Nihimaya 9 - Udél Dwata: Gna Kesfasad ne Lomi Kesfasad

Kebkas le du ebè Dwata yó kem salà le

¹ Bè yóm gewuhen folò fat kdaw bè yóm bulón yó, gotu le bud stifun yó kem tau Israél. Bè yóm kestifun le ni là mken le, gotu le lemsek nes sakù ne hensù le kfung ta kulu le mò gónó le hegfan yóm tey kegbeng lem le.

² Tódô kdê yó kem tau Israél, gotu le hetsik gu bè yó kem tólóng tau nô lem blóng le ne yó nmò le, gotu le mdà ne gotu benkas le ebè Dwata yó kem salà le ne salà yó kem tehe fù le.

³ Wen dô tlu udas kegen le mdà bè yó ne wen fen semfala du lem blóng le yóm hlau Dwata yóm sana kul Dwata hol gónó mogot. Ne bud tlu uras le se kegen le bemkas du yó kem salà le ne sbol dóyón le Dwata yóm sana kul Dwata hol gónó mogot.

⁴ Wen seel geta gónó le mdà yó kem sfu Libay, le Jéswa ne Bani ne Kadmiyél ne Sibaniya ne Buni ne Siribiya ne yóm sotu Bani ne Kinani. Hgel le udél le mni bè yóm sana kul Dwata hol gónó mogot.

⁵ Ominen bud wen bè yó kem sfu Libay fen mbut du yóm ktaba le ebè Dwata, duhen le Jéswa ne Kadmiyél ne Bani ne Hasabniya ne Siribiya ne Hodiya ne Sibaniya ne Pitahiya. Yó udél le, “Gotu tekuy mdà. Hol dóyón tekuy yóm sana kut Dwata hol gónó mogot. Yóm kun klowil laen dù buten ne laen se dù sónen. Hol dóyón tekuy yóm tey klinggel yóm kun boluy. Là kô gbek tekuy hmingón du yóm tey kegetahen.”

⁶ Omin le gotu mni bè Dwata yóm kdéen tau Israél, mon le, “Tek són uu Dwata, yóm Dwata hol gónó mogot, tek sotuhem. Uu se mò du yóm longit ne yó kem blotiken. Uu se mò du yóm tonok ne yóm kdê nô tahen. Ne bud uu se mò du yóm mohin ne kdê yó kem nô lemen. Uu se hlowil kul yóm kdéen. Ne kdê yó kem hógów Dwata nô bè longit, gotu le heglaan béléem ne dóyón le uu.

⁷ Uu se yóm Dwata hol gónó me mogot tehe mélék ke Abram ne nwitem gu bè syudad Ur, yóm syudad glem lem Babilun ne deng tles boluyem du Abraham.

⁸ Bè yóm deng ktonem yóm tey kteneben béléem, yó gónón wen senfasad ye. Yó fasadem du, blayem du yóm kul tonok yó kem tau Kanan ne yóm tonok yó kem tau Hitayt ne tau Amurayt ne tau Pirisayt ne tau Jibusayt ne tau Girgasayt. Yóm tonok fasadem du ni mò gónó le menwu yó kem angat semfu gu béléen. Ne là kô klifótem du yóm deng fasadem du yó abay se là kóen mili nawahem.

⁹ Tonem se, Dwata, yóm tehe tey keglayam le bè Idyip yó kem tehe fù me ekni. Gungolem se yóm tey kni le tóbóng béléem bè yóm knô le bè Mohin Hulô.

¹⁰ Wen kem tey knikò tehe nmoem bè yóm tau hol geta bè Idyip ne bè yó kem genlalen dalang se bè yó kem tauhen abay se deng eles tngónem yóm tey kehegnok le yó kem tauhem yó kem tau Idyip. Lemwót bè yóm kegmoem, Dwata, yó se gónóm tótól efet yóm kmoen ni.

¹¹ Deng tehe tódô wen lan nmoem lem mohin mò lan yó kem tauhem ne deng nwitem lu lemen mlan le bè gónón mékéng tonok. Okóm yó kem tau kemtes kul, gotu henebem lu bè yóm tey mohin nelem. Gotu le lemneb, lómón kmò le lómón ke lemneb etlaan yóm botu bè yóm tey lewók mohin.

