Lista 3 - Udél Dwata: Gna Kesfasad ne Lomi Kesfasad

Yó kem ngà Aron logi

¹ Ni se boluy fes lówó le Aron ne Musis bè yóm kdaw tehe kudél Dwata ebè Musis bè Bulul Sinay.

² Yóm Aron, wen fat ngaen logi. Yó boluy yóm hol twogu, Nadab. Tmodol Abihu ne Ilisar ne Itamar.

³ Ni kem ngà Aron logi ni, deng tenwél Musis hnolo te kulu le, hetfingen lu mò tau blóng ebè Dwata.Okóm kul le Nadab ne Abihu, hnatay Dwata lu bè yóm benwu laen hol wen tauhen boluyen Sinay lan le tódô lembù demsù ebéléen yóm ofi là hmoen du kul. Laen dù ngà le se kul. Yó gónóm mon, són Ilisar ne Itamar yóm mò blóng tau ebè Dwata bè yóm kun kdaw yóm mà le Aron.

⁴ Okóm kul le Nadab ne Abihu, hnatay Dwata lu bè yóm benwu laen hol wen tauhen boluyen Sinay lan le tódô lembù demsù ebéléen yóm ofi là hmoen du kul. Laen dù ngà le se kul. Yó gónóm mon, són Ilisar ne Itamar yóm mò blóng tau ebè Dwata bè yóm kun kdaw yóm mà le Aron.

Yóm kélék Dwata yó kem sfu Libay mò tóbóng lówó yó kem tau blóng ebè Dwata

⁵ Yó mon Dwata mò ke Musis,

⁶ “Nwit ye lu edini yóm kdê sfu Libay, nélék ye lu mò tóbóng lówó Aron, yóm tau blóng ye ebéléu.

⁷ Lu fen mò du yó kem nmò lem yóm dou Gónô, mò tmóbóng yó kem tau blóng ebéléu ne kdê yó kem tau Israél.

⁸ Sigangu ta le kdéen ngom lem yóm dou Gónô ne lu fen mò du bè yó kem tau Israél yóm hlolou kul.

⁹ Yó olo kul snolu nmò yó kem sfu Libay mò tóbóng lówó Aron ne yó kem ngaen logi.

¹⁰ Sigangem ta Aron ne yó kem ngaen logi yóm nmò yóm tau blóng ebéléu. Ke wen dumu tau tô mò du yóm kul nmò le Aron, tódô hnatay.”

¹¹ Yó bud mon Dwata mò ke Musis,

^12-13 “Yó kem sfu Libay, dou fun le. Bè yóm tehe khatayu yó kem ngà logi twogu bè yó kem tau Idyip, deng eles hetfingu mò dou yó kem ngà logi twogu bè yó kem ket fes lówó yó kem tau Israél dalang se yó kem tanay sut bè yó kem ógóf le. Okóm ni, yó mò tles yó kem ngà logi twogu yó kem tau Israél duhen yó kem sfu Libay mò hol dou. Ou se hol mfun kul. Ou se yóm hol gónó mogot.” Là gomongen bè nili yóm bérs 14 efet kól bè bérs 39. Tulónen yóm ksulat le boluy yó kem logi kun ból Libay. Yó kmò ksulat le kul, hewót le bè yó kem ngà logi hanà sbulónen sut. Yó kwen yó kem ngà logi ból Libay snulat le, botong 22,000.

Yó kem sfu Libay mò tles Dwata kul yó kem ngà logi twogu yó kem tau Israél

^40-41 Yó udél Dwata ebè Musis, monen, “Kdéen ngà logi twogu bè yó kem tau Israél, dou funen. Yó gónóm mon, ket ngà logi twogu bè yó kem tau Israél nbuten bè yóm hanà sbulónen sut duhen ke deng mukas sbulónen, gotu lista ye lu. Okóm yó mò tlesu kul duhen yó kem sfu Libay. Ou se yóm hol gónó mogot. Senged se yó kem ógóf yó kem sfu Libay, dou funen mò tles yó kem tanay sut bè yó kem ógóf yó kem dumu le Israél.”

⁴² Tahu se, nimón Musis yóm mon Dwata mò du ne gotu listahen lu yóm kdéen ngà logi twogu bè yó kem tau Israél,

⁴³ nbuten bè yó kem ngà hanà sbulón le sut duhen ke deng mukas sbulónen. Yó kdéen ngà logi twogu lista le, botong 22,273.

⁴⁴ Yó bud mon Dwata mò ke Musis,

⁴⁵ “Ni hetfing ye lu ebéléu yó kem sfu Libay mò tles yó kem ngà logi twogu yó kem tau Israél. Kkólen bè yó kem ógóf le, bud hetfing ye lu ebéléu snéen mò tles yó kem tanay sut bè yó kem ógóf yó kem tau Israél.

⁴⁶ Yóm kul kwen yó kem ngà logi twogu yó kem tau Israél deng nfunu, 273 nuléhen ta kwen yó kem ngà logi sfu Libay. Yó kmò ye du yóm 273 uléhen yó, nsok le lu béléu.

⁴⁷ Yó sok ye kul yóm ket sotu, limu botù filak blówón bukay yóm senged bè keblat yóm dumu blówón bukay gel blay le bè Gónô Dwata.

⁴⁸ Lemwót nim filak sok ye kul ni, hol blay ye ke Aron ne bè yó kem ngaen logi.”

⁴⁹ Tahu se, nimón Musis yóm mon Dwata yó.

⁵⁰ Nwahen yóm 1,365 botù filak blówón sok le yó koni

⁵¹ ne blayen ke Aron ne bè yó kem ngaen logi. Là gomongen bè nili yóm tsaptér 4. Tulónen yóm kul nmò bè Gónô Dwata yó kem sfu Libay, yóm nmò alì blat. Ke deng kól bè tlu folò halayen yóm sotu sfu Libay, nbuten yó ne mò nmò bè Gónô Dwata efet kól bè limu folò halayen. Là gomongen bè nili yóm tsaptér 5. Tulónen yóm hlolò Dwata yó kem tau Israél bè yóm kkukum le du ke wen tau sgulé.