Late 107 - Tedim Bible Revision 2017

BU NGANA ( La 107—150 ) Mihingte a Hot Manin Lungdamkohna

¹ “Topa tungah lungdam ko un; bang hang hiam cih leh amah hoih a, ama itna kip tawntung!”

^2-3 Tu-a teng mah, nisuahna le nitumna, leilu lam le leitaw lam, leitung pan a ama kaihkhop, galteʼ khut sung panin a hong hotkhiat mite in ci kikkik ta uh hen.

⁴ Pawl khatte gamlak ah gammang uh a, a ten nading uh khuapi tunna lampi mu zo lo uh hi.

⁵ Gilkial dangtakin amaute sibup uh hi.

⁶ Tua ciangin amaute in a lungkhamna uh ah Topa ko uh a, amauʼ cihmawhna panin amah in a hon khia hi.

⁷ Amauʼ ten nading khuapi a tun matengun amah in lampi man ah amaute a paipih hi.

⁸ Ama itna kip le mihing tate tungah a lamdang ama sepnate hangin amaute in Topaʼ tungah lungdamna ko ta uh hen.

⁹ Bang hang hiam cih leh amah in a gilkial a dangtakte phasak a, bangmah a nei lote tungah na hoih tampi a pia hi.

¹⁰ Pawl khatte, khuamial sung, a zing sungah tu uh a, sikkol kibulhin gimna thuakin thong kia uh hi.

¹¹ Bang hang hiam cih leh amaute in Pasianʼ thu sel uh a, Sangpen paʼ thugente a nial uh hi.

¹² Nasep haksa tawh amauteʼ lungsim niamsak hi. Amaute puk uh a, a huh ding kuamah om lo hi.

¹³ Tua ciangin amaute in a lungkhamna uh ah Topa ko uh a, amauʼ cihmawhna panin amah in a hon khia hi.

¹⁴ Amah in khuamial sung le a zing sung panin amaute la khia a, amau a kihennate a bot sat hi.

¹⁵ Ama itna kip le mihing tate tungah a lamdang a nasepnate hangin amaute in Topa tungah lungdamna ko ta uh hen.

¹⁶ Bang hang hiam cih leh amah in sumngo kongkhakte sukhamin sikzawlte tum nih a suah hi.

¹⁷ Pawl khatte amauʼ khialhna hangin a ci uh na a, a mawhna hangun gimna a thuak uh hi.

¹⁸ Amaute in an peuhmah kih uh a, sihna kongpi tawh amaute kinai ta uh hi.

¹⁹ Tua ciangin amaute in a lungkhamna uh ah Topa ko uh a, amauʼ cihmawhna panin amah in a hon khia hi.

²⁰ Amah in thu vaikhakin amaute damsak a, siat nading panin amaute a hon khia hi.

²¹ Ama itna kip le mihing tate tungah a lamdang a nasepnate hangin amaute in Topa tungah lungdamna ko ta uh hen.

²² Lungdam koh piaknate pia-in ama nasepnate lungdam la tawh amaute gensak un.

²³ Pawl khatte, teembaw tawh tuipi ah pai uh a, tui liante tungah sum bawl na a sem uh hi.

²⁴ Amaute in tui thuk tungah Topaʼ gamtatna a lamdang a septe a mu uh hi.

²⁵ Bang hang hiam cih leh amah in thu pia a, tuipi hualte a piangsak huihpi a nungsak hi.

²⁶ Amaute, vanah kilawn to-in, a thukna ah kia suk uh hi. A lauhuai siatna sungah amauʼ lungsim hanna a bei hi.

²⁷ Amaute zukham bangin hoi suk hoi to uh a, a cih nading mel uh thei nawn lo uh hi.

²⁸ Tua ciangin amaute in a lungkhamna uh ah Topa ko uh a, amauʼ cihmawhna panin amah in a hon khia hi.

²⁹ Amah in huihpi daisak a, tuipi hualte a bei hi.

³⁰ Tua ciangin, tua tuihualte a khawl manin amaute a lungdam uh hi. Amah in amauteʼ utna khua ah a paipih hi.

³¹ Ama itna kip le mihing tate tungah a lamdang a sepnate hangin amaute in Topa tungah lungdamna ko ta uh hen.

³² Amaute in mihon kikhopna sungah amah pahtawi-in, upateʼ kikhopna sungah amah phat ta uh hen.

^33-34 Amah in, a tunga a teeng mihingteʼ gitlohna hangin gunte sehnel gam suaksakin ciktuite lei keu suaksak a, an tampi a pianna leitang pen ci-lei a suaksak hi.

³⁵ Amah in sehnel gam pen bualtuite suaksak a, leitang keu pen ciktui a suaksak hi.

³⁶ Amah in tua munah gilkialte tengsak a, a ten nading uh khuapi amaute in a sat uh hi.

³⁷ Amaute in lo ah an tuhin leenggui suan uh a, a gah tampi tak a ngah uh hi.

³⁸ Ama thupha piakna hangin ante nakpi takin pung a, amauʼ bawngte zong kiamsak lo hi.

³⁹ Amaute pen nenniamna, haksatna le dahna tawh khiam suk gawpin a kiniamkoih suk ciangin

⁴⁰ amah in, amau a bawlsiate tungah simmawhna buak sukin lampi om lohna gam sungah amaute a vakvaisak hi.

⁴¹ Ahih hangin amah in amauʼ thuakna sung panin a cimawhte laam to a, tuu honpite bangin amauʼ innkuante a pungsak hi.

⁴² Lungsim thutangte in hih thu mu-in kipak uh a, a gilote in ahihleh amauʼ kam a cih ciat uh hi.

⁴³ A pil peuhmah in hih thute don henla, Topaʼ itna kip lung ngaingai tahen.