¹² Yó kem tauhem yó, wen lobun htukóem gna kul ke kemdaw mò gónó le galak ne ke kifu wen ofi mò hlayag lan le.

¹³ Ditu bè Bulul Sinay gónóm tehe mnaul ebélê le lemwót gu bè longit ne bè yó gónóm mudél ebélê le. Wen tey hlau tedeng blayem kul ne wen tey hyu hloloem kul.

¹⁴ Deng hetfingem bélê le yóm sotu kdaw mò kdaw le hegnô. Ne wen dumu hlauhem kul hlanem bè Musis yóm tau tóbóng lówóhem.

¹⁵ Bè yóm tehe kbitil le, wen ken blayem kul gu bè longit ne bè yóm tehe kleeng le tódô wen él hesutem gu lem botu. Deng tehe hógówem lu anì nwa le yóm tonok deng fasadem kul.

¹⁶ Okóm yó kem tehe fù me yó deng le mom heklabak, mgel kulu le, là kô nimón le du yó kem hlauhem kul.

¹⁷ Là móyô le hmungol, gotu klifót le yó kem dê hentaw ton deng tehe nmoem lem blóng le. Deng kenbê le uu, deng le mom mélék tau mò malak kul mulék ghesek bè Idyip. Okóm uu se yóm Dwata hulung hmifót, tey minggel nawam ne tey bong nawam yó kem tauhem, là kói mahil lembut. Tey kkoduhem kul yó kem tauhem, là kô nam e tódô bayà kul.

¹⁸ Wen dwata lenbù tehe nmò le lómón tô ngà safì tudu kmò le du ne mon le yó se yóm dwata tehe lemwà kul gu bè Idyip. Bè yóm nmò le yó, Dwata, tey kehwog le kóm.

¹⁹ Okóm lemwót bè yóm kkoduhem kul, là tódô bayaem kul matay ditu lem yóm benwu laen hol wen tauhen. Là kô kóhem du bélê le yóm lobun malak kul ke kemdaw, dalang se yóm ofi mò hlayag kul ke kifu.

²⁰ Tey hyu yóm gel tolokem kul mlan bè Tulusem. Là kô tenflokem du yóm mana gel hkenem kul dalang se yóm él gel hinumem kul.

²¹ Lem yóm fat folò halay le nô lem yóm benwu laen hol wen tauhen, tódô blayem kul yóm kdê wen mu le du. Yó kem nes le, laen kô dù tul kbolok le ne là se kóen lembóg ti le lemwót bè yóm gel kógów le.

²² Tey dê kem benwu mbegel gónóm hegmò kul, gomong yóm dê but tau nô lemen. Deng eles wen kem benwu mayuk tehe eles tgamahem kul, duhen yó sem tonok Hisbun, yóm benwu nogot Sihun ne tonok Basan yóm benwu nogot Ug.

²³ Tey kehbólem kul yó kem tauhem lómón kwen le kem blotik bè longit. Sal gel hegmoem lu bè yó kem hohon le ne suem lu ta yóm tonok tehe fasadem yó kem tehe fù le.

²⁴ Deng gwa le yóm tonok bè Kanan, laen kô dù gmò le béléem yó kem tau menwu bè yó. Tódô blayem lu elem hólól yó kem tauhem, anì tódô nmò le yóm kul knóyô bè yó kem tau bè Kanan ne bè yó kem tau hol geta bélê le.

²⁵ Deng gwa yó kem tauhem yó kem syudad alì mbegel ne yó kem tonok alì tembas. Gwa le snéen yó kem gónô deng tódô ket du nô lemen ne eles mdengen se kokol le. Tódô glo le bè yó se yó kem tey genged bungu koyu, kem bungu grép ne yó kem bungu koyu ulib ne yó kem dumu koyu mungu. Laen dù gónó le élél bè ken, yó gónó le gotu baling mabù. Tey gsengel nawa le du yóm kdéen hyu deng blayem kul.

²⁶ Okóm yó kem tauhem, Dwata, là kô dog nimón le kóm, deng mom kenbê le uu. Knogol le yóm hlauhem kul. Tódô hnatay le yó kem tugodem gel tô mit kul semfulék ebéléem. Ne deng mom nmò le yó kem alì kenbéem.

