Popera ga Filemúü̃ca̱x naxümatüxü̃ ga Pauru 1 - Tupanaarü Ore

Pauru rü nüxü̃ narümoxẽ ga Filemúü̃

¹ Pa Toenexẽ i Filemúü̃ i Toxrüxü̃ Tupanaarü Puracüwa Puracüxex, choma i Pauru rü taenexẽ i Timutéumaxã cuxca̱x tanaxümatü i ñaa popera. Rü choma rü nuxã chapoxcu nagagu nax nüxü̃ chixuxü̃ ya Ngechuchu ya Cristuarü ore.

² Rü ngẽxgumarüxü̃ ta naxca̱x tanaxümatü i guxü̃ma i ngẽma taenexẽgü i cupatawa ngutaque̱xegüxü̃, rü ngĩxca̱x i taeya̱x i Ápia, rü naxca̱x ya taenexẽ i Ariquípu i taxrüxü̃ Tupanaarü puracüwa puracüxü̃.

³ Rü chanaxwa̱xe i Tanatü ya Tupana rü tórü Cori ya Ngechuchu ya Cristu pexü̃ narüngü̃xẽxẽ rü pexü̃ nataãẽxẽxẽ.

Filemúü̃ rü Ngechuchuaxü̃́ nayaxõ rü yema yaxõgüxü̃xü̃ nangechaü̃

⁴ Rü guxü̃guma i ngẽxguma cuxna chacua̱xãchigu i chorü yumüxẽwa, rü Tupanana moxẽ chaxã cuxca̱x.

⁵ Erü nüxü̃ chacuáchiga nax aixcüma nüxü̃́ cuyaxõxü̃ ya tórü Cori ya Ngechuchu rü aixcüma nüxü̃ cungechaü̃xü̃ i guxü̃ma i duü̃xü̃gü i Tupanaarü ixĩgüxü̃.

⁶ Cuma rü toxrüxü̃ Cristuaxü̃́ cuyaxõ. Rü ngẽmaca̱x ngẽxguma chayumüxẽgu rü Tupanana naxca̱x chaca nax cuxna naxããxü̃ca̱x i cua̱x nax nüxü̃ cucuáxü̃ca̱x i guxü̃ma i ngẽma mexü̃ i tüxü̃́ tauxchaxü̃ nax naxüxü̃ nagagu nax Ngechuchu ya Cristuaxü̃́ yaxõgüxü̃.

⁷ Rü choma rü poraãcü chataãẽxü̃chi erü aixcüma nüxü̃ cungechaü̃ i ngẽma yaxõgüxü̃. Erü cugagu nixĩ, Pa Chauenexẽx, nax nataãẽgüxü̃ i ngẽma yaxõgüxü̃.

Pauru rü Filemúü̃na naca nax mea Onéchimuxü̃ nayaxuxü̃ca̱x

⁸ Rü ngẽmaca̱x nangẽxma i wüxi i ngü̃xẽxẽ i cuxü̃tawa naxca̱x íchacaxchaü̃xü̃. Rü Cristu nixĩ ya choxü̃ mucü rü ngẽmaca̱x choxü̃́ nangẽxma i pora nax cuxü̃ chamuxü̃ nax cunaxüxü̃ca̱x i ngẽma ngü̃xẽxẽ i tá cumaxã nüxü̃ chixuxü̃.

⁹ Natürü tama chanaxwa̱xe i ngẽmaãcü cuxü̃ chamu, erü cuxü̃ changechaü̃. Rü ngẽmaca̱x cha̱u̱xca̱x narümemae nixĩ nax cuxü̃ chaca̱xaxü̃ naxca̱x i ngẽma ngü̃xẽxẽ. Rü choma i Pauru rü marü chaya rü ñu̱xma rü Ngechuchu ya Cristuca̱x chapoxcu.

¹⁰ Rü ngẽmaca̱x cuxna naxca̱x chaca i wüxi i ngü̃xẽxẽ naxca̱x i chaune i Onéchimu i nua poxcupataü̃wa chauxü̃tawa Cristuxü̃ yaxuxü̃. Rü ngẽmaca̱x i ñu̱xma rü Tupanaarü orewa rü chaune nixĩ.

¹¹ Rü ü̃pa ga Onéchimu rü wüxi ga curü mugüruxü̃ ga taxuwama cuxü̃́ mexü̃ nixĩ. Natürü i ñu̱xma rü cuxü̃́ rü choxü̃́ rü ta name.

¹² Rü ñu̱xma rü cuxca̱x chanatáeguxẽxẽ i nüma i Onéchimu. Rü chanaxwa̱xe i mea cunayaxu, ñoma choxü̃ cuyaxuxü̃rüxü̃.

