Jirimaya 1 - Udél Dwata: Gna Kesfasad ne Lomi Kesfasad

¹ Nim bok ni, kun udél Jirimaya yóm ngà Hilkaya logi. Nim Jirimaya ni, sotu tau gel blóng ebè Dwata lemwót bè yóm benwu udì boluyen Anatot glem lem yóm tonok kul ólól yó kem tau semfu gu bè Bindyamin.

² Bè yóm deng gesfoloen tlu halay kogot Jusaya yóm benwu Juda yóm ngà Amun logi, wen udél htugod Dwata ke Jirimaya.

³ Ne bud wen he tendo htugod Dwata du bè yóm kun kogot yóm benwu Juda yóm sotu ngà Jusaya logi boluyen Jihuyakim. Ngang Dwata tendo htugod ke Jirimaya efet bud kól bè gesfoloen sotu halay bè yóm bud kun kogot yóm benwu Juda yóm sotu ngà Jusaya logi boluyen Sidikaya. Bè yóm glimuhen bulón bè yóm halay yó, gotu negef yóm tau hol geta bè Babilun yó kem tau bè Jirusalim.

Ktaba Dwata ke Jirimaya ne yóm htonen du

⁴ Yó udél Dwata ebéléu mon Jirimaya,

⁵ “Gu laanu là deng hembaling kóm lem blutut yéem, deng eles tngónu uu ne. Gu laanem là deng sut, deng eles hetfingu uu ne deng eles néléku uu mò tugodu ebè yó kem tau lem benwu.”

⁶ Yó balau ke Dwata, monu, “Adéy Dwata yóm hol dandónen geta, là gbeku du ke ou mò hudélem. Yakà hanae lomi tau.”

⁷ Okóm mom yó balà Dwata dou, monen, “Béem udél yóm yó. Holi mógów ebè yó kem gónóhu e hógów kóm ne hol tulónem yó kem htulónu kóm.

⁸ Béi abay hlikò bè yó kem tau, yakà tendohe nô béléem mò kemlung kóm. Ou se Dwata nim mudél ni.”

⁹ Omin Dwata yó mdù sumóngu ne monen mò dou, “Ngem, suu bè sumóngem yó kem udélu mò tulónem.

¹⁰ Kemdaw ni wen kwalis blayu kóm mò mudél ebè yó kem dê kay but tau ne ebè yó kem tau hol geta mogot kul. Hol lómón kmoem kul, wen se kendutem ne wen se hnugónem, wen se genlaem ne wen se hebtangem. Okóm bud wen se bélê le bud hdaem ne wen se bélê le hol lómón ke bud huluhem.”

¹¹ Omin Dwata bud mon du mò dou, “Tenngelem ni, Jirimaya, tedu se tonem?” Bnalau se, monu, “Hanga koyu almun, yóm bnoluy le Hménég.”

¹² Mon Dwata se, “Tahu se yóm monem. Tendo hnénégu anì dohò yóm angat ktafaku salà yó kem tau.”

¹³ Omin Dwata bud mudél ebéléu snólóken ou, monen, “Tedu se bud tonem ni du?” Bnalau se, monu, “Wen kuleng tonu nô fi bwak, hnok él kmodok lemen ne móyónen mkok edini.”

¹⁴ Mon Dwata se, “Tahu se yóm tonem yó. Angat wen tey glumfak lemwót gu bè yóm benwu fi bwak gefet bè kdéen tau bè nim benwu ni.

¹⁵ Gotu tnabahu yó kem sendalù lemwót bè yó kem benwu fi bwak anì mógów le edini bè Jirusalim. Lemwót yó kem tau hol geta bélê le, angat gotu sù le bè yó kem bak tikeb nim syudad Jirusalim ni yó kem kul gónó myón kmamal. Angat gotu genbà le yóm beng hmilol Jirusalim ne nundug le yó kem dumu benwu glem lem Juda.

¹⁶ Ni se tafaku yó kem dou tau lemwót bè yó kem sidek tendo gel nmò le. Deng knogol le ou ne deng le demsù ebè yó kem dumu dwata. Deng le tmaba ebè yó kem dwata nmò tdok le.

¹⁷ Yó ne, Jirimaya, elesi htifes. Géhéli lemwót nam e tulón kul yóm kdê htulónu kóm. Béi abay hlikò bélê le. Ke likoi bélê le, bud tennuu he yóm klikoem yó ke mdai bè solu le, ne tey kebà nawahem.

¹⁸ Yó nmou béléem kemdaw ni, hol lómón ke uu yóm syudad alì mbegel, bala tók heheken ne tembaga bengen, là gbek le gembà du. Laen dù bè yó kem tau hol geta mogot yóm benwu Juda ne bè yó kem genlal le ne bè yó kem tau gel blóng ebéléu, duhen ke bè yóm kdéen tau bè Juda ke gembek kóm.

¹⁹ Angat natù le uu, okóm là kô gbek le kóm. Yakà tendohe nô béléem ne tendo kenlungu uu. Ou se yóm sana Dwata hol gónó mogot nim mudél ni.”