Lebítanüxü̃arü puracüchiga 15 - Tupanaarü Ore

Yatüwa ngẽxmaxü̃ i da̱xawechiga

^1-2 Nüma ga Cori ya Tupana rü Moichémaxã rü Aróü̃maxã nidexa rü ñanagürü nüxü̃: —¡Iraétanüxü̃maxã nüxü̃ pixu i ñaa ore!: “Rü ngẽxguma wüxi ya yatü ida̱xaweegu namaxã nax naxpe̱xechiraü̃wa ínaxũxũxü̃ i namü, rü naxãũãchi.

³ Rü ngẽxguma texé ngẽmamaxã tida̱xawegu rü wüxi i ãũãchixü̃ nixĩ i ngẽma. Rü ngẽxguma naxpe̱xechiraü̃wa ínaxũxũxgu i ngẽma ãũãchixü̃ rüe̱xna namaxã napoxtape̱xechiraü̃gu, rü yima yatü rü naxãũãchi.

⁴ Rü yimá yatü ya da̱xawepe̱xechiraü̃cü rü guxü̃ma i nachica i nagu naca̱xaxü̃ rü duü̃xü̃gü tá nüxü̃ nacua̱x nax naxãũãchixü̃ i ngẽma nachicagü. Rü guxü̃ma i ngẽmaxü̃gü i nawa natoxü̃ ya yimá yatü rü duü̃xü̃gü tá nüxü̃ nacua̱x nax naxãũãchixü̃ i ngẽma nachicagü.

⁵ Rü yíxema nüxü̃ ingógüxe i ngẽma pechicaxü̃ ya yimá yatü nagu caxü̃, rü name nax tügü tayauxchiruxü̃ rü taxaiyaxü̃. Rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta.

⁶ Rü yíxema nawa rütoxe i ngẽma ngẽmaxü̃ ya yimá yatü nawa rütoxü̃, rü name nax tügü tayauxchiruxü̃ rü taxaiyaxü̃. Rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta.

⁷ Rü yíxema nüxü̃ ingógüxe ya yimá yatü ya naxpe̱xechiraü̃wa ida̱xawecü, rü name nax tügü tayauxchiruxü̃ rü taxaiyaxü̃. Rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta.

⁸ Rü ngẽxguma yimá yatü ya naxpe̱xechiraü̃wa ida̱xawecü tüxna cuaxigu ya wüxi ya duü̃xẽ ya tama ida̱xawexe, rü name nax tügü tayauxchiruxü̃ rü taxaiyaxü̃. Rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta.

⁹ Rü guxü̃ma i cowaruma̱xwe̱xe i nawa natoxü̃ ya yimá yatü ya naxpe̱xechiraü̃wa ida̱xawecü, rü duü̃xü̃güca̱x rü nixãũãchi.

¹⁰ Rü guxãma ya yíxema nüxü̃ ingógüxe i wüxi i ngẽmaxü̃ i nawa natoxü̃ ya yimá yatü ya naxpe̱xechiraü̃wa ida̱xawecü, rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta. Rü guxãma ya yíxema yangexe i ta̱xacü i nawa natoxü̃ ya yimá yatü ya naxpe̱xechiraü̃wa ida̱xawecü, rü name nax tügü tayauxchiruxü̃ rü taxaiyaxü̃. Rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta.

¹¹ Rü ngẽxguma yimá yatü ya naxpe̱xechiraü̃wa ida̱xawecü tama naya̱u̱xme̱xãcüma texéxü̃ yangógügu, rü yíxema tüxü̃ yangógüxe rü tanaxwa̱xe i tügü tayauxchiru rü tügü taxaiya. Rü duü̃xü̃gü tá nüxü̃ nacua̱x nax taxãũãchixü̃ ñu̱xmata nachüta.

