Chacaría 10 - Tupanaarü Ore

Tupana rü Yudátanüxü̃gümaxã rü Efraíü̃tanüxü̃maxã inaxuneta

¹ ¡Ngẽxguma yapaanegu rü Cori ya Tupanana peca nax pexca̱x napuxẽẽãxü̃ca̱x! Rü nüma ya Cori ya nango̱xẽẽcü i ba̱i̱xbeane rü tacü ya pucü tá pexca̱x ínanguxẽxẽ. Rü peanewa rü tá nanaxüxẽxẽ ya maxẽ.

² Rü ngẽma tupananetachicünã̱xgüarü ore rü doramare nixĩ. Rü ngẽma nüxü̃ nadaugüxü̃ i ngẽma ẽxü̃guxü̃arü uruü̃gü rü tagutáma ningu. Rü nanegümaxã duü̃xü̃güxü̃ nawomüxẽẽgü rü ngẽma norü ore i pexü̃ namaxã nataãẽxẽẽxü̃ rü natüca̱xmamare nixĩ. Rü ngẽmaca̱x nixĩ i duü̃xü̃gü rü tama aixcüma cua̱xwa nangugüxü̃ rü nu ne naxĩmarexü̃ ñoma carnérugü i ngearü dauruü̃ã́xü̃rüxü̃.

³ Rü ngẽmaca̱x ñanagürü ya Cori: —Choma rü namaxã chanu i ngẽma perü ãẽ̱xgacügü i pemaxã icua̱xgüxü̃ rü tá chanapoxcue —ñanagürü. Rü Cori ya Guxãxétüwa Ngẽxmacü ya norü duü̃xü̃güna daucü rü Yudátanüxü̃xü̃ tá naporaexẽxẽ ñoma cowaru i daica̱x poraexü̃rüxü̃.

⁴ Rü Yudátanüxü̃tanüwa tá nangóe i poraexü̃ i ãẽ̱xgacügü i chorü duü̃xü̃gümaxã tá icua̱xgüxü̃. Rü nümagü rü narüxü̃ tá nixĩgü ya yimá nuta ya nüxíra yaxǘcuchicü nax naxüaxü̃ca̱x ya wüxi ya ĩpata ya taxü̃ne. Rü ñoma norü tairuxü̃ ya yima ĩpata ya naxchirunaxca̱xrüxü̃ tá nixĩgü. Rü ñoma würa i daica̱x mexü̃rüxü̃ tá nixĩgü ya yima ãẽ̱xgacügü,

⁵ Rü nümagü rü tá ñoma churaragü i ãcharaxü̃gu nügü da̱i̱xü̃rüxü̃ nixĩgü. Rü tá naporae, erü Cori ya Tupana rü natanüwa nangẽxma. Rü ngẽmaãcü tá nanaxãnexẽxẽ i norü uanügüarü churaragü i cowarugu ĩxü̃.

⁶ Rü nüma ya Cori ya Tupana rü ñanagürü: —Choma rü tá chanaporaexẽxẽ i Yudátanüxü̃. Rü tá íchanapoxü̃ i Yúchetanüxü̃. Rü wenaxarü nachixü̃aneca̱x tá chanawoeguxẽxẽ erü choxü̃́ nangechaü̃tümüxü̃gü. Rü nümagü rü wenatáxarü ñoma taguma nüxü̃ chaxoxü̃rüxü̃ chomaxã nixĩgü. Erü choma rü norü Cori ya Tupana chixĩ, rü nüxü̃ chaxĩnü i norü yumüxẽgü.

⁷ Rü Efraíü̃tanüxü̃ rü ñoma churara i poraxü̃rüxü̃ tá nixĩgü. Rü norü maxü̃newa rü tá nataãẽgü ñoma bínu yaxãgügurüxü̃. Rü ngẽmaxü̃ nadaugügu i nanegü rü naxacügü rü tá ta nataãẽgü. Rü ngẽma Cori naxca̱x ügüxü̃ca̱x tá nixĩ i nataãẽgüxü̃.

⁸ Rü choma rü tá naxca̱x changema rü wüxiwa tá chanagagü, yerü choma nixĩ ga íchananguxü̃xẽẽxü̃. Rü nümagü rü wena tá nimu noxrirüxü̃.

⁹ Rü choma nixĩ ga togü ga nachixü̃anegügu chanawoonexü̃. Natürü woo nax yáxü̃wa nangẽxmagüxü̃ rü tá choxna nacua̱xãchie. Rü wüxi i ngunexü̃gu rü tá nanegümaxã rü naxacügümaxã nachixü̃aneca̱x nawoegu.

¹⁰ Rü choma rü tá Equítuanewa rü Achíriaanewa íchanagaxü̃. Rü Garaáxanewa rü Líbanuanewa tá chanagagü. Rü ngẽma nax namuxũchiamaxü̃ i nümagü rü nachica rü tá naxca̱x inayataxu.

¹¹ Rü ngẽma már i Equítuanewa ngẽxmaxü̃wa rü tá nichoü̃. Rü norü yuape rü tá ichayanaxoxẽxẽ. Rü taxtü i Níru rü tá chayapachitamaxẽxẽ. Rü Achíriaanecüã̱xgü i nügü icua̱xüü̃güxü̃ rü tá chanaxãneexẽxẽ. Rü tá ichanaxoxẽxẽ i Equítuanearü pora.

¹² Rü choma rü tá pora nüxna chaxã rü chauégagu tá ínaxĩ. Rü choma ya Cori ya Tupana nixĩ i pexü̃ ngẽma ñachaxü̃ —ñanagürü.