Kem Lingón 87 - Udél Dwata: Gna Kesfasad ne Lomi Kesfasad

Lingón yó kem sfu Kura

¹ Bè yóm bulul Dwata, bè yó gónón nô yóm syudad deng hefdaen.

² Tey kbong nawa Dwata du yóm syudad Jirusalim senta yó kem dumu syudad bè Israél.

³ Ó syudad Dwata, hol hnungolem yóm tey tilob udél Dwata etahem.

⁴ Yó mon Dwata, “Bè yóm klistahu yó kem benwu mimón dou, angat homongu Idyip ne Babilun. Bud homongu Flistya ne Tayal, balù yóm klayuk Ityupya, deng le gotu baling tau bè Jirusalim.”

⁵ Yó angat mon le gbak ebè Jirusalim, “Kdéen tau, angat le gotu baling tau bè ni.” Ne yóm Dwata Hol Dandónen geta angat hembegel du nim syudad ni.

⁶ Sok angat lista Dwata yó kem tau, yó monen, “Nim sotu nii, deng baling tau bè Jirusalim.”

⁷ Bè yó kem gel kehligal le, angat le gotu semngal yóm kdéen tau. Yó utóm sngal le, mon le, “Bè Jirusalim gónón gu tembul yóm dou klowil.”