Sikaraya 1 - Udél Dwata: Gna Kesfasad ne Lomi Kesfasad

Ktaba Dwata yó kem tauhen anì bud le semfulék ebéléen

¹ Tikóng bè yóm gwoluhen bulón bè yóm gewuhen halay kogot Daryus yóm benwu Pérsya, wen udél Dwata ebè yóm sotu tugoden boluyen Sikaraya yóm ngà Birikaya témê Idu.

² Yó mon Dwata mò du, “Ou se yóm Dwata tehe alì lembut yó kem tehe fù ye.

³ Yó gónóm mon hol tulónem yó kem tau, monem mò kul, ‘Ni se udél yóm Dwata laen dù là gbeken du, monen, Semfulék ye ebéléu anì bude semfulék ebélê ye se do.’

⁴ Bê ye abay dnalang kul kmò yó kem tehe fù ye ekni, balù udì ke hnungol le yóm gel tulón le kul yó kem tehe gel tugodu elem blóng le, yóm tehe kmon le du mò kul, ‘Ni se udélen ebélê ye yóm Dwata laen dù là gbeken du, monen, Knogol ye ne yó kem sidek gel nmò ye, hol tenflok ye ne.’ Okóm balù udì ke hnungol le o duhen ke nimón le o.

⁵ Yó kem tehe fù ye ne yó kem tehe gel tugodu elem blóng le, deng le gotu matay se kul.

⁶ Okóm tódô kdê yó kem hetgamahu kul hlanu bè yó kem tehe tóbóng lówóhu, duhen yó kem tugodu ekni, deng gotu gefet bè yó kem tehe fù ye. Omin le yó hegsel, mon le, ‘Ni se balà Dwata du yóm gel nmò tekuy yóm Dwata laen dù là gbeken du. Deng dnohoen yóm tehe deng monen.’ ”

Yóm tanay hton Dwata ke Sikaraya

⁷ Timbow bè yóm gewuhen folò fat kdaw bè yóm gesfoloen sotu bulón bè yóm gewu halay kyón Daryus, bud wen udél Dwata ebè yóm tugoden Sikaraya ngà Birikaya témê Idu. Yó kmò ktulón Sikaraya du, monen,

⁸ Bè yóm kifu yó, wen hton Dwata do. Tonu yóm tau smakay kudà hulô, mdà lem blóng yó kem koyu mirtol bè yóm ngà datal. Ne wen kudà hulô ne kudà bulow ne kudà bukay tonu, bede hono wen smakay kul sentu yóm tau.

⁹ Ominu smólók yóm hógów Dwata gel stulón do, “Ó Sér, tedu nmò le yó kem kmudà yó?” Bnalaen se o, monen, “Toloku kóm.”

¹⁰ Tahu se, ominen mudél yóm tau smakay kudà hulô mdà lem blóng yó kem koyu mirtol, monen, “Lu se yó kem dók Dwata mò na a hmalak temngel yóm klamang benwu.”

¹¹ Ominen yó kem kmudà yó koni, mógów le ebè yóm hógów Dwata mdà lem blóng yó kem koyu mirtol, mon le mò du, “Deng hnalak me ne yóm klamang benwu ne tey menek yóm klamangen.”

¹² Bè yóm kungolen du yóm tulón le du yó, yó nmoen mni bè Dwata, monen, “Ó Dwata, yóm Dwata laen dù là gbeken du, deng hitu folò halayen ni ne yóm tendo kebutem du yóm syudad Jirusalim ne yóm benwu Juda. Kegenen de yóm alì kebutem ni efet bud knoduhem lu?”

¹³ Timbow deng knihen, ominen mudél ebè yóm hógów Dwata gel stulón do, hono yóm udél mò temgel nawahen.

¹⁴ Ominen mudél ebéléu yóm hógów Dwata gel stulón do, monen “Ni se udél yóm Dwata laen dù là gbeken du, monen, ‘Yóm kbong nawahu yóm syudad Jirusalim dalang se yóm Bulul Sayun, laen kô dù semnged du.

¹⁵ Okóm yó du kem tólóng benwu laen dù hemen le ne menek kbenwu le, tey kebutu kul. Yóm kebutu yó kem dou tau, olon udì. Okóm yó du kem tólóng benwu, tey gulé ktafak le kul.

¹⁶ Yó gónóm mon, yó bud udél Dwata, monen, Denge bud mulék ebè Jirusalim lanu kmodu yó kem dou tau. Angat bud tenlob le yóm dou Gónô bè yó, dalang se yóm dou syudad, angat bud hdà le. Yóm Dwata laen dù là gbeken du nim mudél ni.’

¹⁷ Yó bud heglalagem, monem, ‘Yó udél yóm Dwata laen dù là gbeken du, monen, Yó kem benwu lemnek bè Israél, angat tey bud kehyu klowil le yó kem tauhen. Dalang se yó kem tau bè Sayun, angat tey bud ketgelu kul, angat bud néléku Jirusalim mò dou.’ ”

Yóm gewu hton Dwata ke Sikaraya

¹⁸ Ominu mkay ketngelu, tódô tonu yó kem fat hanga ógóf.

¹⁹ Snólóku yóm hógów Dwata gel stulón do, “Boluyen se yó du?” Bnalaen se ou, monen, “Yó kem hanga yó, hnigad le yó kem benwu alì mfasang fen semkla yó kem tau bè benwu Juda ne bè benwu Israél ne bè Jirusalim.”

²⁰ Ominen wen fat kem tau msól bud hton Dwata do.

²¹ Bud snólóku, “Tedu se kul nmò yó kem tau yó?” Bud bnalaen se ou, monen, “Yó nmò le na le e hnikò yó kem hanga deng semkla ne hemgnok yó kem tau bè Juda. Ne tódô gotu genlà le lu.”