Danyél 1 - Udél Dwata: Gna Kesfasad ne Lomi Kesfasad

Knô Danyél bè Nibukadnisar bè Babilun

¹ Bè yóm deng getlu halay Jihuyakim mogot yóm benwu Juda, sut bè Jirusalim Nibukadnisar yóm tau hol geta bè Babilun mung du yó kem sendaluen na le e mundug bè yó.

² Yó nmò Dwata, blayen Jihuyakim elem hólól Nibukadnisar. Yóm kulék Nibukadnisar ebè Babilun wen nwiten bè yó kem kimu mebtes nô lem Gónô Dwata, kem kimu deng hetfing le ebè Dwata ne suen lem gónô yóm kun dwata hentahu bè Babilun, bè yóm gónó le gel hemyu yó kem alì mebtes.

³ Lemwót yóm tau hol geta yó, dóken Aspinas yóm geta bè yó kem genlalen, anì mélék bè yó kem ngà logi lomi lemnok deng negef le lemwót gu bè Juda yóm hono kesfu tau hol geta.

⁴ Yó monen mò du, “Nélékem yóm hyu klówó le ne knóón le logi, kem tau hulung hedem ne kem tau temngón ne mahil le megtolok ne yóm wen kenhulung le bè yóm angat kmò le nmò bè yóm gónô bongu. Tolokem ni kem lomi lemnok ni mudél yóm kut udél kem tau Babilun ne semfala yó kem dê kut snulat.”

⁵ Yó bud nmò yóm tau hol geta, wen hmoen yóm tau mólól ken anì tódô ket kdawen bemlay kul ken yó kem ngà logi nélék le yó, yóm ken hyu ne yóm tifas grép alì hyu lemwót bè kun lemisa. Tlu halay le kegen le tmolok kul, ominen yó he wen hmoen kul yóm tau hol geta.

⁶ Yó kem ngà logi nélék le yó, wen fat bélê le lemwót bè ból Juda, duhen Danyél ne Hananiya ne Misyél ne Asariya.

⁷ Wen lomi boluyen kul yóm geta bè yó kem genlal yóm tau hol geta. Yó tles boluy Danyél, Béltisasar. Yó tles boluy Hananiya, Sadrak. Yó tles boluy Misyél, Misak ne yó tles boluy Asariya, Abidnigu.

⁸ Okóm ke Danyél kun, deng nô bè nawahen yóm là kóyóen gholu bè yóm ken ne yóm ninum blay yóm tau hol geta kul. Yó nmoen, hkodu bè Aspinas anì htólóngen yóm hkenen kul.

⁹ Lemwót bè yóm któbóng Dwata ke Danyél gónó Aspinas kmodu du ne móyô tmóbóng du.

¹⁰ Okóm tey klikoen bè yóm tau hol geta bè yóm hni Danyél béléen yó. Yó monen mò ke Danyél, “Yóm tau hol geta se mdók do hemken du kuy ni kem ken ne hinum du kuy ni kem tifas grép ni. Ke tonen yu fen lehen lem blóng ni kem dumu logi lomi lemnok ni, kaem hnatayen o lanu là mò du yóm hmoen do.”

¹¹ Yó udél Danyél ebè yóm sotu tau deng nélék yóm geta bè yó kem fen gel mkay ken mò hemken kul le Danyél ne Hananiya ne Misyél ne Asariya, monen,

¹² “Ke hyu béléem, tnilówem mi sfolò kdaw olon lemnaw ken me ne olon él ninum me.

¹³ Ke sok deng mfu yóm sfolò kdaw, ominem semskél kum bè yó kem dumu logi mken yóm ken tau hol geta, hnénégem ke mahil du bélê me hyu klówóhen. Ke là móyói du yóm ktonem kum, tódô nmoem bélê me yóm kóm kóyô.”

¹⁴ Tahu se, nmung yóm tau gel mkay ken bè yó yóm hni Danyél ne tnilówen lu bè sfolò kdaw.

¹⁵ Tikóng mfu yóm sfolò kdaw, tonen tey hyu kul klówó le Danyél ne yóm tlu kem ween senta yó kem dumu logi mken yóm ken tau hol geta.

¹⁶ Lenwóten bè yó ne són lemnaw ne hkenen kul le Danyél yóm tau gel mkay ken ebélê le, là ne yóm ken tilob tô hken le kul ne yóm tifas grép hinum le kul.

¹⁷ Tey keblay Dwata kul ketngón nim fat kem logi lomi lemnok ni bè kdê yó kem hefnagì le kul. Bong ke Danyél kun, wen kenhulung blay Dwata du, duhen yóm khulung tmulón lan yóm hton Dwata bè tau ne lan kna.

¹⁸ Timbow deng mfu yóm tlu halay le tmolok kul, lemwót yóm geta bè yó kem genlal gotu nwiten lu ebè Nibukadnisar yóm kdê logi deng tolok le.

¹⁹ Gotu le mdà bè solu yóm tau hol geta yóm ket kul na sotu ne stulón kul. Yó ton yóm tau hol geta bè kdê yó kem logi nwit le ebéléen, laen dù gemsenged kul le Danyél ne Hananiya ne Misyél ne Asariya. Yó gónón mélék kul mò mung bè yó kem tau gel hemlan béléen udél.

²⁰ Lenwóten bè yó bè ket snólóken bélê le yóm tau hol geta, bè kun kehedem du yóm kul khulung hedem ne kul khulung temnef nim fat kem logi gel hemlan béléen udél ni, botong sfolò duléken lemyu senta yóm kul ketngón yó kem tau demwata tehe gel hemlan béléen udél.

²¹ Tódô hlós nô bè yó Danyél bè gónô bong yóm tau hol geta efet bè yóm kun bud kogot bè benwu Babilun Sirus, yóm tau hol geta lemwót bè benwu Pérsya mled yóm benwu Babilun.