Judas 1 - Nuevo Testamento Toba Sur

So Judas ÿamaxa aso lede nam lÿaxanataguishicpi ñi Dios

¹ Aÿim mayi i'enaxat Judas, aÿim l-latac so Jesucristo, qataq ÿaqaÿa so Santiago. Aÿim shiyiñi ana ÿide da samaxa nam lÿaxanataguishicpi ñi qadta'a Dios da iÿotauga da ÿauo'o lalamaxatpi. Qaq namayipi ÿataqta qantela'a, souaxat da n'attau'a so Jesucristo.

² Ñishitaique da qami' qauacoñiiguet dam chochaq huañi nchoxonnataxanaxa, nlagaxayic, qataq da nauotaxanaqtaic.

Nam dapaxaguenataxaatapeguec da saq 'en

³ Qami' ñauochaxa'u ÿaqaÿa't, aÿim huo'o da lta'adaic iyaxa da shiyiñi da llic da nca'alaxa mayi mashi 'enauac qomi' huetaiguilo da qami' samaxalo. Qalaxayi nagui sela'a da iuen da shiyiñi da qami' ñachoxodeetoiguilo da nachi 'eetai' da qauloquiitapeguelec qome da qad'amqajnataxanaxac mayi mashi ime da qoÿami' 'enauac nam lalamaxatpi ñi Dios.

⁴ Cha'ayi huo'o na shiÿaxauapi quetaigui da latenataxanaxac da qami' taiguilo. Namayipi nal'ena co'ollaxa da i'axa't naua ñiyigui'shi l'aqtaqa ñi Dios da taÿa'a da 'itchiguiñi nhuaxanaguec. Namayipi ÿataqta qauemaicpi, cha'ayi ÿaconguet da lqouagaxanaqtaic ñi qadta'a Dios da chochi da'ashiÿoigui da i'o't naua n'onataxaco da lapachiyaxac, qataq nqolguete' ñi Dios ñim qomi' lalamqa'te qataq so qadataxala' Jesucristo.

⁵ Qaq nai'ctaxa da qami' mashi sogote da qauaÿajñi de'eda, qalaxayi nachi 'en'am ñishitaique da qami' seuennataxanaxanque da 'eetec ñi qadataxala' Dios da nai'ctaxa da nqateeguesop co'ollaxa yi Egipto so llalaqpi so Israel, qalaxayi co'ollaq qaÿata'ague, nachi ileu naq'en som sa ishit da da'amqajnaxatan somayipi.

⁶ Qataq som lamaxashicpi piguem l'ecpi ñi Dios mayi sa ishit co'ollaxa da ÿaÿamaxatec da l'onataxanaxac, chaqdata da ca'ai cam lalamaxat lma', nachi ñi Dios chochaq tateec naq'en da icoñitta'aguet na napalaxa somayipi, da iuatta'aguet naq'en ca pa'ateec na'a'q qom nmit 'enauacna.

⁷ Nataq'en so shiÿaxauapi lma' yi Sodoma qataq Gomorra qataq som shiÿaxauapi mayi lauodeuapi mayi 'eeta'am se'eso namaxashicpi piguem l'ecpi da nañanguet da lquishiguetaxac, qataq taigui da namanaxanaqtaic mayi sa natenguet da ÿoqta lataxac ca shiÿaxaua, nachi 'enauac somayipi nque'etaxangui so nodec mayi chochaq tateec co'ollaq qaÿauo'o da nhuaxanaguec. Qaq damayi 'eeta'am da nqataxac 'enauac na shiÿaxauapi.

⁸ Qalaxayi nachi 'eeta'am sa ishit da ÿaqalan de'eda ne'ena shiÿaxauapi. Namayipi quetagueto naua lchoxonaxaco, ÿoqo'oyi ishipaxanaqchit da l'oquiaxac, qataq sa ÿaconguet da lamaxasoxonaxac ñi qadataxala' na namaxashic piguem l'ecpi.

⁹ Qamaq so lataxala' na namaxashic piguem l'ecpi, l'enaxat Miguel, co'ollaq deloctague' so shiÿaxaua lma'na, qaq co'ollaq ncotatague' somayi, souaxat so l'oquiaxac so Moisés. Qalaq sa ishit da huo'otaq iuaxanque naua l'aqtaqa. Chaqdata da 'eeta': “Ñi qadataxala' Dios 'am nlaxa qome.”

¹⁰ Qalaxayi ne'ena shiÿaxauapi ÿataqta qauema naua l'aqtaqa da detaxaÿa cam sa ishit da ÿauatton. Qaq nam lataxacpi mayi chochi ÿachigoxotchigui da lmejnaxanaxac da ÿauatton, qalaq 'eeta'am da lauattonaxanaxac ca shiguiÿac mayi qaica ca ÿaÿaten. Qaq do'onataxana, qalaxayi maichi que'emaxam.

¹¹ Qaq ÿataqta ¡choxodaxaso' namayipi! Cha'ayi quetegue da lataxac so Caín, qataq souaxat da nshitaique da nauec añi plata, nachi dashiuec, 'eeta'am so Balaam. Qataq imeuo qanqoÿin, 'eeta'am so Coré co'ollaq qaÿalauat, souaxat da npa'aguenaxac.

