Kem Lingón 101 - Udél Dwata: Gna Kesfasad ne Lomi Kesfasad

Lingón Dabid

¹ Ó Dwata, sngalu yóm kbong nawahem tau ne yóm ktedeng kkukumem. Dóyónu u mlan bè yó kem sngal.

² Hol ten-gamahu yóm klaen dù gónóhu megsanil. Kilón de któbóngem dou? Bè yóm dou gónô nô, hol nmou yóm laen dù kéng du.

³ Là kóe móyô temngel du kihu yó kem nmò sidek. Tey keklitu du dou yó kem nmò le là tedengen yó kem tau là hemtahu bè Dwata. Là kóe móyô mò du dou yó kem gel nmò le yó.

⁴ Kenbéu yó kem atul sidek nô lem hendem tau. Hnayuku yóm kdéen sidek.

⁵ Là kô tódô bayau du kul yóm gel ktifù le kéng bè kem dumu le sebét ne yó kem tau heklabak ne kem tau hegeta knô.

⁶ Tendo bnenteyu lu yó kem tau mò du yóm tedeng anì mung le henek menwu béléu. Són yó kem tau kembê du yóm sidek yóm henmóyóu mò tmóbóng do.

⁷ Là kóe móyô du ke mò le nmò bè gónóu yó kem tau hulung smukat. Là kóe móyô du ke mdà le bè soluhu yó kem tau mò kéng.

⁸ Tódô ketu kdaw smidok mebel kul yó kem tau mò sidek, ne lohu lu mayuk gu bè yóm syudad Dwata.