Kem Udél Hlalak Tehe Selumun 8 - Udél Dwata: Gna Kesfasad ne Lomi Kesfasad

Kehyu yóm khulung hedem

¹ Hnungolem. Yóm khulung hedem lemwót bè Dwata lómón ke tau tendo tmaba. Dalang se yóm khulung temnef, hgelen se kun udél.

² Yó gónón mdà hatu bè yóm gónón mfatu moni bè lan ne bè yó kem gónón sesyat lan.

³ Tmaba seblà bè yó kem lan husek e lem benwu bong ne tódô keten yó kem bak sut gónón e tmaba.

⁴ Yó utóm tabahen, monen, “Ebélê ye kem logi, gónóhu e tmaba. Tódô kdéen tau gónón e gbak nim udélu ni.

⁵ Yu kem tau là dengen ngelem kehedemen hol dnalang ye yóm khulung milô. Yu kem tau book hol kenmón ye yó kem udélu.

⁶ Hnungol ye, wen tey knóón tulónu kuy ne kdéen lemwà gu lem baku hono tedeng.

⁷ Sok fes yóm tulónu hono ktahuhen, yakà teyen sidek keklitu du yóm kéng.

⁸ Tódô kdê yó kem udél btang gu lem baku hono tedeng. Laen kô kéng du duhen ke gónón seblékê.

⁹ Ni kem udélu ni tey mtukul bè yó kem tau hulung temnef ne tedeng bè yó kem tau temngón.

¹⁰ Hol nélékem yóm dou hlau senta tembaga futì ne nélékem yóm ketngón senta yóm tahu blówón.

¹¹ Yakà khulung hedem du yóm mkay senta kem kimu legen mebtes, là se wen bud dumu nóyóem ke gemsenged du.

¹² Ou se yóm khulung hedem gónón gu yóm khulung tau milô. Bud ou se gónón gu yóm ketngón tau ne khulung tau mit du hyu yóm kun kmò.

¹³ Yóm tau kmikò ke Dwata hol knutó nawahen yóm sidek. Dalang se do, knutó nawahu yóm kehegmón ne yóm keheklabak. Knutó nawahu snéen yó kem nmò sidek ne yó kem mò udél seblékê.

¹⁴ Béléu se gónón gu yó kem atul hyu ne khulung mit du hyu yóm kmò ktau. Ne bud ou se gónón gu yóm khulung temnef ne kfasang.

¹⁵ Lemwót béléu yóm khulung le mogot benwu yó kem tau hol geta. Lemwót béléu se yóm khulung le mò yó kem udin tedeng yó kem smugung bélê le.

¹⁶ Lemwót béléu se yóm khulung le mogot benwu yó kem tau gel malak ne yó kem tau smugung bélê le tedeng kmò le.

¹⁷ Bong nawaw du kihu tau kembong nawa do ne kihu tau hol mebel do tonen o.

¹⁸ Béléu se gónón gu lemwót yóm kendengen laen tul ksideken ne yóm kdóyón, ne yóm ktedengen ne yóm kehyu klowil.

¹⁹ Yóm guta ye béléu mkay senta yóm hol tahu blówón ne mkay senta yóm tembaga futì alì megélék yóm blayu kuy.

²⁰ Yóm dou kmò klan sal mlan bè ktedengen ne sal hlanu bè yóm là keskihuhen.

²¹ Yó kem kembong nawa do sal gel blayu kul yóm mò kendengen le ne tódô hennoku kimu yóm gónô le.

Gónón lemwót yóm khulung hedem

²² Gu laan Dwata là deng mò du yó kem dumu nmoen ekni deng sana gegna ne kmoen do. Ou yóm khulung hedem yóm hol tanay nmoen.

²³ Gu laanen là deng wen benwu he deng sana yó ne nim ou.

²⁴ Gu laanen là deng wen yó kem mohin ne gu laanen là deng wen yó kem tbul él deng sana yó ne nim o.

²⁵ Gu laanen là deng wen yó kem bulul lembang ne gu laanen là deng wen kem bulul lemnek deng sana yó ne nim o.

²⁶ Gu laan Dwata là deng mò yóm klamangen benwu ne yó kem numahen ne balù yóm kbut kmoen yóm tonok deng sana yó ne nim o.

²⁷ Nóe ditu se bè yóm tehe kehnóen kul bè gónó le nô yó kem longit ne bè yóm kesgawagen longit ne yóm mohin.

²⁸ Ne bude se nô bè yó bè yóm le kehnóen du te kmawang yó kem lobun ne yóm ktukéhen yó kem sfut mohin.

²⁹ Ne bude se nô bè yó bè yóm koluhen kem él mohin, yóm kmonen du hol bê le nulé yóm bengelen du. Ne bude se nô bè yó bè yóm kehbegelen yóm klamangen tonok.

³⁰ Tehehe nô bè soluhen lómón yóm tau gel malak bè kmò nmò. Ou se yóm kun gónó hligal ket kdaw ne gele hligal se do bè soluhen.

³¹ Ne hligale du snéen yóm benwu nmò me ne yó kem tauhen.

Kmò yóm tau hulung hedem

³² Duhen ni kem ngà, hol hnungol ye o. Wen kligalen yóm tau mimón do.

³³ Hol hnungol ye yóm gel toloku kuy ne hfulung ye hedem ne hol bê ye kenbê.

³⁴ Wen kligalen yóm tau gel hmungol do ne ket kdawen se tendo mingat do bè bak sut ne eles nangaten ou bè bak dólu.

³⁵ Yakà yóm tau mton do tonen se kehyu klowilen ne gutahen yóm kehyu nawa Dwata ebéléen.

³⁶ Okóm yóm tau là tonen do hensideken knóen. Kdê yó kem kembê do kenbong nawa le yóm hatay.” Ni se koni yó kem udél yóm khulung hedem.