Nüxíraxü̃xü̃ ga to ga popera ga ãẽ̱xgacügüchiga ümatüxü̃ 5 - Tupanaarü Ore

Rubéü̃tanüxü̃chiga

¹ Rü Acóbu nane ga yacü rü Rubéü̃ nixĩ. Rü Rubéü̃ nanegü nixĩ ga Anóx, rü Falú, rü Eróü̃, rü Carmí. Natürü woo Acóbu nane ga yacü nax yixĩxü̃ ga Rubéü̃, rü tama nanayaxu ga yema nüxna üxü̃ naxca̱x nax nüxíraü̃cü ga nanatü nane yixĩxü̃, yerü wüxi ga nanatüma̱xmaxã namaxü̃. Rü yema Rubéü̃na üchiréxü̃ rü nai ga Acóbu nane ga Yúche nanegüwa naxüe.

² Natürü Yudá nixĩ ga yixcüra naenexẽgüxü̃ rüporamaexü̃ rü wüxi ga nataxa rü nawa nangu nax Iraétanüxü̃arü ãẽ̱xgacü nax yixĩxü̃. Natürü yema Rubéü̃na üxü̃ naxca̱x nax nüxíraü̃cü ga nanatü nane yixĩxü̃ rü Yúchena naxü.

³ Rü Acóbu nane ga yacü ga Rubéü̃ rü ãgümücü nixĩ ga nanegü: Anóx rü Farú rü Eróü̃ rü Camí.

^4-6 Rü Yoé nane nixĩ ga Chemaía. Rü Chemaía nane nixĩ ga Góx. Rü Góx nane nixĩ ga Chimí. Rü Chimí nane nixĩ ga Micaía. Rü Micaía nane nixĩ ga Reaía. Rü Reaía nane nixĩ ga Baá. Rü Baá nane nixĩ ga Beerá. Rü Beerá nixĩ ga namaxã icuáxü̃ ga yema Rubéü̃tanüxü̃ ga yexguma Achíriaanearü ãẽ̱xgacü ga Tigáx-piréche yayaxugu nax nachixü̃anewa nagagüãxü̃ca̱x.

^7-8 Rü ñaagü nixĩ ga yema Beerátanüxü̃ ga natanüxü̃arü poperawa ngo̱xégagüxü̃: Yeié nixĩ ga norü ãẽ̱xgacü. Rü ñu̱xũchi nayexma ga Chacaría, rü Béra ga Achá nane. Rü Achá nanatü nixĩ ga Chéma. Rü Chéma nanatü nixĩ ga Yoé. Rü nüma ga Béra rü Aroégu nixĩ ga naxãpataxü̃. Rü norü naane rü nüxü̃ nataneta ñu̱xmata Nébuwa rü Baá-meóü̃wa nangu.

⁹ Rü naxü̃nagü rü Garaáxanewa nimu rü yemaca̱x nüma ga Béra rü éstewaama nüxü̃ nataneta ga norü naane ñu̱xmata nawa nangu ga yema naxnücüane ga taxtü ga Eufrátearü oéstewaama yexmaxü̃.

¹⁰ Rü yexguma Chaú ãẽ̱xgacü ixĩxgu rü nüma ga yema Rubéü̃tanüxü̃ rü Agátanüxü̃maxã nügü nadai. Rü yema Agátanüxü̃xü̃ narüporamaegü. Rü ñu̱xũchi nawa namaxẽ ga guma Agátanüxü̃patagü ga Garaáxanearü éstewaama yexmagüne.

Gáxtanüxü̃chiga

^11-12 Rü yema Gáxtanüxü̃ rü Bacháü̃anewa namaxẽ. Rü norü üyeane rü Rubéü̃tanüxü̃arü to̱xma̱xtawa inaxügü rü ñu̱xmata ĩane ga Chacáwa nangu. Rü nüxíraxü̃ ga norü ãẽ̱xgacü rü Yoé nixĩ. Rü yemawena ga Chapáü̃, rü nawena ga Yaanái, rü nawena ga Chapáx.

¹³ Rü yema natanüxü̃ ga mea nügü inanu ga nügütanüxü̃wachigü rü ñaagü nixĩ ga norü ãẽ̱xgacügü: Micaé, rü Mechuráü̃, rü Chebá, rü Yoraí, rü Yacáü̃, rü Chía, rü Ébe. Rü guxü̃wama rü 7 nixĩ.

¹⁴ Rü yemagü nixĩ ga Abiyái nanegü. Rü nüma ga Abiyái rü Urí nane nixĩ. Rü Urí rü Yaróa nane nixĩ. Rü Yaróa rü Garaáx nane nixĩ. Rü Garaáx rü Micaé nane nixĩ. Rü Micaé rü Yechichái nane nixĩ. Rü Yechichái rü Yadó nane nixĩ. Rü Yadó rü Búx nane nixĩ.

