Solomon la 1 - Tedim Bible Revision 2017

¹ Solomonʼ la ngaih pente:

Dawng Khatna Nungak

² Na muk tawh nong tawp a, na hong itna leenggahzu sangin khum zaw hi.

³ Na omna khempeuh nam vuauvuau a, na min kizaza a, nungak khempeuh in nang hong ngai hi.

⁴ Hong kai inla zawltai ni. Ka kumpi hong hi inla, na inn ah hong ciahpih in. Nang tawh om leeng i lung dam hi; leenggahzu ne-in nuamsa ni. Nang kong ngaih khak tuahpha ing.

⁵ Jerusalem nungakte aw, ka vom hangin ngaihbaang ing. Savun puanbuk bangin ang hiuhiau ing a, Solomonʼ puankhaite tawh kei ka kibang hi.

⁶ Ka vom manin hong en neu kei un. Nisa ka thuakna hang ahi hi. Ka ute in kei hong gawtbawl uh a, lo hong kuan saksak uh a, ka pumpi ka don man kei hi.

⁷ Ngaihno aw, hong gen dih in. Koi lai ah na tuu cing dinga, sunin koi lai ah khawl ding na hi hiam? Bang hangin tuucing dangte lakah nang hong zong kawikawi masa se ding ka hi hiam?

Tangval

⁸ Nungak khempeuh lakah a ngaihbaang pen nungak aw, a mun thei lo na hi hiam? Tuuhonte zui-in na keelte hong khah inla, tuucingpaʼ puanbuk gei ah hong cing in.

⁹ Ngaihno aw, Faroʼ sakoltal in sakolpite a delh bangin nang hong kidelh hi.

¹⁰ Na biang tuakah a kai suk na samphekte ngaihbaang a, suangmanpha bangin na liangko tungah kinga hi.

¹¹ Nangma adingin kham khainiang bawlin na kizepna ding zong ngun tawh bawl ni.

Nungak

¹² Ka kumpipa a lupna tungah a om laitakin ka paknamtui hong kizel hi.

¹³ Ka ang ah ka ngaihno hong lup laitakin myrrh paknamtui bangin namtui viauviau hi.

¹⁴ Ka ngaihno pen Engedi gam leenggui lo ah a palh lihleh pak hoihte tawh kibang hi.

Tangval

¹⁵ Ngaihno aw, na mel hoih a, na mit zong ngaihbaang hi.

Nungak

¹⁶ Ngaihno ngingei aw, na etlawm a, na ngaihhuai hi.

¹⁷ I lupna mun lopa tung hi dinga, taamtak kungte i innkhuam hi-in, taaksan hiangte i inn tungdap hi ding hi.