1 Corintios 9 - Nuevo Testamento Toba Sur

Da 'enec ca lamaxashic so Jesús

¹ Aÿim 'eesa da aÿim huosochiguiñi, qataq yalau'a da 'enec ca lamaxashic so Jesús. Cha'ayi aÿim ñauane' somayi som qadataxala'. Qaq qami' mayi nachiqami' naiguilo da i'onataxanaxac da so'onataxaatacot so qadataxala'.

² Qaq da huo'o na sa ishit da i'amaqten da aÿim lamaxashic so Jesús, qalaxayi qami' sa ishit da saq aÿim qau'amaqchiñi. Cha'ayi aÿim qauachigoxochiichigui da qau'amaqchiñi so qadataxala', qaq nachida da yi'oq naq'en da aÿim lamaxashic so Jesús.

³ Qaq 'eda da ÿasataxac mayi sedolec nam aÿim detaqtega, 'eeta':

⁴ Aÿim 'itchiguiñi da saconguet 'enauac nam aÿim qaiqui'axanec qataq na aÿim qanÿomaxangui,

⁵ qataq nataq'en da ñinaictague' aca iua 'amqajnataxanaxai, 'eeta'am da 'eetec na laÿipi lamaxashicpi so qadataxala' Jesús, qataq soua lalamqa'te lqaÿa't, nataq'en so Pedro.

⁶ Qaq qami' ¿qaupi'itaxañiÿa peta'a da aÿim qataq so Bernabé nachiqomaqta da sa ishit da saxanaxañi da yi'oqchigui qad'onataxanaxac souaxat da sa'axataqtac da n'aqtac?

⁷ ¿Négue't ca ishit da tau'a da nale ca nta'a, qaq maichi nshiiteetapeguela't? qataq ¿négue't ca ishit da ÿaañi ana uvas, qaq sa ishit da chic ana ala? qataq ¿négue't ca ishit da ilotague' ana qagueta, qaq sa ishit da chic na lchi' mayi nlomtac?

⁸ Qaq sa ishit da qaupi'itaxañiÿa da chochi shiÿaxaua lhuennataxac de'eda shinapec, cha'ayi na nqataxacpi mayi chigoqo'ot so Moisés 'enapec nataq'en de'eda.

⁹ Cha'ayi da nanettañi nqataxac 'eeta': “Sa ishit da 'ai'axattagui na lmic ca 'adauegaxanaxala' huaca da 'auapiaxanaxaalec na trigo da qanqattac ana ala.” 'Eesa da ñi Dios co'ollaq 'enapec de'eda sa ishit da chaqcata ca nauegaxanaxala' huaca da huaqattega,

¹⁰ cha'ayi nachiqomi' mayi qomi' huaqattegalo. De'eda nqataxac qoÿiyiñi co'olloxochiyi da qaÿauotaique qanaÿamaqtaguec, cha'ayi ca shiÿaxaua mayi n'attapiguishiguem na 'alhua qataq ca nqattac ana ala na trigo ishit da ÿataqta huo'o da naquitaxac da ÿaconguet cam naigui da l'onataxanaxac.

¹¹ Qaq da qomi' sanaqtapiguiñi dam saq cha'a mayi chigoqo'ot so Espíritu Santo, qaq ¿peta'a sa lataxaco' da qomi' ñaqataq cam yi'oqchigui mayi chigaqaigui da qoñiita?

¹² Yi na laÿipi mayi nataq'en hueto'ot da 'enec da qami' qaushiichiñi da l'onataxanaxac, qaq ¿táloxochiyo' da saq ÿacteec da qomi' qaushiichiñi'? Qalaxayi qomi' sa ishit da souaxalec de'eda shinaxac mayi qomi' hueto'oto. Chaqdata da qomi' ñi'añaxataxaguet 'enauac na chochina, yaqto' qaica ca nqanaxat da no'on qad'axaÿaxac mayi n'aqtaguec so Cristo.

¹³ Qami' mashi qauaÿajñi da na huetapegue' da n'onataxanaxac aca n'onaxanaxaqui, namayipi chigaqaigui da nshiitenaguec de'eda l'onataxanaxac. Dam ÿoqta shiitega 'eeta' da nam huetapegue' aca nca'atoxonaxalate da ÿavigaxattac na nachitaqtaxanaxat huaca lapat, namayipi chictac na qaiÿotauga lapat.

¹⁴ Qaq 'eda da lqataxac nataq'en so qadataxala' da ca i'axattapeguec da n'aqtac mayi chigaqaigui da nca'alaxa, camayi ishit da deque'etapigui da l'aqtaxanaxac.