¹⁵ Rü Aí ga Adié nane nixĩ ga yema natanüxü̃arü ãẽ̱xgacü. Rü Guní nixĩ ga norü o̱xi.

¹⁶ Rü guxü̃ma ga yema Gáxtanüxü̃ rü Garaáxanegu rü Bacháü̃anegu rü norü ĩanexacügügu naxãchiü̃gü. Rü yexgumarüxü̃ ta nagu naxãchiü̃gü ga yema naxü̃nachitaü̃gü ga Charóü̃arü metachinüxü̃wa yexmagüxü̃ ñu̱xmata norü naanearü üyeanewa nangugü.

¹⁷ Rü guxü̃ma ga yema Gáxtanüxü̃arü o̱xigü rü wüxi ga poperagu niwǘgüéga ga yexguma Yudáanearü ãẽ̱xgacü yixĩxgu ga Yotáü̃ rü Iraéanearü ãẽ̱xgacü yixĩxgu ga Yeruboáü̃.

Rubéü̃tanüxü̃ rü Gáxtanüxü̃ rü ngãxü̃tücumü ga Manachétanüxü̃chiga

¹⁸ Rü yema Rubéü̃tanüxü̃ rü Gáxtanüxü̃ rü ngãxü̃tücumü ga Manachétanüxü̃ rü nüxü̃́ nayexma ga 44,760 ga churaragü ga tama muü̃exü̃ rü meama daixü̃ icuáxü̃. Rü nümagü rü meama nixãxne namaxã ga taragü rü würagü rü poxü̃ruü̃gü.

^19-20 Rü nümagü rü Agátanüxü̃maxã rü Yetútanüxü̃maxã rü Napítanüxü̃maxã rü Nodátanüxü̃maxã nügü nadai. Rü yexguma nügü nadaiyane rü Tupanaarü ngü̃xẽẽca̱x ínacagü. Rü nüma ya Tupana rü nüxü̃ narüngü̃xẽxẽ nax norü uanügüxü̃ naporamaegüxü̃ca̱x yerü nüxü̃́ nayaxõgü.

²¹ Rü yemawena rü nayagagü ga yema naxü̃nagü ga norü uanügüna napuxü̃güxü̃. Rü 50,000 nixĩ ga caméyugü, rü 250,000 nixĩ ga carnérugü rü 2,000 ga búrugü. Rü ínanayauxü̃ ta ga 100,000 ga norü uanügü.

²² Rü muxü̃ma ga norü uanügü nayue, yerü Tupana nüxü̃ narüngü̃xẽxẽ ga yema Rubéü̃tanüxü̃ rü Gáxtanüxü̃ rü ngãxü̃tücumü ga Manachétanüxü̃. Rü yema norü uanügüarü naanegüwa namaxẽ ñu̱xmata nawa nangu nax Achíriaanecüã̱x ínayauxü̃xü̃ nax nachixü̃anewa nagagüãxü̃ca̱x.

Ngãxü̃tücumü ga Manachétanüxü̃chiga

²³ Rü yema ngãxü̃tücumü ga Manachétanüxü̃ rü namuxũchi. Rü yemaca̱x nawa namaxẽ ga yema naane ga Bacháü̃wa ixügüxü̃ rü ñu̱xmata Baá-emóü̃wa rü Cheníwa rü ma̱xpǘne ga Ermóü̃wa nangu.

²⁴ Rü yema ngãxü̃tücumü ga Manachétanüxü̃arü ãẽ̱xgacügü rü ñaagü nixĩ: Éfe, rü Ichí, rü Erié, rü Arié, rü Yeremía, rü Odabía, rü Yadié. Rü guxü̃ma ga yemagü rü churaragü ga iporaxü̃ rü guxü̃ma nüxü̃ cuáchigagüxü̃ nixĩgü. Rü nümagü nixĩ ga natanüxü̃maxã inacua̱xgüxü̃.

²⁵ Natürü ga nümagü rü tama naga naxĩnüe ga norü o̱xigüarü Tupana rü nüxna nixĩgachi. Yerü nüxü̃ nicua̱xüü̃gü ga norü tupananetagü ga guma ĩanegü ga Tupana nape̱xewa rüxoxẽẽgüne.

²⁶ Rü yemaca̱x nüma ga Iraétanüxü̃arü Tupana rü Achíriaanearü ãẽ̱xgacü ga Tigáx-pirécheãẽwa ínanangu̱xẽxẽ nax ínayauxü̃ãxü̃ca̱x ga yema Rubéü̃tanüxü̃ rü Gáxtanüxü̃ rü yema ngãxü̃tücumü ga Manachétanüxü̃. Rü nüma ga Tigáx-piréche rü Aláwa rü Abówa rü Aráwa rü natü ga Gocháü̃wa nanagagü. Rü ñu̱xma rü ta rü ngéma namaxẽ.