¹³ Chierüx chanaxwa̱xe nax nuxma chauxü̃tagu naxã́ũxü̃ nax cuchicüxü choxü̃ nangü̃xẽẽxü̃ca̱x i ñu̱xma nax Tupanaarü oreca̱x chapoxcuxü̃.

¹⁴ Natürü tama chanaxwa̱xe nax chanaxüxü̃ i ta̱xacü i tama cuãẽguxü̃. Erü ngẽma ngü̃xẽxẽ i cuxna naxca̱x chacaxü̃ rü tama chanaxwa̱xe nax chorü mugagu cunaxüxü̃, natürü chanaxwa̱xe i curü ngúchaü̃tama yixĩxü̃ i ngẽma.

¹⁵ Rü bexmana Tupana nanaxwa̱xe nax paxaãchi cuxna yaxũxü̃ ga Onéchimu nax wenaxarü cuxca̱x nataeguxü̃ca̱x rü ngẽmaãcü guxü̃gutáma cuxü̃tawa nangẽxmaxü̃ca̱x.

¹⁶ Natürü i ñu̱xma rü tama ngexü̃rüüxü̃mare i curü mugüruü̃mare nixĩ, erü wüxi i curü mugüruü̃arü yexera nixĩ i ñu̱xmax, erü taenexẽ i nüxü̃ ingechaü̃xü̃ nixĩ. Rü aixcüma poraãcü nüxü̃ changechaü̃ i chomax, natürü chanaxwae i cuma rü yexeraãcü nüxü̃ cungechaü̃. Erü ñu̱xma rü tama wüxi i curü mugüruü̃mare nixĩ, natürü wüxi i cuenexẽ i tórü Coriaxü̃́ yaxõxü̃ nixĩ i ñu̱xmax.

¹⁷ Rü ngẽmaca̱x, rü ngẽxguma cuxca̱x rü aixcüma cuenexẽ nax chixĩxü̃, rü chanaxwa̱xe i mea cunayaxu i Onéchimu, ñoma choxü̃ cuyaxuxü̃rüxü̃.

¹⁸ Rü ngẽxguma ta̱xacürü chixexü̃ cupe̱xewa naxü̱xgu rüe̱xna ta̱xacü cuxü̃́ nangetanügu, rü chanaxwa̱xe i chomaxã nüxü̃ quixu nax ñuxre yixĩxü̃, nax cuxü̃́ chanaxütanüxü̃ca̱x.

¹⁹ Rü chomatama i Pauru rü cho̱xme̱xmaxãxü̃chi chanaxümatü i ñaa popera. Rü aixcüma chomatama tá cuxü̃́ chanaxütanü. Rü taũtáma cuxna nüxü̃ chacua̱xãchixẽxẽ nax choxü̃́ cunangetanüxü̃ i curü maxü̃ i taguma gúxü̃ i chaugagu Tupanaxü̃tawa cuyaxuxü̃.

²⁰ Rü ngẽmaãcü, Pa Chauenexẽ, rü chanaxwa̱xe nax tórü Cori i tüxü̃ ngechaü̃xü̃gagu cha̱u̱xca̱x cunaxü i ngẽma ngü̃xẽxẽ. Rü chanaxwa̱xe i choxü̃ cutaãẽxẽxẽ, erü chauenexẽ i Cristuaxü̃́ yaxõxü̃ quixĩ.

²¹ Rü cuxca̱x chanaxümatü i ñaa popera erü nüxü̃ chacua̱x nax aixcüma chauga cuxĩnüxü̃ rü tá cunaxüxü̃ i ngẽma cuxna naxca̱x chacaxü̃arü yexera.

²² Rü ngẽxgumarüxü̃ ta chanaxwa̱xe nax cha̱u̱xca̱x cunamexẽẽxü̃ i wüxi i nachica i ngextá tá nawa changuxü̃ i cuxü̃tawa. Erü íchananguxẽxẽ nax Tupana tá nangãxü̃xü̃ i perü yumüxẽgü, rü tá choxü̃ nangü̃xẽxẽxü̃ nax pexü̃ íchayadauxü̃ca̱x.

Pauru rü wenaxarü Filemúü̃xü̃ narümoxẽ rü naxca̱x ínaca nax Cori ya Ngechuchu ya Cristu nüxü̃ rüngü̃xẽẽxü̃

²³ Rü moxẽ cuxca̱x ngéma namu i Epáparu. Rü nüma rü wüxigu chomaxã napoxcu naxca̱x ya Ngechuchu ya Cristu.

²⁴ Rü ngẽxgumarüxü̃ ta moxẽ cuxca̱x ngéma namugü i Márcu, rü Aristárcu, rü Dema rü Luca. Rü nümagü rü chomücügü nixĩgü i Tupanaarü puracüwa.

²⁵ Rü chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ i guxãma i pemax.