Isikél 36 - Udél Dwata: Gna Kesfasad ne Lomi Kesfasad

Bud kehgulék Dwata benwu yó kem tau Israél

¹ Yó bud udélen ebéléu yóm sana Dwata hol gónó mogot, monen, “Ó Tau Tonok, tugodem do ebè yó kem bulul bè Israél. Tulónem kul yóm udélu ebélê le, monem, Ó kem bulul bè Israél, hol hnungol ye yóm udél Dwata ebélê ye.

² Ni se udél yóm sana Dwata hol dandónen geta, monen, Yó udél le heklabak yó kem hohon ye, mon le, ‘Wóyón dé, deng tekuy funen ne yó kem bulul legen bè Israél.’

³ Yó gónóm mon, Tau Tonok, eles tulónem yó kem bulul bè Israél yóm udél yóm sana Dwata hol dandónen geta, yó monen, Deng snibut nundug le yu yó kem hohon ye ne ni deng tey dê benwu mfun kuy. Tey kesedkà le kuy ne tey dê udél le eta ye.

⁴ Yó gónóm mon, kem bulul bè Israél, hol hnungol ye udél yóm sana Dwata hol dandónen geta. Mudél ebè yó kem bulul lemnek ne ebè yó kem bulul lembang ne ebè yó kem sbong ne ebè yó kem datal. Mudél ebè yó kem tonok, dalang se ebè yó kem syudad deng tódô gbayà alì hennê yó kem tólóng benwu hmilol, yó kem syudad deng negef le yó kem nô lemen.

⁵ Ni se udél yóm sana Dwata hol dandónen geta, yó monen, Tey sidek kebutu kul yó kem benwu hmilol kuy, hol néen yóm benwu Idom. Yóm kebutu kul, hol lómón ke ofi gotu kenen kdéen, abay se deng tódô hton le yóm là kadat le do bè yóm deng kled le yóm dou tonok ne tey kehligal le bè yóm kled le du.

⁶ Yó gónóm mon, tugodem do ebè yó kem bulul lemnek ne ebè yó kem bulul lembang ne ebè yó kem sbong ne ebè yó kem datal bè Israél. Tulónem kul yóm udél yóm sana Dwata hol dandónen geta, yó monen, Tey sidek kebutu yóm kehyak le kuy yó kem benwu gu hmilol ye.

⁷ Yó gónóm mon, ni se bud udél yóm sana Dwata hol dandónen geta, deng hdau eta sigelu mung du safau. Yó kem benwu hmilol kuy yó, angat bud lu ne tles gemnóm du yóm tey sidek kyak.

⁸ Okóm yu kem bulul bè Israél, angat le bud tmubed yó kem tmowok ta ye, angat tey kbungu yó kem koyu mungu bè yó mò ken yó kem tau Israél bè yóm bud kesfulék le. Ne móyón le bud semfulék ne ni.

⁹ Ngem tey kfihu kuy kem bulul ne angate sut lem blóng ye naw e tnóbóng yu. Angat bud wen dmadu ta ye ne bud mò hulu ta ye.

¹⁰ Angat tey bud kehbólu yó kem tau Israél nô ta ye ne angat bud hdà le yó kem syudad deng tehe genbà yó kem hohon le ne bud hennoku tau lemen.

¹¹ Angat tey kehwenu kul yó kem tau nô ta ye, kkólen bè yó kem ógóf tey bud kehwenu kul. Ó kem bulul bè Israél, angat tey tau wen mowil ta ye ne tey bud któbóngu kuy senta yóm gnan. Bè yó he gónó ye temngón du ou se yóm sana Dwata hol gónó mogot.

¹² Angat tey wen kem dou tau Israél bud mógów ta ye ne bud lu mfun kuy. Là bud henus ye kul ne yó kem ngà le.

¹³ Ni se udél yóm sana Dwata hol dandónen geta, monu, Tahu se yóm gel mon yó kem tau bè dumu benwu, mon le, ‘Deng mom gotu hlo benwu Israél yó kem tauhen, henbalingen benwu laen dù bud ngaen.’

¹⁴ Okóm lenwóten ni, là bud hlohem du ne yó kem tauhem, là budi baling benwu laen dù ngaen, udél yóm sana Dwata hol dandónen geta.

¹⁵ Là bud hlusu kul ne yó kem tólóng benwu ke bud hennê le yu ne ke bud henyak le yu. Là bud genlaem kul ne yó kem tauhem, udél yóm sana Dwata hol dandónen geta.”

Bud kehgulék Dwata klowil yó kem tau Israél

¹⁶ Ominen wen bud udélen ebéléu yóm sana Dwata hol gónó mogot, monen,

¹⁷ “Ó Tau Tonok, bè yóm tehe knô le bè yóm kul benwu yó kem tau Israél, gholuhen benwu le yó kem sidek gel nmò le. Kehlingónu du yóm alì ksideken yóm kmò le lómón yóm nes bolok tódô tfeng litô.

¹⁸ Yó gónóm mon, koku eta le yóm alì ksidek yóm kebutu kul lemwót bè yóm deng kbonok le ne lemwót bè yóm ktaba le ebè yó kem dwata kéng, yóm gónón gholu yóm benwu le.

