Dwata 24 - Udél Dwata: Gna Kesfasad ne Lomi Kesfasad

Hlau bè kuta

¹⁹ “Ke sentifun ye yó kem nuta ye ne ke wen klifót ye du, hol bê ye abay bud na a nangay, mò tódô noyok yó kem tólóng tau menwu lem blóng ye ne yó kem ngà hikit ne yó kem libun bolu. Ke ni se nmò ye, tey któbóng Dwata kuy bè ket nmò ye.

²⁰ Ke nuta ye bungu yó kem koyu ulib, hol bê ye abay bud senfulék yó kem dù tebel. Yó se mò noyok yó kem tólóng tau menwu lem blóng ye ne yó kem ngà hikit ne yó kem libun bolu.

²¹ Ke nuta ye yó kem bungu grép, bê ye abay bud senfulék yó kem dù bunguhen tebel. Yó se mò noyok yó kem tólóng tau menwu lem blóng ye ne yó kem ngà hikit ne yó kem libun bolu.

²² Hendem ye dé yóm tehe keghesek ye bè Idyip se kuy ne yó se gónów tmulón du kuy nim hlau ni.” Là gomongen bè nili yóm tsaptér 25. Yó tulónen yóm hlau bè ktafak le du yóm tau wen salaen ne yóm kun snolu yóm tau ke matay yóm dumuhen setwoli logi ne tey wen he dumu hlau Musis kul.