¹⁵ Qalaxayi aÿim sa ishit da soolec de'eda shinec mayi aÿim hueto'ot, qataq sa ishit da settapiguiñi de'eda da yaqto' huo'o ca aÿim qai'añiim. Cha'ayi ¡no'ono' da seleu, yaqto' qaica ca ishit da nqat de'eda ñitonaxac mayi aÿim hueto'ot!

¹⁶ Cha'ayi da sa'axattac da n'aqtac mayi chigaqaigui da nca'alaxa, qaq sa ishit da ñi'oxodeetapigui, cha'ayi aÿim qaÿamaxalec da so'ot. Qaq ¡choxodaicolec aÿim da sa sa'axat damayi!

¹⁷ Qaq ÿoqo'oyi da aÿim maichi ñalligoxottela't da iuennataxac da so'ot damayi, qaq ishíttaxa da huo'o ca ñishiitenaguec. Qalaxayi da ÿoqta aÿim qaÿamaxalec da so'ot damayi, qaq 'eesa da ÿoqta aÿim ipataxalec de'eda ñi Dios.

¹⁸ Qaq ÿoqo'oyi de'eda ñishiitenaguec nachida da ñitonaxac da sa'axattac ca n'aqtac mayi chigaqaigui da nca'alaxa da sa ishit da aÿim qaishiiteetac. Qaq sa ishit da aÿim shictega da shinec da huo'otaq seque'etapigui da i'aqtaxanaxac.

¹⁹ Nai'ctaxa da qaica ca aÿim l-latac, qalaxayi se'enaxat da 'ico' aÿim l-latac 'enauac na shiÿaxauapi, yaqto' ÿataqta saqalota na ÿaueguec shiÿaxauapi da i'amaqten so Cristo.

²⁰ Naxa da sootaigui na judío l'ecpi, nachi se'enaxat da lliquiaxac namayipi, yaqto' ishit da ñauec. Namayipi quetague' da lliquiaxac na nqataxacpi mayi chigoqo'ot so Moisés. Qaq nataq'en aÿim souaxaÿot na nqataxacpi, nai'ctaxa da sa ishit da ÿoqta shictague' ne'ena nqataxacpi.

²¹ Qaq naxa da sootaigui na sa ishit da quetague' na nqataxacpi mayi chigoqo'ot so Moisés, nachi se'enaxat da lliquiaxac namayipi, yaqto' ishit da ñauec, nai'ctaxa da aÿim 'eesa da shictague' da lliquiaxac na lqataxacpi ñi Dios, cha'ayi mashi sooto'ot na lqataxacpi so Cristo.

²² Qataq naxa da sootaigui na saxanaxa da da'añi da lpi'iÿaxac, nachi se'enaxat da 'ico' qaica ca l'añaxac da ipi'iÿaxac, yaqto' ishit nataq'en da ñauec namayipi. Qaq ÿataqta ñacoola't da se'enaxatchigui da lliquiaxac ñi 'oonolec na ÿotta'a't shiÿaxauapi, yaqto' ishit da huo'o ca ÿigueuo da huo'o ca ñica'alaxateec namayipi.

²³ Qaq 'eda 'enauac da shiitec souaxat da n'aqtac mayi chigaqaigui da nca'alaxa, yaqto' ishit da nataq'en aÿim ñiuanau'a ca chigaqaigui de'eda n'aqtac.

²⁴ Qami' mashi qauaÿajñi da huo'otaq huo'o aca aloxo, qaq 'enauac na nqomittac ÿataqta nqalgoqchin, qalaxayi 'oonolec ca ÿaconguet ca nshiitenaxanaxat. Qaq qami' ÿataqta qanqalgoqchiñi qome, yaqto' qauacoñiiguet ca nshiitenaxanaxat.

²⁵ 'Enauac na naÿamaxattac da tau'a ca qomitaxac, ÿataqta ndenguet 'enauac nam ishit da n'aqchit. Namayipi 'eetec de'eda, cha'ayi nshitaique da nauec aca ado'o mayi qo'ipaq laue acam saqaÿaloq da daqaqa. Qalaxayi qomi' sauoqtaique da ñauegaq acam sa ishit da huo'o ca loga't.

²⁶ Qaq aÿim 'eda da ñaloxoyaxac, sa ishit da chochi ñaqalgoqtapecda'. Qataq da ñiuaxanaxac sa ishit da chochi seuaxaatapecda'.

²⁷ Chaqdata da aÿim souaxan da maichi i'oquiaxac da ÿataqta ÿalaq ñaq'en, yaqto' sa ishit da aÿim sa qaÿalegaqneuo qom ime da sapaxagueetac ca iÿa.