Kem Lingón 15 - Udél Dwata: Gna Kesfasad ne Lomi Kesfasad

Lingón Dabid yóm kun kmò yóm tau Dwata

¹ Ó Dwata, tau du de yóm knóón husek elem yóm kóm Gónô? Tau du de yóm knóón hloni ebéléem bè yóm kóm bulul Sayun?

² Yó olo knóón, són yóm tau tendo mimón ke Dwata, ne laen dù belenen yóm gel nmoen, ne hono tahu yóm gel btang bè sumóngen, laen kô dù bool kestulónen,

³ ne là sidek kbaken ebè kem dumuhen. Laen kô dù sidek nmoen bè yó kem ween, ne là gel sentulónen kem dumuhen sebét.

⁴ Tey kenbéen se kun yó kem tau kenbê Dwata, okóm tey nadaten yó kem tau mimón ke Dwata. Ne sal gel dnohoen ke wen fasaden, balù nô keblaten béléen.

⁵ Ne ke wen hutóngen, là kô hngaen du. Ke myón bè knukum, là kô nfihen du yóm kéng, balù nô kbong tô blay le du. Yóm tau lómón yó kmoen, tendo nofin Dwata.