1 Samwél 22 - Udél Dwata: Gna Kesfasad ne Lomi Kesfasad

Knô Dabid lem kilib bè Adulam

¹ Bud kewót Dabid bè yó bè Gat mlóy etu bè yóm kilib bè Adulam. Timbow gungol yó kem twoguhen ne yó kem dumu fes lówó maen yóm knóen bè yó gotu le mógów ebéléen.

² Ominen wen se kem dumu bud kemtes, kem tau wen bnukù nawa le ne kem tau wen utóng le ne kem tau là gsengel nawa le bè klowil gotu mógów ebéléen bè yó. Ngangen efet wen dô fat latu kwen le ne Dabid fen malak kul.

³ Kewót Dabid bè yó mógów ebè Mispa yóm benwu snakuf Muab ne yó hnihen bè yóm tau hol geta, monen, “Ke yó dum hyu béléem, móyói kô ke na le hlun nô bè ni yó kem tuhahu efet deng tngónu yóm angat nmò Dwata béléu?”

⁴ Tahu se, móyô yóm tau hol geta yó ne tebel Dabid bè yó bè Muab yó kem tuhahen yóm igoen tolo hebnos bè yóm kilib.

⁵ Sotu kdaw, sut bè Dabid yóm tau tugod Dwata boluyen Gad ne monen mò du, “Béi nô bè nim gónóm hebnos ni, muléki ebè Juda.” Tahu se, lemwót Dabid ne hlós etu bè Dlag Hérét.

⁶ Ne gefet bè Sol yóm deng kkól Dabid bè Juda ne yóm kmung le béléen yó kem tauhen. Bè yóm kdaw yó, tolo myón laan koyu tamaris Sol ta yóm ngà bulul bè Gibya. Wen buyus nogoten ne mdà gu hilolen yó kem genlal bè yó kem sendaluen.

⁷ Bè yóm kungol Sol du yóm tulón yó botong hgelen udélen ebélê le, monen, “Hmungol ye kem sfu Bindyamin. Yóm ngà Jisi yó, deng wen fasaden kuy kô ke benlayen yu uma ne gónó hmulu grép? Deng fasaden kuy kô ke nmoen yu kmandér bè yó kem sendaluen?

⁸ Yó kô gónón wen atul ye sidek e tahu? Laen dù bélê ye tmulón du dou deng wen kesfasad le ngà Jisi yóm dou ngà. Laen dù bélê ye kmodu do. Là tulón ye du do deng nduf yóm hol dou ngà Dabid anì hnékéten o. Lómón ni se yóm deng nmò Dabid kemdaw ni.”

⁹ Okóm yó balà Dóg ke Sol yóm tau Idom mdà bè yó lem blóng yó kem sendalù wen glalen, monen, “Bè yóm knóu bè Nob tonu Dabid stulón ke Ahimélék ngà Ahitub.

¹⁰ Snólók Ahimélék bè Dwata ke tedu nmò Dabid. Ominen bemlay du ken ne bud blayen du yóm sudeng Gulayat yóm tau Flistin.”

Khatay Sol yó kem tau blóng ebè Dwata

¹¹ Duhen yó, tódô kendel tinok Sol Ahimélék yóm tau gel blóng ebè Dwata ngà Ahitub ne kdê yó kem dumun setwoli, hono kem tau blóng ebè Dwata bè Nob. Tahu se, gotu le mógów ebè Sol.

¹² Bè yóm kkól le bè yó, tódô htê Sol, monen, “Ni hnungolem, Ahimélék ngà Ahitub.” Mon Ahimélék se, “El, boluyen de, Sér?”

¹³ Bud mon Sol mò du, “Moen de ke natul ye o lewu ye ngà Jisi? Moen de ke benlayem ken ne sudeng? Moen ke smólóki bè Dwata béléen? Moen ke deng mom gendufem anì hnékéten o lómón yóm tô nmoen kemdaw ni?”

¹⁴ Yó balà Ahimélék du, monen, “Là, Sér. Bè kdê yó kem tóbóng lówóhem yó alì gulit bélê le, duhen yóm towuhem Dabid. Lelen yó he du kmandér bè yó kem sendalù mò mentey kóm. Ne yó kem tau bè gónô bongem tey kadat le du.

¹⁵ Là tek suléku du deng smólók ke Dwata béléen. Hkoduhe béléem, béem dnuón ou dalang se yó kem dumuhu setwoli abay se laen dù tngónu dou bè nim monem ni.”

¹⁶ Ne yó udélen htê yóm tau hol geta yó, monen, “Matayi se kóm, Ahimélék, mung kóm yó kem dumuhem setwoli.”

¹⁷ Ominen yó mdók yó kem sendaluen gel mentey du, monen, “Hnatay ye lu ni kem tau blóng ebè Dwata ni abay se deng nfi le Dabid. Deng tngón le yóm klóy Dabid okóm là kô tulón le du dou.” Okóm yó kem sendalù Sol yó là kô le móyô hmatay yó kem tau blóng ebè Dwata.

¹⁸ Omin yóm tau hol geta mdók ke Dóg, monen, “Yó ne uu hmatay kul.” Tahu se, beklil Dóg ne gotu hnatayen yó kem tau blóng ebè Dwata yó. Bè yóm kdaw yó, botong wolu folò limu tau blóng ebè Dwata hnatayen, igò le tolo lemsek yóm nes kul gel lesek yó kem tau gel blóng ebè Dwata.

¹⁹ Ominen bud mógów ebè Nob, yóm benwu yó kem tau blóng ebè Dwata ne gotu hnatayen yó kem fes lówó le logi ne libun, kkólen bè yó kem ngà le lemnek ne kem ngà le hanà hulô ne yó kem safì le, kem kudà asnu le ne kem ubiha le, gotu hnatayen lu.

²⁰ Okóm wen sotu ngà Ahimélék logi gewà boluyen Abyatar fen mlóy ebè Dabid.

²¹ Ne tulón Abyatar ke Dabid yóm deng gotu kehfatay Sol yó kem tau gel blóng ebè Dwata.

²² Ne yó mon Dabid mò ke Abyatar, “Deng monu se. Deng eles tngónu bè yóm kdaw tehe knóu bè Nob, nô bè yó se ke Dóg kun yóm tau Idom ne deng eles tngónu angat tulónen ke Sol. Ou se lewót gónó le matay yóm kdê fes lówóhem.

²³ Nói bè ni béléu béi abay hlikò, lewu te ne ni nalu hnatay Sol. Okóm laen dù hemenem bè ni.”