Paunak 25 - Tedim Bible Revision 2017

Et kakna le Theihhuai Thute

¹ Judah kumpi Hezekiahʼ lai-atte in a teikhiat uh Solomonʼ paunak dangte:

² Pasian in thu a ip manin a min thang a, kumpite in thu a genkhiat manin minthang uh hi.

³ Vantung sang lua-in lei sung a thuk luat mah bangin kumpipaʼ ngaihsutna thuk lua-in kithei zo lo hi.

⁴ Ngun a ek teng paikhia lehang sikseek pa in na hoihpi piangsak thei hi.

⁵ Kumpipa kiang pan migilote nil khia lehang thumanin ama ukna kip thei bek hi.

⁶ Kumpipa mai ah na om ciangin mi lian kineih kei inla, mi lianteʼ tut nading munah tu kha kei in.

⁷ Uliante a awn dingin hua lai ah va tu suk in, hong kicih sangin hih lai ah hong tu to in, hong kicih ding hoih zaw hi.

⁸ Thu khatpeuh na theih ciangin thukhen zum tun pah kei in. Na veengpa in nangʼ khialhna hong lak telkik leh nang bang lawh nawn ding na hi hiam?

⁹ Na thu neih pih na veengpa bek mah tawh thu kiseel inla, mi khatʼ thusim midangʼ tungah genthang kei in.

¹⁰ Tua hikeileh amah hehin nang hong maizumsak dinga, na min siatna bei ngei nawn lo ding hi.

¹¹ A kilawm hunin kammal khat pau khiatna pen ngun pek tunga kham pek khat a kisuang tawh kibang hi.

¹² Hilhna a sang thei mipa adingin a pil thuhilhpa pen kizepna kham bilbah tawh kibang hi.

¹³ Amah a sawlte tungah a citak kamtai pa pen an lak huna tuivot tawh kibang a, a toteʼ lungsim thaksuaksak hi.

¹⁴ Bangmah a piak lohpi a kisialh pih pa pen guah a zusak tuan lo meiipi le huihpi nung tawh kibang lel hi.

¹⁵ Lungduai a zolzolna tawh gam ukte kizo thei a, kam nemin pauna tawh aana neite kizo thei hi.

¹⁶ Khuaizu na nek ciangin a hoih khop bek zah ne in. Tua hikeileh kham lua-in na lua ding hi.

¹⁷ Na veengteʼ inn ah hawh mun lua kei in. Hong cimtakin hong mudah kha ding hi.

¹⁸ A lawmteʼ lang khat ah teci man lo a pang mi pen molhtum, namsau, ahih kei leh thal hiam tawh kibang hi.

¹⁹ Haksat hunin a zuau tat mi muanin neih khakna pen hana, ahih kei leh khebai tawh kibang hi.

²⁰ A dah a lungkham mipa kiangah lasakna pen khua dam laitakin puan suahkhiat tawh kibang a, meima ci-al nuh tawh kibang hi.

²¹ Na galte a gil a kial leh an pia inla, a dang a taak leh tui pia in.

²² Tua hileh amauʼ maizum nadingin a bawl na hi a, Topa in nang tungah thaman hong pia ding hi.

²³ Leilu lam huih in guah a zuksak bangin gensiatna in hehna piangsak hi.

²⁴ Phun bek a thei zi tawh inn sungah ten khop sangin inn khumzang kiu khat ah tangten hoih zaw tham hi.

²⁵ A dangtak mipa in tuivot lim a sak bangin gamlapi-a om lawmteʼ kiang panin thu zak nuam kisa hi.

²⁶ Mihoih khat in mihoih loteʼ gamtatna a zuih khak ciangin hawktui nin, ahih kei leh tui uih tawh kibang hi.

²⁷ Khuaizu a tam lua nek ding a hoih loh bangin phat ding deih luatna a hoih lo ahi hi.

²⁸ Ama lungsim a ki-uk zo lo mipa pen dalna kulhpi a nei lo khuapi tawh kibang hi.