Late 108 - Tedim Bible Revision 2017

Pasian Phatna le Gualzawh nading Ngetna

¹ Pasian aw, ka lungsim a kiging sa-in om hi. Ka sa ding hi; nangmah phatna late ka sa ding hi. Kei ka khanglo ding hi.

² Harp lasakna le laiza lasakna aw, khanglo un. Zingsang khuavak hong phong ning.

³ Topa aw, mite lakah nangma tungah lungdamna kong ko dinga, minam dangte lakah nangma tungah phatna ka sa ding hi.

⁴ Bang hang hiam cih leh na itna kip in vantung ban a, na thumanna in meiipite ban to hi.

⁵ Pasian aw, vantungteʼ tungah sang to lai in. Leitung khempeuh ah na minthanna omsak in.

⁶ Nangma it mite, na hatna tawh hon inla, kong ngetna bangun hong pia in.

⁷ Ama biakinn sungah Pasian in thu ciam khin a, “Gualzo a lungdamna tawh Shekhem gam khen khia-in, Sukkoth gam kuam ka seh khia ding hi.

⁸ Gilead gam keima aʼ hi a, Manasseh gam zong keima-aʼ mah ahi hi. Efraim gam ka sik lukhu hi a, Judah gam ka ciangkhut ahi hi.

⁹ Moab gam ka kisilna kuang hi a, keima neihsa hi, cih lahna limin Edom gam tungah ka khedap ka lawn hi. Filistia gam tungah gualzawhna tawh ka awng hi,” a ci hi.

¹⁰ Kua in khuapi muanhuai ah kei hong paipih ding hiam? Kua in Edom gamah kei hong paipih ding hiam?

¹¹ Pasian aw, nangmah in kote hong don lo khinta hi lo na hi hiam? Pasian aw, komau galkapte tawh na kuan khia kei hi.

¹² Ka galdona uh ah kote hong huh in. Bang hang hiam cih leh mihingʼ huhna a mawkna hi.

¹³ Pasian tawh khauh takin i hih ding hi. Amah pen i galte hong sikcipsak ding pa ahi hi.