü ngúxü̃ duü̃xü̃güxü̃ yangexẽẽgüxü̃ca̱x i ngẽxguma ngẽma taxre naxwa̱xegügu.

⁷ Natürü ngẽxguma ngẽma taxre i orearü uruü̃gü nagu̱xẽẽgügu nax nüxü̃ yaxugüxü̃ i Tupanaarü ore, rü ngẽma ngo̱xo i ngẽma ãxmaxü̃ i taguma iyacuáxü̃wa ixũxũxü̃, rü tá ngẽma taxrena nayuxu. Rü tá ngẽma taxrexü̃ narüyexera, rü tá nanadai.

⁸ Rü ngẽma naxü̃negü i ngẽma taxre rü tá yima ĩane ga tórü Cori nawa curuchawa ipotane ya Yerucharéü̃arü plazawa nawogü. Rü yima ĩane rü nachixe rü ngẽmaca̱x Chodómaarü ĩanemaxã rü Equítuanemaxã nanaxugü.

⁹ Rü tomaepü̱x i ngunexü̃arü ngãxü̃ rü naguxü̃raü̃xü̃ i ĩanegücüã̱x, rü naguxü̃raü̃xü̃ i duü̃xü̃gütücumü, rü naguxü̃raü̃xü̃ i duü̃xü̃gü i to i nagawa idexagüxü̃, rü naguxü̃raü̃xü̃ i nachixü̃anecüã̱x rü tá nüxü̃ nadaugü i naxü̃negü. Rü taxũtáma nanaxwa̱xegü nax texé inata̱xgüxü̃.

¹⁰ Rü ngẽma duü̃xü̃gü i ñoma i naanewa maxẽxü̃ rü tá nataãẽgü nax marü nayuexü̃ i ngẽma taxre. Rü ngẽma nax poraãcü nataãẽgüxü̃ rü tá nügüna ãmare naxãgü, yerü yema taxre ga orearü uruü̃gü rü poraãcü naãxẽwa nananguxẽẽgü.

¹¹ Natürü yema tomaepü̱x ga ngunexü̃arü ngãxü̃guwena, rü Tupana wenaxarü nanamaxẽxẽxẽ ga yema taxre. Rü wenaxarü ínarüdagü. Rü guxü̃ma ga yema duü̃xü̃gü ga nüxü̃ daugüxü̃ rü poraãcü namuü̃e.

¹² Rü ñu̱xũchi ga yema taxre ga orearü uruü̃gü, rü nüxü̃ naxĩnüe ga wüxi ga naga ga tagaãcü daxũguxü̃ ga naanewa inaxũxü̃ ga ñaxü̃: “¡Nua daxũwa pexĩ!” ñaxü̃. Rü yemaacü ga nümagü rü wüxi ga caixanexü̃gu daxũguxü̃ ga naanewa naxĩ. Rü norü uanügü rü yéma nüxü̃ narüdaunü.

¹³ Rü yexgumatama poraãcü naxĩã̱xãchiane. Rü wüxi ga yema norü 10 arü üye ga guma ĩane, rü niwa̱xgü. Rü 7,000 ga duü̃xü̃gü nayue namaxã ga yema ĩã̱xãchiane. Rü yema togü ga duü̃xü̃gü ga maxẽxü̃ rü poraãcüxüchi namuü̃e. Rü Tupana ya daxũguxü̃ i naanewa ngẽxmacüxü̃ nicua̱xüü̃gü.

¹⁴ Rü yexma nayacua̱x ga yema norü taxre ga poxcu. Natürü paxa tá ínangu i ngẽma norü tomaepü̱x i poxcu.

Gumá norü 7 ga cornéta

¹⁵ Rü yema norü 7 ga Tupanaarü orearü ngeruxü̃, rü nayacue ga norü cornéta. Rü nayexma ga nagagü ga tagaxü̃ ga daxũguxü̃ ga naanewa inaxũgüxü̃ ga ñagüxü̃: “Ñu̱xma rü tórü Cori ya Tupana rü Nane ya Cristu nixĩ i namaxã icua̱xgücü i guxü̃ma i ñoma i naane. Rü nümagü rü guxü̃gutáma namaxã inacua̱xgü”, ñagüxü̃.

¹⁶ Rü nümagü ga yema 24 ga ãẽ̱xgacügü ga norü tochicaxü̃güwa rütogüxü̃ ga Tupanape̱xewa, rü yexma nanangücuchitanü, rü Tupanaxü̃ nicua̱xüü̃gü.

¹⁷ Rü ñanagürügü: “Pa Torü Cori ya Tupana ya Guxü̃étüwa Ngẽxmacüx, cuma rü woetama guxü̃guma cuyexma rü guxü̃gutáma cungexmaecha. Rü moxẽ cuxna taxãgü, erü marü cugüme̱xẽwa cunangexmaxẽxẽ i guxü̃ma, rü marü icunaxügü nax namaxã icucuáxü̃.

¹⁸ Rü ngẽma duü̃xü̃gü i tama cuxrü ixĩgüxü̃ rü poraãcü nanue, natürü nawa nangu i ngẽma ngunexü̃ i nagu tá cunapoxcuexü̃. Rü marü nawa nangu nax nüxü̃ quicagüxü̃ i guxü̃ma i duü̃xü̃gü i yuexü̃. Rü marü nawa nangu nax nüxü̃́ cunaxütanüxü̃ i ngẽma curü duü̃xü̃gü i curü orearü uruü̃gü, rü ngẽma cupe̱xewa imexü̃, rü guxü̃ma i ngẽma cuxü̃ muü̃exü̃ i yaexü̃ rü buexü̃. Rü marü nawa nangu nax icuyanaxoxẽẽxü̃ i ngẽma duü̃xü̃gü i nachixexẽẽxü̃ i ñoma i naane”, ñanagürügü.

¹⁹ Rü ñu̱xũchi Tupanapata ga taxü̃ne ga daxũguxü̃ ga naanewa yexmane, rü niwãxna. Rü yéma norü aixepewa nango̱x ga yema baú ga Tupanaarü uneta nagu nuxü̃. Rü naxãẽmacüane, rü poraãcü nicuxcuane, rü naxĩã̱xãchiane rü poraãcü gáuxü̃ narüyi.