Kem Lingón 13 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, kegenen de duen yóm keklifótem dou? Klifótem ou ne kô efet kól bè sónen? Kegenen ne duen yóm kehebnosem dou?

² Kegenen ne duen yóm tendo ksidek kegnómu du ne yóm klangagu ket kdaw? Kegenen ne duen yóm tendo kegmò le béléu yó kem hohonu?

³ Tenngelem ou, Dwata yóm sana Dwata hol dou gónó mogot, ne bnalaem ou. Hlowilem ou anì là mataye.

⁴ Ke mataye, yó mon kem hohonu, “Laen dù gmoen bélê me.” Ke mataye, hligal le se kul.

⁵ Okóm snaligu yóm là konol yóm kbong nawam dou. Hligale, abay se dohò yóm kehewaem dou.

⁶ Lemingóne ebè Dwata, abay se tey hyu yóm nmoen béléu.