¹² Namayipi ÿataqta i'ot da n'agaxa da ÿalectaigui na qadqui'axaqui da ñi 'oonolec da qoñiita nhuana'ai' ca lqaÿa. Nachi namayipi ÿalectauo da deque'etac qataq nÿomtac, ÿataqta machiguiñi qataq ÿataqta qaica ca l'agaxa. Namayipi 'eeta'am ca nataxala' da maichi nteltapeguela't, qataq 'eeta'am ca l'oc mayi saq chigoxoigui ca 'etaxat, chochi ÿachitac na l'at, qataq 'eeta'am aca qo'ipaq mayi qaca ana ala da ivita ca laloqo', ÿataqta daqaqta da ivita da qanqat.

¹³ Qataq namayipi 'eeta'am ana late'edai lapaxa na 'etaxat mayi maichi nmalaxattashiguem nam qaica ca lyac lcochi. Qataq namayipi 'eeta'am ana huaqajñipi mayi ca'ai cam ÿoqta llic, nachi qaiuaxanec da quetaigui nam chochaq tateec napalaxa.

¹⁴ Nataq'en so Henoc som huetoigui da siete nqochin na llalaqpi so Adán, somayi i'axata'a namayipi co'ollaq i'aqtaxanaxan ñi Dios, 'eeta': “Aÿim sauaateguet ñi qadataxala' nnaictague' som chalcata mil nam lalamaxatpi,

¹⁵ da yaqto' nmit 'enauac na shiÿaxauapi, qataq da ÿauo'o da nhuaxanaguec nam qauemaicpi, souaxat 'enauac nam sa ÿaÿamaxañisat mayi chigoqchigui namayipi, qataq souaxat nam qauem l'aqtacpi ne'ena 'itaxaloxoicpi mayi sa iyacnapec da detaxaÿa ñimayi.”

¹⁶ Namayipi taxaÿaxaicpi qataq quetapeguelec ca lÿa. Chaqdata da nmitta'ai cam maichi lqopitaxanaqtaic. Qataq naua l'aqtaqa ÿataqta ñi'oxonnaxaiqa. Qataq da detaxaÿa ca lÿa shiÿaxaua, qalaq ÿataqta iyaata, cha'ayi chochi naquitta'a.

Qaÿaqata na 'amqajnataxanaxaicpi

¹⁷ Qalaxayi qami' ñauochaxa'u ÿaqaÿadolqa, qauennachiÿa'a da nal'ena co'ollaxa soua lamaxa'shi so qadataxala' Jesucristo,

¹⁸ da i'axattrac de'eda 'eeta': “Caua pa'atreec na'axa'te, qaq huo'o qome na shiÿaxauapi mayi ÿataqta ÿi'inai' da n'amqajnataxanaxac, qataq chochi quetague' nam maichi 'eetapeguecpi mayi qauem.”

¹⁹ Qaq 'ena nam i'ot da iÿodacachi naq'en na shiÿaxauapi, cha'ayi ÿalaxaguet cam 'eetapeguec da lapachiyaxac. Qataq namayipi sa ishit da netanguit so n'Espíritu ñi Dios.

²⁰ Qalaxayi qami' ñauochaxa'u ÿaqaÿa't, ÿataqta qauaÿamaxachiitec qome dam qui'itta qad'amqajnataxanaxaqui. Qataq da qanqouagaxauñi, qalaq nachida da l'añaxac so Espíritu Santo.

²¹ Qataq sa ishit qome da qai'axañiiuec da lauotaxanaqtaic ñi Dios. Qataq qauachiÿa'aguet ca pa'ateec na'a'q qom so qadataxala' Jesucristo ÿachigoxotchigui da lchoxonnataxanaxa da qomi' ÿanema ca nca'alaxa mayi chochaq tateec.

²² Qataq cam huo'o ca lqolguetaxanaxac, qalaq ÿataqta qau'aqtaxañiitem.

²³ Camayi qanca'alaxachiiueguesop ca nodec. Qataq nataq'en qauchoxoyiñi nam laÿipi, qalaxayi ÿataqta qauqaiquiÿa'agueta naua alogo mayi nataq'en ividaiguilo dam qauem n'onataxac namayipi.

Da pa'ateec ñi'oxonnataxanaxac

^24-25 Qaq ñi qadta'a Dios mayi qaica ca lÿa qataq ÿajnaxanaxaic, ñim qadca'alaxaqui, ñimayi ÿataqta 'añaxaic da qami' ntela'alo, da yaqto' sa ishit da qoviÿañi, qataq da yaqto' qami' nachaalataxaneu'alo cam hueta'a mayi qaica ca 'en'am da lli'oxoyic, qalaq ÿataqta qami' qui'itte' qataq qauamaichiguiñi. Qaq ñimayi nachi 'eetai' qome da ñi'oxonnataguec, l'amaqchic, l'añaxac, qataq da 'enec, souaxat so qadataxala' Jesucristo. Qaq damayi nachi 'eetai' da chigoqta'ague, qataq nagui, qataq dam taÿa'ague. Aja', nachi 'eetec.