¹² Rü ngẽxguma yimá yatü ya naxpe̱xechiraü̃wa ida̱xawecü nüxü̃ ingógügu ya wüxi ya buetare ya waixü̃münaxca̱x, rü tanaxwa̱xe nax wüxicana nagu tapogüxü̃. Rü ngẽma ngẽmaxü̃gü i nainaxca̱x i nüxü̃ yangógüxü̃ rü tanaxwa̱xe nax tayayauxgüxü̃.

¹³ Rü ngẽxguma marü naxca̱x yataanegu ya yimá yatü ya naxpe̱xechiraü̃wa ida̱xawecü, rü name i 7 i ngunexü̃ ngupetüguwena nügü naya̱u̱xchiru rü dexá i chuxchuxü̃wa nügü naxaiya. Rü ngẽxguma tá nixĩ i tama naxãũãchixü̃.

¹⁴ Rü ngẽma norü 8 i ngunexü̃gu rü taxre ya muxtucumaxã rüe̱xna taxre ya muxtucuxacümaxã tá Tupanapataarü ĩã̱xwa naxũ nax ngéma Cori ya Tupanape̱xewa chacherdótena tüxü̃ yamugüxü̃ca̱x.

¹⁵ Rü nüma i chacherdóte rü tá tüxü̃ nima̱x ya wüxi ya muxtucuxacü nax ngẽmaãcü Tupana nüxü̃́ nüxü̃ rüngü̃maxü̃ca̱x i ngẽma yatüarü pecadu. Rü yíxema toguxe ya muxtucuxacü rü tá tüxü̃ nigu Tupanaarü ãmareruxü̃. Rü ngẽmaãcü tá Cori ya Tupanape̱xewa nanamexẽxẽ ya yimá yatü ya naxpe̱xechiraü̃wa ida̱xawecü.

¹⁶ Rü ngẽxguma wüxi ya yatü rü naxpe̱xechiraü̃wa ínaxũxũmaregu i namü, rü tá mea guxü̃wama nügü naxaiya. Rü duü̃xü̃gü tá nüxü̃ nacua̱x nax naxãũãchixü̃ ñu̱xmata nachüta.

¹⁷ Rü ngẽma naxchiru rüe̱xna naxcha̱xmüxü̃ i ngẽma namü nawa churuxü̃, rü tanaxwa̱xe nax dexáwa yayauxgüxü̃. Rü duü̃xü̃gü tá nüxü̃ nacua̱x nax naxãũãchixü̃ ñu̱xmata nachüta.

¹⁸ Rü ngẽxguma wüxi ya yatü rü wüxi i ngexü̃ nügümaxã maxẽgu, rü tanaxwa̱xe nax mea naxaiyagüxü̃ i ngẽma taxre. Rü tá nixãũãchi ñu̱xmata nachüta.

Ucu̱xẽgü naxca̱x i ngexü̃gü

¹⁹ Rü ngẽxguma wüxi ya ngexe rü tümaarü da̱xawexü̃newa nanguxgu, rü 7 i ngunexü̃ tá taxãũãchi. Rü yíxema tüxü̃ ingógüxe rü taxãũãchi ñu̱xmata nachüta.

²⁰ Rü ngexü̃rüüxü̃ i ngẽmaxü̃ i nagu tacaxü̃ i ngẽxguma tümaarü da̱xawewa tangexmagu rü naxãũãchi. Rü ngexü̃rüüxü̃ i ngẽmaxü̃ i nawa tarütoxü̃ rü naxãũãchi.

²¹ Rü yíxema ngẽma nachica i nagu nacaxü̃gu ingógüxe, rü tanaxwa̱xe i tügü tayauxchiru rü tügü taxaiya. Rü yíxema rü tá taxãũãchi ñu̱xmata nachüta.

²² Rü yíxema nüxü̃ ingógüxe i ngẽma naxma̱xwe̱xe i nawa natoxü̃, rü tanaxwa̱xe i tügü tayauxchiru rü tügü taxaiya. Rü yíxema rü tá taxãũãchi ñu̱xmata nachüta.

²³ Rü ngẽmaãcü yíxema nüxü̃ ingógüxe i ngẽma nachica i marü nagu naca̱xaxü̃ rüe̱xna ngẽma nawa natoxü̃, rü tá taxãũãchi ñu̱xmata nachüta.