¹⁹ Lemwót bè yóm nmò le yó, yó gónóhu gotu semkla kul ebè yó kem tey dê benwu, lanu tmafak kul bè yó kem sidek tendo gel nmò le.

²⁰ Bè yóm deng gotu kesekla le ebè yó kem tólóng benwu, gomonge myak bélê le. Yó udél yó kem tau bè dumu benwu, mon le, ‘Ke ni se yó kem kun tau yóm sana Dwata hol gónó mogot, moen de ke negef le lu ebè dumu benwu?’

²¹ Sónmou hemdem du yóm dou boluy bè yóm deng kgomongen myak bè yó kem tau Israél balù kihu gónó le e solu.

²² Yó gónóm mon, hol tulónem bè yó kem tau Israél yóm udél yóm sana Dwata hol dandónen geta, yó monen, Angat bud nitu yu semfulék ebè yóm kuy benwu, okóm là lemwóten bè yóm hyu gel nmò ye. Yó gónóhu bud mit kuy semfulék, abay se là móyóe du ke gbà yóm dou boluy, yóm boluy deng gomong myak bélê ye bè yó kem benwu deng gónó ye e sekla.

²³ Angat hegfanu bè yó kem tólóng tau yóm klaen dù belenen yóm dou boluy, yóm boluy deng gomong myak bélê ye bè yó kem dumu benwu. Ne ke deng hegfanu bélê le yóm klaen dù belenu hlanu bélê ye, omin le yó he temngón du yó kem tólóng tau bè dumu benwu ou se yóm sana Dwata hol gónó mogot. Ni se udél yóm sana Dwata hol dandónen geta.

²⁴ Ni se angat nmou, gotu bud sentifunu yu gu bè yó kem benwu deng gónóhu e semkla kuy ne nwitu yu semfulék ebè yóm hol kuy benwu.

²⁵ Angat wen él mólós hetsiku ebélê ye anì baling ye mólós. Nolobu yó kem using ye ne là bud ye tmaba ebè yó kem dwata kéng.

²⁶ Angat wen lomi nawa blayu kuy ne suu bélê ye yóm óyô mò du yóm hyu. Kóhu bélê ye yóm nawa kembel, tlesu du yóm nawa gulit.

²⁷ Suu bélê ye yóm dou tulus anì nimón ye yó kem dou hlau kuy ne anì wen ketgama ye mò du yóm dou hlolò kuy.

²⁸ Ne angat ye nô bè Israél, yóm benwu tehe blayu yó kem tehe fù ye ekni. Angat ye baling mò dou tau ne ou se baling Dwata ye.

²⁹ Angat nolobu yu bè kdê yó kem adat là mólós ye. Ne tey kehetbasu yóm kdê hulu ye, laen dù bud tau bitil bè klamang benwu ye.

³⁰ Yó kem koyu mungu ye, angat tey kehbunguhu kul kkólen bè yó kem dumu hulu ye. Yó kem benwu hmilol kuy, là bud hennê le kuy ne lómón yóm gnan lemwót bè yóm tehe kbel bitil bong bè benwu ye.

³¹ Omin ye yó he hemdem du yóm tehe salà ye ne botong nsel ye knô ye bè kdê yó kem sidek deng gel nmò ye.

³² Hol bê ye abay klifót yóm deng tulónu kuy, udél yóm sana Dwata hol dandónen geta. Sundu yó gónóhu mò du nim ni ke lemwót bè yóm hyu deng nmò ye. Ó kem tau Israél, yake hol ye hyak bè yóm gel kmò ye sidek.

³³ Ni se udél yóm sana Dwata hol dandónen geta, yó monen, Ke deng gotu kóhu bélê ye yó kem salà ye, angat bud hnóu yu bè yó kem syudad ye ne angat bud hetlobu kuy yó kem deng gbà.

³⁴ Ket tau deng mlan bè yó kem gónó ye mò hulu deng gbayà, tey sidek ketnga le. Okóm ni, bud hmou yu hulu bè yó.

³⁵ Ne bè yóm kdaw bud kwitu kuy semfulék, yó angat mon yó kem dumu tau hmilol kuy, ‘Yóm tonok deng gbayà ni, bud baling lómón yóm tehe hungul koyu boluyen Idin ekni. Yó kem syudaden tey tehe kegbà le ne tódô gbayà, okóm ni deng bud wen tauhen ne mbegel beng hilolen.’

³⁶ Yó gónóm mon, yó kem tólóng benwu hmilol wen dù tauhen, angat tngón le ou se yóm sana Dwata hol gónó mogot bud hetlob du yó kem syudad deng gbà, ne bud wen htowoku bè yóm benwu tehe là hyu menwu du. Ou se yóm sana Dwata hol gónó mogot fmasad du nim ni ne angat nmou yóm deng monu.

³⁷ Yó bud udél yóm sana Dwata hol dandónen geta, monen, Hyu béléu ke bud wen sotu hni le béléu yó kem tau Israél, duhen yóm kehwenu ból le lómón kwen yó kem tehe ubiha le.

³⁸ Yó kem syudad tolo gbà ni kmoen ni, angat baling bud hnok tau lómón yóm tehe kehnok ubiha bè Jirusalim ekni, yó kem ubiha tehe gel dsù le ebéléu bè yóm tehe gel kehligal le. Omin le yó he temngón du ou yóm sana kul Dwata hol gónó mogot.”