Isikél 1 - Udél Dwata: Gna Kesfasad ne Lomi Kesfasad

Yóm tanay hton Dwata ke Isikél

¹ Bè yóm deng tlu folò ne halayu wen hton Dwata do. Htonen do bè yóm glimuhen kdaw bè yóm gfaten bulón bè yóm halay yó bè yóm knóu lem blóng yó kem dumuhu negef lemwót bè Juda nô bè kilil Él Kibar bè Babilun. Bè yóm kdaw yó tódô tonu hnas longit ne hton Dwata do yóm kun kmò.

² Yóm ktonu du yóm ni, deng limu halayen ne kegen le deng megef ke Jihuyakin ebè Babilun.Bè yó bè kilil Él Kibar bè Babilun, wen udél Dwata ebéléu ne tódô gnómu yóm kogot Dwata do, ou Isikél yóm ngà Busi logi yóm Busi gel blóng tau ebè Dwata.

³ Bè yó bè kilil Él Kibar bè Babilun, wen udél Dwata ebéléu ne tódô gnómu yóm kogot Dwata do, ou Isikél yóm ngà Busi logi yóm Busi gel blóng tau ebè Dwata.

⁴ Yóm igou temngel, tódô tonu yóm tey lenos mbel fi gu bwak, mung du yóm tey lobun mfól alì sminang lel yóm tey silà mkal gu lemen. Wen ofi bè gónón sóól yóm lobun yó, mom sminang mélél hol lómón yóm tembaga deng hló.

⁵ Lemwót bè gónón sóól yóm lobun yó wen tonu fat mowil lómón tô tau kmò le.

⁶ Okóm yóm ket kul na sotu, sal fat uyó le ne fat se hafak le.

⁷ Yóm ti le tódô tedeng lómón ti tau. Okóm yóm hólól ti le lómón kmasing ngà safì, bede tey sminang hol lómón keslinang le yóm tembaga deng hló.

⁸ Sket kul na fat sigel le nô laan yó kem hafak le, bede lómón sigel tau.

⁹ Yóm lewu hafak yó kem mowil yó, ke nból le tódô stud bè tukô hafak yóm lewu kem dumu le sedà. Gbek le móyóng kihu gónó le e solu anien ke là bud le beklil.

¹⁰ Yóm ket kul na sotu yó kem mowil yó wen fat kay uyó le. Ke smolu le uyó tau, bè kwanan le uyó liyun ne bè iwóng le uyó safì tudu ne ke kmogol le uyó banug.

¹¹ Ne wen fat hafak le yóm ket kul na sotu. Ke nból le eta yóm lewu hafak le, tódô stud bè tukô hafak yóm lewu kem dumu le sedà. Ne yóm dù lewu hafak le sentifes le ebè lówó le.

¹² Balù kihu gónón e mit kul yóm tulus le, gbek le tódô hekteng lemwót anien ke là bud le beklil.

¹³ Yó kem mowil yó, wen tendo dmilóf bélê le lómón ke bala ofi kemyóngón, duhen ke lómón yóm solok nit mógów alì mtataw. Bè ktonu du hol lómón ke wen silà mkal lem blóng le.

¹⁴ Ke sok bang le lemwót lómón ke mkal silà tek sudof, senged se bè yóm kkól le.

¹⁵ Yóm igou temngel ebè yóm fat kem mowil yó, wen fat kliling tonu nô laan ti le gefet bè tonok, ket mowil wen sotu kun kliling.

¹⁶ Ni kem fat kliling ni hono skél ne sket kul sminang, lómón keslinang yóm botu alì mebtes. Yó kem fat kliling yó, bud wen kliling blekel lemen ket kul na sotu.

¹⁷ Lemwót bè yó kem lewu kliling yó gbek le tódô mógów kihu gónó le e smolu anien ke là beklil le.

¹⁸ Tey kehtawu du yóm kegeta le eta, bede tódô hono mata hilolen.

¹⁹ Ke sok le lemwót yó kem mowil yó, tódô mung kul yó kem kliling le. Ke móyóng le eta yó kem mowil yó, bud gmung eta se yó kem fat kliling le.

²⁰ Yóm kul tulus yóm fat kem mowil yó, nô bè kliling le. Duhen yó, balù kihu gónón e solu yóm tulus nô bè yó kem kliling le, tódô le mung se kul yó kem kliling ne yó kem mowil.

²¹ Ke mógów yó kem mowil, mógów le se kul yó kem kliling. Ke htengen mdà yó kem mowil, bud le htengen mdà se kul yó kem kliling. Ke móyóng le etta yó kem mowil yó koni, tódô mung kul etta se yó kem kliling le. Abay se nô bè kliling le yóm kul tulus yó kem mowil yó.

²² Wen tonu hol lómón ketef sminang bukay kmoen mból ta le lómón kból longit.

²³ Laan yóm ketef sminang bukay yó gónó le mdà yó kem mowil ne sensetud le tukô hafak le bè kul hafak yóm lewu kem dumu le sedà ne limun le ebè lówó le yóm lewu dù hafak le.

²⁴ Ke móyóng le, yóm uni lefluk le hol lómón ke luk yóm hikong bong ne lómón ke udél yóm Dwata laen dù là gbeken du, ne lómón ke hensag yóm tey sendalù wen. Ke là bud le móyóng tódô bud sentifes le se yó kem hafak le.

²⁵ Yóm igò le mdà, wen gungolu mudél lemwót ta yóm ketef sminang bukay nô ta le.

²⁶ Fi ta yóm ketef sminang bukay yó wen tonu lómón ke bangkù gónó myón kmamal nô du, nmò le lemwót bè yóm botu ginggung alì sminang. Ne wen tonu lómón tô tau myón tahen.

²⁷ Yóm tau myón tahen yó, lenwóten bè ówóken kól eta hol lómón keslinangen yóm tembaga sminang mélél deng hló, lómón dilóf ofi kmoen. Ne bud lenwóten bè ówóken kól elaan tey sminang knóón hol lómón ke dilóf ofi.

²⁸ Yóm gu hilolen lómón ke wen léwés mnóng du, hol lómón yóm léwés gel gfan gu lem lobun ke kmulón. Yó se kmoen yóm klóón Dwata hono sminang deng hegfan béléu. Bè yóm ktonu du, botonge gefen bè tonok ne ominu mungol yóm mudél ebéléu.