²⁴ Rü ngẽxguma wüxi i yatü tümamaxã ípexgu rü nüxna naxüe i tümaarü ãũãchixü̃. Rü 7 i ngunexü̃ tá nawa nangẽxma i ngẽma ãũãchixü̃. Rü ngẽxgumarüxü̃ ta i ngẽma nachica i nagu naca̱xaxü̃ rü 7 i ngunexü̃ naxãũãchi.

²⁵ Rü ngẽxguma wüxi ya ngexe rü tama tümaarü tauemacü tüxna nguyane taxãgügu rü yadaxgu nax taxãgüxü̃ rü taxãũãchi. Rü ngẽxgumarüxü̃ ta ega tümaarü tauemacü tüxna nguxgu rü yadaxgu nax taxãgüxü̃, rü ñoma tümaarü tauemacü a̱i̱xrüguma tüxna nguxgurüxü̃ taxãũãchi.

²⁶ Rü ngẽxguma wüxi ya ngexe taxãgüyane rü ngẽma nachica i nagu tacaxü̃ rü ngẽma naxma̱xwe̱xe i nawa tarütoxü̃ rü naxãũãchi. Rü ñoma tümaarü tauemacü a̱i̱xrüguma tüxna nguxgurüxü̃ taxãũãchi.

²⁷ Rü ngẽxgumarüxü̃ ta ya yíxema nüxü̃ ingógüxe i ngẽma ngẽmaxü̃gü rü taxãũãchi. Rü name nax tügü tayauxchiruxü̃ rü tügü taxaiyaxü̃. Rü tá taxãũãchi ñu̱xmata nachüta.

²⁸ Rü ngẽxguma marü iyachaxãchigu nax taxãgüxü̃ ya yíxema nge, rü 7 i ngunexü̃ tá tixugü, rü ngẽmawena tá nixĩ i tama naxãũãchixü̃.

²⁹ Rü ngẽma norü 8 i ngunexü̃gu rü taxre ya muxtucumaxã rüe̱xna taxre ya muxtucuxacümaxã tá Tupanapataarü ĩã̱xwa taxũ nax ngéma chacherdótena tüxü̃ tayamugüxü̃ca̱x.

³⁰ Rü nüma i chacherdóte rü tá tüxü̃ nima̱x ya wüxi ya muxtucuxacü nax ngẽmaãcü Tupana ngĩxü̃́ nüxü̃ rüngü̃maxü̃ca̱x i ngẽma ngĩrü pecadu. Rü yíxema toguxe ya muxtucuxacü rü tá tüxü̃ nigu Tupanaarü ãmareruxü̃. Rü ngẽmaãcü ya yima chacherdóte rü tá Cori ya Tupanape̱xewa ngĩxü̃ namexẽxẽ i ngẽma nge i ãgücü nax ngẽmaãcü Tupanape̱xewa nangearü ãũãchiã́xü̃ca̱x.

³¹ Rü ngẽmaãcü i pema rü tá norü ãũãchixü̃na peyaxĩgachixẽxẽ i ngẽma Iraétanüxü̃ nax tama nayuexü̃ca̱x nagagu nax naxãũãchigüãxü̃ ya yima chopata ya choma nawa changexmane i natanüwa” —ñanagürü ga Cori ya Tupana.

^32-33 Rü ngẽmagü nixĩ i ucu̱xẽgü naxca̱x i ngẽma yatügü i naxpe̱xechiraü̃wa ida̱xaweexü̃, rü ngẽma yatügü i ibamügüxü̃ rü ngẽmagagu chope̱xewa ãũãchigüxü̃. Rü ngẽma nixĩ i ucu̱xẽgü naxca̱x i ngexü̃gü i norü da̱xawe nüxna ngugüxü̃, rü ngẽma yatü i ngĩmaxã maxü̃xü̃ i wüxi i nge i ngẽxguma ngĩrü da̱xawewa nangẽxmayane.