Dwata 5 - Udél Dwata: Gna Kesfasad ne Lomi Kesfasad

Yóm sfolò kem hlau Dwata

¹ Omin Musis gotu htaba yó kem tau Israél ne monen mò kul, “Ó kem tau Israél, hol hnungol ye yó kem hlau Dwata tulónu kuy kemdaw ni. Hol dnalang ye ne hol nimón ye.

² Ditu bè Bulul Sinay, deng wen kesfasad le Dwata yó kem tuha tekuy

³ bede là olon du bè yó kem tuha tekuy, bud tekuy gomong snéen yó kem tau tolo mowil ni kmoen ni.

⁴ Bè yó ta yóm bulul yó, tódô suyó bélê ye Dwata lemwót gu lem yóm tey ofi.

⁵ Bè yóm kdaw yó, ou se fen semblóng kuy ebè Dwata mò tmulón du kuy yóm monen, abay se likò ye bè yóm ofi gónón gu mudél ne là kô ye gógów eta yóm bulul. Yó tehe udél Dwata ebélê ye bè yóm kdaw yó, monen,

⁶ ‘Ou se yóm sana kuy Dwata hol gónó mogot, yóm deng hewà kuy gu bè Idyip bè yóm benwu gónó ye ghesek.

⁷ Bê ye abay tmaba ebè yó kem dumu dwata, són ebéléu.

⁸ Bê ye abay mò yó kem dwata lennged mkél bè yóm gel ton ye bè longit duhen ke te tonok duhen ke lemwót bè él.

⁹ Bê ye abay mtud bukol bè yóm dwata lenbù duhen ke tmaba ebéléen abay se ou yóm sana kuy Dwata hol gónó mogot. Tey sidek kélés nawahu du ke wen dumu dwata gónó ye e tmaba. Tnafaku yó kem tau kembê dou, gomong megtafak snéen yóm tanay lugod le efet kól bè gfaten.Okóm bè yó kem tau kembong nawa do ne mimón yó kem dou hlau hegfanu bélê le yóm kbong nawahu kul efet kól bè hilu libu bud lugod le.

¹⁰ Okóm bè yó kem tau kembong nawa do ne mimón yó kem dou hlau hegfanu bélê le yóm kbong nawahu kul efet kól bè hilu libu bud lugod le.

¹¹ Bê ye tódô fà moluy du yóm dou boluy. Yakà ou du yóm sana kuy Dwata hol gónó mogot. Tnafaku yóm tau tódô faen moluy du yóm dou boluy.

¹² Hol hetfing ye yóm Kdaw Kehegnô ne hol béen abay wen nulé ye bè yó kem dou hlolò kuy bè yóm kdaw yó. Ou se yóm sana kuy Dwata hol gónó mogot fen hlolò du kuy nim ni.

¹³ Wen nem kdaw ye mò nmò

¹⁴ okóm bè yóm ghituhen kdaw, yó se yóm Kdaw Kehegnô hetfing ye ebéléu. Bè yóm kdaw yó, béen abay wen bélê ye mò nmò, balù uu ne yó kem ngaem ne yó kem hesekem ne yó kem ógófem duhen ke yó kem tau milo nô bè yóm kuy benwu, hol bê le abay mò nmò. Yó kem hesekem, hol le hegnô lómón yóm kóm kehegnô.

¹⁵ Hentulón ye nawa tehe ye ghesek bè Idyip se kuy. Yóm kehewà ye gu bè yóm benwu yó lemwót béléu yóm sana kuy Dwata hol gónó mogot, ne mlan bè yóm tey kegbeku ne kgisu. Yó se gónóhu hol hlolò du kuy yóm hlau bè Kdaw Kehegnô.

¹⁶ Hol nadat ye mà ye ne yê ye. Ou se yóm sana kuy Dwata hol gónó mogot fen hmau du kuy nim ni anì hyu kógów klowil ye ne anì tahà ktau ye ta yóm tonok blayu kuy.

¹⁷ Bê ye abay monok.

¹⁸ Bê ye abay mdà yehen.

¹⁹ Bê ye abay mnagaw.

²⁰ Bê ye abay tnifù kéng kem dumu ye.

²¹ Hol bê ye abay nófô yehen kem dumu ye. Bê ye abay nófô gónóen duhen ke tonoken duhen ke kem heseken duhen ke kem safien duhen ke kem kudaen duhen ke yó kem dumu nfunen.’

²² Ni se yóm sfolò kem hlau hlolò Dwata kuy bè yóm tehe kesbung ye bè bulul Sinay. Tódô mudél ebélê ye gu lem yóm dilóf ofi ne lobun mfól ne tey mfasang yóm kudélen yó. Ni se yóm hlau hloloen kuy, laen dù dumuhen. Ominen smulat du ta yóm lewu kem botu kufil yóm hlauhen yó ne oguhen dou.

²³ Bè yóm tehe tódô ketfengen ofi yóm Bulul Sinay, tódô gungol ye yóm udél Dwata gu lem yóm tey mget kifu, lemwót yó kem tau malak kuy bè ket ból ye mógów ebéléu

²⁴ ne mon le mò dou, ‘Deng hton Dwata kum, yóm sana kut Dwata hol gónó mogot, yóm tey keslinangen ne yóm tey kegetahen bè yóm kungol me du yóm udélen gu lem yóm dilóf ofi. Deng tngón me kemdaw ni gbek tau mowil anien ke deng mudél ebéléen Dwata.

²⁵ Okóm ni tey sidek klikò me du yóm ofi yó tódô gotu genlaen mi. Tódô eles gnóm me gotu me matay ke bud gungol me udél yóm sana kut Dwata hol gónó mogot.

²⁶ Laen kô dù tau bud mowil ke gungolen udél yóm Dwata laen tul katayen gu lem tum dilóf ofi, lómón yóm deng gungol me.

²⁷ Duhen ni, Musis, budi mulék ebè Dwata ne hol hnungolem yóm kdê tulónen kóm, yóm sana kut Dwata hol gónó mogot. Ominem bud mulék ebélê me ne tulónem kum yóm kdê tulónen kóm. Hnungol me uu ne nimón me.’

²⁸ Timbow gungol Dwata yóm kóyô ye yó, yó monen mò dou, ‘Deng gungolu udél ni kem tau nii ne tahu se yóm mon le yó.

²⁹ Yake senflós lómón ni dé kmò kegnóm le du. Yake senflós le likò béléu ne nimón le yóm kdê dou hlau kul. Ke yó nmò le angat hyu kógów klowil le dalang se yó kem semfu gu bélê le efet kól bè laen dù tul sónen.

³⁰ Tu ne, Musis, muléki ebélê le nam e bud hulék lu ebè kamfù le.

³¹ Okóm kóm, budi mulék ebéléu bè ni, naw na gotu tulón kóm yóm kdê hlauhu kul ne yó kem hlolou kul. Tolokem yóm kdéen tau Israél anì yó, nimón le sok le nô ta yóm tonok blayu kul.’ Tu se,” mon Musis, “yóm tehe udél Dwata ebéléu.

³² Ne ni, kem tau Israél, hol nimón ye yó kem hlauhen kuy yóm sana kuy Dwata hol gónó mogot. Hol béen abay wen glafang ye bè yó kem hlauhen kuy.

³³ Gotu nimón ye yóm kdéen anì hyu kógów klowil ye ne hlós knô ye ta yóm tonok móyón nfun ye.”