Kehewà 35 - Udél Dwata: Gna Kesfasad ne Lomi Kesfasad

Yóm kenhulung blay Dwata bè yó kem tau deng néléken mò heklóón yóm Gónóen

³⁰ Yó mon Musis bè yó kem tau Israél, “Deng nélék Dwata Bisalil yóm ngà Uri, yóm Uri témê Hur tau lemwót bè ból Juda.

³¹ Deng sù Dwata béléen yóm kun Tulus anì wen khulungen ne wen ketngónen mò du balù kihu kay nmò tilob hmò Dwata du.

³² Du se fen hemdem du yó kem tilob betek nmò le lemwót bè tahu blówón ne bè blówón bukay ne yóm sotu gel tenwél le.

³³ Ne bud wen khulungen kemleng yó kem botu sminang mebtes ne hulung semsyón kul bè yó kem angat gónó le nô. Hulung mò betek bè koyu snéen. Balù kihu dumu nmò mò heklóón yóm Gónô Dwata, gbeken mò du.

³⁴ Bud blay Dwata du se yóm khulungen tmolok du bè yó kem dumun yó kem kenhulungen yó, dalang se yóm dumuhen mò nmò boluyen Uhuliyab yóm ngà Ahisamak, tau lemwót bè ból Dan, bud blay Dwata du se kun yóm khulung tmolok yó.

³⁵ Deng blay Dwata kul yóm khulung mò du balù kihu kay nmò le mò heklóón yóm Gónóen. Hulung le mewel snéen ne hulung le msif du bè yóm tila bukay yó kem tnikel bnetek ginggung ne bnetek megem hulô ne bnetek hulô. Gbek le matul du ne gbek le mò du balù kihu kay nmò le mò heklóón yóm Gónô Dwata.”