2 Kurin 1 - Udél Dwata: Gna Kesfasad ne Lomi Kesfasad

¹ Ou se Pol gónóhen lemwót nim sulat ni, lewu me Timuti, yóm sotu dumu tekuy setwoli. Hol lemwót bè kun kóyô Dwata yóm khógów Krays Jisas do. Smulate ebélê ye, yu kem tau hemtahu bè Dwata bè syudad Kurin, dalang se bè yóm kdéen tau Dwata bè klamangen prubinsya Akiya.

² Dwata he, yóm Mà tekuy, dalang se yóm gónó tekuy mogot Jisas Krays tendo tmóbóng kuy ne tendo henek nawa ye.

Kdóyón Pol ke Dwata

³ Hol tendo dóyón tekuy dé Dwata. Du se hol Dwata yóm gónó tekuy mogot Jisas Krays, ne bud du snéen yóm hol kun Mà. Nim Dwata monu ni, du se yóm Mà tekuy alì hulung kmodu, ne yóm Dwata tekuy alì hulung tmóbóng.

⁴ Nô kihu gónó tekuy glayam, tey gel któbóngen tekuy anì yó, hulung tekuy tmóbóng yó kem dumu tekuy hulin kdaw ke wen gónó le glayam se kul. Lómón yóm tehe któbóng Dwata tekuy, bud lómón yó se khulung tekuy tmóbóng yó kem dumu tekuy.

⁵ Deng me gbót se kum bè yóm tey keglayam Krays, ne deng me bud gomong béléen snéen bè yóm tey któbóng Dwata du.

⁶ Ke wen gónó me glayam, kem kunen ne yó, abay se bè yó gónó me gel tmóbóng kuy, ne mò gónó ye gmuta du yóm klowil laen dù sónen. Ne ke wen gónó Dwata tmóbóng kum, yó se gónó me hulung tmóbóng kuy anì gbek ye hol hembala du yó kem gónó ye gel glayam, yóm keglayam hol senged bè yóm kum gónó gel glayam.

⁷ Tey mgel nawa me kuy. Tódô tngón me ke gel ye gbót bè yóm kum gónó glayam, bud ye gomong snéen bè yóm któbóng Dwata kum.

⁸ Wen bud hegtulón me bè nawa ye, kem dumu me setwoli, yóm tehe alì kehlayam le kum yó kem tau bè prubinsya Asya. Laen kem ofolem hmingón du yóm alì ksidek kegnóm me du bè yóm kdaw yó, ofo kum ke là bud me mowil.

⁹ Hol lómón kegnóm me du, lómón ke deng hto yóm buteng me matay. Okóm yó gónón lómón yó keglayam me anì là bud snalig me du yóm kum knô, anì són Dwata yóm hol snalig me, yóm gembek hlowil du yóm tau deng matay.

¹⁰ Bè yóm kdaw yó, lenwaen mi bè yóm tô khatay le kum, ne bud lenwaen mi snéen hulin kdaw.

¹¹ Tey mgel nawa me, abay se deng eles tngón me angat bud lenwaen mi he lemwót bè yóm gel kutóm ye kum bè yóm gel kni ye bè Dwata. Duhen yó, angat bnalà Dwata yóm tey kni ye bélê me yó, ne angat tey któbóngen kum. Ke ni se nmò Dwata, tey wen bélê ye gbót dmóyón du bè yóm któbóngen kum yó.

Ksud Pol yóm butengen mauy kul

¹² Sotu gónó me gel hligal, abay se tódô tngón me laen kô dù belenen yóm kmò me ebè kem dumu me tau, hol néen yóm gel kmò me ebélê ye. Laen kô bang buni me bélê ye se, ne tódô tngón Dwata snéen yóm kgotu nawa me ebélê ye. Bè yóm kmò me du nim nmò me ni, là kô tódô salig me du yóm kum ketngón, sal gel snalig me yóm kfasang Dwata tmóbóng kum.

^13-14 Nim sulat me ebélê ye ni, mahil bélê ye semfala du, ne là mimahen bélê ye snéen temngón du lanen. Baluen he ke là deng hol tngón ye kum, kóyóu ke angat hol mtukul ketngón ye kum anì hol wen kligal ye bélê me bè yóm kdaw angat kkól yóm gónó tekuy mogot Jisas, hol lómón se yóm kum angat kligal bélê ye bè yóm kdaw yó.

^15-16 Bè kegnómu du, tolo wen kligal ye béléu. Yó gónóhu na gna tô slob bélê ye bè yóm kógówu ebè prubinsya Masdunya, ne bude tô slob bélê ye bè yóm kkólu gu ditu anì lewu duléku tmóbóng kuy. Ne sotuhen, anì yu fen hewót dou bè yóm kógówu ebè prubinsya Judiya.

¹⁷ Okóm là doge mom geslob bélê ye bè yóm kógówu yó. Ilóu se kóem kmon ye du deng mom bud megetles kehedemen. Ofo kuy mon du ke mkéle bè yó kem tau són lolò le kul knóyô. Baluen ke mon le nii tô nmò le, okóm bud tólóng nô lem hendem le.

¹⁸ Ke là gelen sfili yóm kun gel mon Dwata, bud lómón yó se yóm là kesfilihen yóm gel tulónu kuy.

¹⁹ Abay se bè yóm tehe ktolok me lem blóng ye, tlu me Silas ne Timuti, gel tulón me kuy Jisas Krays yóm Ngà Dwata. Yóm Jisas Krays, sok wen monen, sal dnohoen, là bud senfilihen du. Tódô henlelen mò du yóm nóyô Dwata.

²⁰ Kdê yó kem deng tehe fasad Dwata bè kem tau, són bè Jisas gónón hlan du, ne hol tahu dohò kmoen du snéen. Ne yó se gónó Dwata megdóyón bè yóm là kesfili yóm kun mon.

²¹ Dwata se yóm tendo hgel nawa tekuy bè yóm deng kessotu tekuy bè Krays. Bud Dwata se yóm deng eles hetfing tekuy,

²² ne deng blayen tekuy yóm Tulusen mò ilô yóm deng kfunen tekuy, ne mò ilô yóm angat kdohò kguta tekuy du yóm kdê deng eles hentifesen bélê tekuy.

²³ Yó gónóhu là dohò slob bélê ye bè Kurin bè yóm tehe kógówu, abay se là kóyóu du ke wen gónóhu mudél kuy. Tódô ton Dwata se ke kéng nim monu ni koni. Gotu tngónen se yóm nô bè nawahu.

²⁴ Là kô nubug me kuy bè yóm kuy kehtahu. Kaem deng sana tngón me deng mbegel ne kehtahu ye. Okóm yó dé kóyô me ke wen lan me tmóbóng kuy anì hol temnù yóm kligal ye.