²⁷ Yó gónóm mon, tódô blayem lu elem tdok yó kem hohon le. Okóm timbow deng wen gfà le, yó he kni le tóbóng ebéléem. Ne gungolem dyó bè longit yóm kni le ebéléem ne bnalaem lu. Lemwót bè yóm tey kkoduhem kul, yó gónón wen tau hógówem mò lemwà kul lem tdok yó kem hohon le.

²⁸ Timbow deng bud menek kbenwu le, mom bud nmò le yóm kenbéem bélê le ne yó gónóm bud hemlus kul elem hólól yó kem hohon le. Okóm bè yóm bud kehegsel le, tey kni le béléem anì lenwaem lu. Ne tahu se, gungolem dyó bè longit yóm kni le ne lemwót bè yóm tey kkoduhem kul, tey dê dulékem lemwà kul.

²⁹ Deng eles hetgamahem kul, Dwata, yóm angat ktafakem kul ke là nimón le du yó kem hlauhem. Okóm lemwót bè yóm tey keheklabak le, deng mom nulé le yó kem hlauhem igò le temngón du lemwót bè yóm kimón le du gónó le mowil. Tey kem tau mgel kulu, deng mom knogol le uu, là kô dog hnungol le kóm.

³⁰ Deng tey hilu halayen ne yóm tendo khanayem nawam lem blóng le. Kóm Tulus se fen gel hudél yó kem tugodem, okóm deng le mom hbokong yó kem tauhem. Yó gónóm mon, bud hlusem lu elem hólól yó kem tólóng but tau.

³¹ Okóm lemwót bè yóm alì kkoduhem kul, là kô dog bayaem kul ne là se dog genlaem kul. Tey minggel nawam yóm uu, Dwata, ne tey kkoduhem tau.

³² Ó Dwata yóm sana kum Dwata, uu se yóm hol dandónen geta, yóm hol knóón bang knikò, yóm alì mfasang. Là kóen na a mkó bè nawahem yóm tehe senfasad ye yó kem tauhem. Lenwóten bè yóm tehe alì kdà le kum elaan yó kem tau hol geta bè Asirya efet ni kmoen ni, tey keglayam me. Deng tonem se yóm tey keglayam me yóm kdê me, yó kem tau hol geta bélê me ne yó kem malak kum ne yó kem tau gel blóng me ebéléem ne yó kem tugodem ebélê me ne yó kem fù me ne kdê yó kem dumu me tey keglayam le.

³³ Laen kô gónón sidek yóm ktafakem kum, Dwata. Là kóen monol yóm nawahem ebélê me, balù yóm deng kmò me du yóm kenbéem.

³⁴ Yó kem fù me ne yó kem tau hol geta bélê me ne yó kem gónó me galak ne yó kem tau gel blóng me ebéléem, tódô kdê le gotu mulé du yóm hlauhem. Là kô kenmón le du yó kem hlauhem ne yó kem eles gel hetgamahem kul.

³⁵ Balù bè yóm kdaw tehe kogot le yóm kul benwu, tey kehyu nawa le du yóm tey tonok hyu lelen lamang deng blayem kul. Ewenem yó, là kô dog nmò le du yóm kóm kóyô ne là kô knogol le du yó kem sidek nmò le.

³⁶ Ne ni, deng me mom ghesek ta yóm tonok alì hyu tehe blayem yó kem tehe fù me. Ghesek me ta nim tonok alì tembas nii.

³⁷ Yó kem tey nuta me gotu mógów ebè yó kem tau hol geta mogot kum abay se monem, gel nmò me yóm kenbéem. Tódô nmò le bélê me yóm kul kóyô dalang se bè yó kem ógóf me ne ni, tey sidek keglayam me.

³⁸ Ne ni, Dwata, lemwót bè yóm kdê deng glan me ni, mi kem tau Israél, wen safà nmò me béléem. Sù me bè sulat yóm fasad me ni, omin me hefema du bè yó kem tau gónó me gel galak ne bè yó kem sfu Libay ne bè yó kem tau gel blóng me ebéléem. Yóm kdê le, gotu le fema lemen.”