2 Corintios 4 - Nuevo Testamento Toba Sur

¹ Qaq ÿoqo'oyi qomi' sa ishit qome da sa ñi'añaxataq, cha'ayi ñi Dios dam lqouagaxanaqtaic qomi' ipataxalguete de'eda n'onataxanaxac.

² Qataq mashi sa ñashinaxaguet 'enauac na qoÿoxottañipi da qai'ot, qataq nam i'ot da n'aloxo. Qataq sa ishit da chochi satenataxanaqtac, qataq sa ishit da sashaxanaxaadeec naua l'aqtaqa ñi Dios. Chaqdata da 'eesoda naua sa'axata'q, qaq 'enauac na shiÿaxauapi ÿaÿaten da qomi' 'eesoda, qaq damayi ÿaÿateeta ñi Dios.

³ Qaq ÿoqo'oyi da huo'otaq sa ishit da qaila'a de'eda sa'axataqtac n'aqtaxanaxac mayi naigui da nca'alaxa, qalaxayi nachaqnata na shiÿaxauapi mayi taÿa'a da qanlaxajñi.

⁴ Cha'ayi namayipi sa ishit da da'amqajnataxan, ÿoqo'oyi som shiÿaxaua lma'na, mayi quetague' nam shiÿaxauapi, somayi sa nauaañi naq'en namayipi da lauattonaxanaxac, da yaqto' sa ishit da ila'a na l'edaxa dam no'on qad'axaÿaxac mayi i'axat da n'aqtaguec so Cristo mayi ÿi'oxodaic, som nachiso so lqui'iÿaxac ñi Dios.

⁵ Qataq da sa'aqtaxanaqtac, qalaq sa ishit da maichi ñi'aqtaxanaqtapeguela't. Chaqdata da qomi' sa'axataqtac so Jesucristo da nachiso so qadataxala'. Qataq ñi'axataqta da chochi qomi' qadlataqalli', souaxat da lsoxoyic so Jesús.

⁶ Cha'ayi ñim Dios mayi maichi namaq asom lcoÿadaxanaqte, da yaqto' icoÿadelec nam napalaxa, qaq nachiñi ñimayi icoÿadoiguilo naua qadquiyaqte, chigoqchigui naq'en asa'aso lcoÿadaxanaqte, da yaqto' ishit da sauattonaq da lli'oxoyic ñimayi mayi 'edoigui naq'en da lashiguiaxac so Jesucristo.

Da 'eetec da qanayiigue da npi'iÿaxac

⁷ Qalaxayi de'eda mayi qalota da lashiichiÿaxac, damayi sachoqtaigui da qad'oquiaxac mayi 'eeta'am aca 'alhuole, yaqto' ishit da qaila'a de'eda lta'adaic n'añaxac da chigoqo'ot ñi Dios, qaq sa ishit da nachiqomi' chigoqchiguilo.

⁸ Qaq nai'ctaxa da hueteguelo 'enauac nam i'ot da qadqalaic, qalaxayi sa ishit da saq huo'o ca llic da qaÿaÿamaxajñi. Qataq nai'ctaxa da huo'o ca qomi' ÿachitata'n, qalaxayi sa ishit da saqca cam qanaquitaxac.

⁹ Qataq nai'ctaxa da qomi' qaicaata'pe, qalaq sa ishit da qomi' qaÿala't. Qataq nai'ctaxa da qomi' qaÿamaxayiñi, qalaq sa ishit da qadeleu.

¹⁰ Qaq nai'ctaxa cam sataxague, qalaq 'eeta'am da sachoqtac dam nalaataguec so Jesús, yaqto' ishit da qaila'a da nachaalataxac somayi da nachattaigui da qad'oquiaxac.

¹¹ Cha'ayi qomi' nagui da ña ñica'alaqtauec, qalaq souaqtaigui da lchic da qanalaataguec 'enauaque naua na'axa'te souaxat so Jesús, yaqto' nataq'en da nachaalataxac somayi yi'oq da nachattaigui da qad'oquiaxac mayi huo'o ca loga't.

¹² Qaq ÿoqo'oyi de'eda nleuaxa do'onataxaatapoigui da qad'oquiaxac, qaq dam achaalataxac, qalaq do'onataxaatapoigui da qad'oquiaxaqui.

¹³ Naua ñiyigui'shi l'aqtaqa ñi Dios 'eeta': “Sa'amqajnataxan, ÿoqo'oyi setaqa.” Qaq ÿoqo'oyi qomi' nachi shinaqtec da qadpi'iÿaxac da qomi' sa'amqajnataxanaq, ÿoqo'oyi setaxasoq.

¹⁴ Cha'ayi saÿajnaqta ñim Dios mayi qaltaq nca'aleec naq'en co'ollaq qaÿalauat so qadataxala' Jesús, ñimayi nataq'en qome qomi' nca'alaxatreec, 'eeta'am da 'eetec naq'en so Jesús. Ime, qaq qomi' nÿatreuo da qomi' ÿauegueu'alo ca netaña ñimayi.

¹⁵ Qaq 'enauac de'eda yi'oq, yaqto' qami' qauaÿamqaiñi, yaqto' da qalota na ÿaconguet da lqouagaxanaqtaic ñi Dios, qaq qalota nataq'en na ÿaatacot da n'achic, qaq damayi naigui da lli'oxoyic ñi Dios.

¹⁶ Qaq ÿoqo'oyi sa ishit qome da saq ñi'añaxataq. Nai'ctaxa da 'ico' taÿañicda da qad'oquiaxac, qalaxayi dam saq cha'a qanachaalataxac na'axa'tesat da nqochiitashiguem.

¹⁷ Cha'ayi nam qanque'ejnaxaco nagui de'eda qanachaalataxac, naamayi saq 'amaqtachi qataq saqaÿaloq da inoxoodeec, qaq nachinaua na qomi' i'otegueta cam ÿataqta lta'adaic ñi'oxoyic mayi qaica ca loga't, qaq saq 'en'am na qanque'ejnaxacpi.

¹⁸ Qaq ÿoqo'oyi sa ishit qome da seloqtagui ca yi'oqchigui. Chaqcata ca sa ishit da yi'oq. Cha'ayi cam yi'oqchigui, qalaq sa ishit da 'eetai', qaq cam saq cha'a, qalaxayi sa ishit da huo'o ca loga't.