1 Samwél 1 - Udél Dwata: Gna Kesfasad ne Lomi Kesfasad

Ilkana ne yó kem fes lówóhen

¹ Wen sotu tau boluyen Ilkana menwu bè Rama yóm benwu nô bè yó kem ngà bulul snakuf Ifraim. Du se ngà Jiruham ne témê Ilihu ne fù Tohu, kun ktol yóm tehe Suf.

² Yóm Ilkana ni, lewu yehenen Hana ne Pinina. Okóm són Pinina yóm wen ngaen, fen là ke Hana.

³ Yóm Ilkana ni, tódô keten halay gel mógów etu bè Silu bè yóm Gónô Dwata, mung du yó kem fes lówóhen nan e tmaba ebè yóm Dwata laen dù là gbeken du ne nan e gel demsù ebéléen. Ne yó fen gel semblóng tau ebè Dwata bè yóm kmoen yó, yó kem lewu ngà Ili logi le Hufni ne Finihas.

⁴ Bè yóm kdaw gel kedsù Ilkana ebè Dwata, sal gel wen umunen ke Pinina, ne senket numunen se yó kem ngaen.

⁵ Okóm ke Hana kun, lemwót bè yóm tey kbong nawahen du tey gulé yóm kun umun balù yóm klaen dù ngà deng blay Dwata du.

⁶ Okóm mom yó nmò Pinina gel mudél hélé ebè Hana mò gónón hemyak du lemwót bè yóm là kehngà Dwata du.

⁷ Tódô ket halayen mò du bè Hana nim ni bè yóm gel kógów le ebè Gónô Dwata. Botong gel mkik Hana ne là kóen móyô mken.

⁸ Yó mon Ilkana mò du, “Na Hana, tedum nkikem ni du? Moen du ke là dogi móyô mken? Moen du ke alì blat nawahem? Ou se yehenem, yake hligali du senta ke wen sfolò ngaem logi.”

Kni Hana bè Dwata anì mngà logi

⁹ Bè yóm sotu kógów le ebè benwu Silu, kogol yóm kdeng kken le kimel yó nmò Hana mógów ebè Gónô Dwata nan e mni ebè Dwata bè yó. Yó nmò Ili yóm tau gel blóng ebè Dwata bè yó, myón bè yóm kun gónó gel myón bè yó klohok yóm bak dól elem yóm Gónô Dwata.

¹⁰ Lemwót bè yóm alì ksidek kegnóm Hana du, ya tey sidek kkiken bè yóm knihen ebè Dwata.

¹¹ Wen fasad mget nmoen bè Dwata, monen, “Ó Dwata yóm Dwata laen dù là gbeken du, hol tenngelem o yóm sotu tóbóng lówóhem. Hol tenngelem yóm gónón sidek kegnómu du. Ke hentulónem o nawa ne ke bnalaem yóm hnihu ne ke hngaem o logi, wen fasadu kóm. Bud blayu kóm yóm ngà yó bè yóm klawihen mowil ne là kô gel kenleng du weken mò ilô yóm deng kehetfing du ebéléem.”

¹² Yóm igò Hana mni bè Dwata, tenngel Ili sumóngen.

¹³ Tonen muteb bede laen dù udél gungolen, ofo kun ke lengel.

¹⁴ Snólók Ili, monen, “Moen du ke hlengeli? Kóhem ne yóm gel kinumem.”

¹⁵ Bnalà Hana se, monen, “Là Sér, là kóe lengel. Laen dù deng ninumu. Okóm wen gónón sidek kegnómu du ne hotuhu nawahu mni du ebè Dwata.

¹⁶ Béem tô hendem ke libune mò sidek. Abay se yóm nmou ni mnihe bè Dwata, tulónu du yóm tey alì ksidek kegnómu du yóm gónón blat nawahu.”

¹⁷ Ne yó mon Ili mò du, “Yó ne, lemwóti. Dwata he hol henek nawam. Yó hem Dwata yó kem tau Israél malà du yóm deng hnihem.”

¹⁸ Bnalà Hana se, monen, “Slamat, Sér.” Ominen mulék ne mken, ne là buden sidek kegnómen du.

Ksut Samwél ne kehetfing le du bè Dwata

¹⁹ Timbow hlafus hayahen bè yó, gotu le temkifu btik na le e bud tmaba ebè Dwata, omin le mulék ebè yóm kul gónô bè Rama. Timbow sentungô Ilkana Hana, hentulón nawa Dwata yóm deng hni Hana

²⁰ ne là legenen bè yó mlutut Hana ne mngà logi. Yó boluyen du Samwél, monen, “Yó gónóhu moluy du Samwél nim ngà ni abay se deng hnihu bè Dwata.”

²¹ Halay hulin bè yó, bud kól yóm kdaw le bud mógów ebè Silu na le e kedsù ebè Dwata, bud le lemwót le Ilkana ne Pinina ne yó kem ngà le, bud le mógów etu. Ne ni se keblay Ilkana du ke Dwata yóm tehe fasaden du.

²² Là dogen mung kun ke Hana. Yó monen mò ke tuha logihen, “Nahu nangat keskóhen tmutù he nim ngà ni, ominu mit du etu bè Gónô Dwata anì tebelu ditu ne tódô hlós nô bè yó bè yóm klawihen mowil.”

²³ Mon Ilkana mò du, “Nmoem sen yóm tngónem hyu mò du. Tódói henek bè ni. Dwata he tmóbóng kóm hemdohò du yóm deng fasadem du.” Tahu se, tebel bè yó Hana sen-gyoken ngaen.

²⁴ Timbow skó tmutù yóm ngà, omin Hana mit du ebè Gónô Dwata bè Silu, homong nwit le yóm ngà safì hanà tlu halayen mò dsù le ne sotu bluyut arina ne wen tifas grépen.

²⁵ Tikóng deng kedsù le yóm ngà safì, omin le mit yóm ngà ebè Ili.

²⁶ Yó mon Hana mò du, “Ó Sér, gtulón nawam o kô? Ou se yóm libun tehe tonem mdà bè ni mni bè Dwata bè yóm gnan kdaw.

²⁷ Tehe hnihu bè Dwata nim ngà ni ne tahu se blayen do.

²⁸ Duhen ni, hetfingu ebè Dwata nim ngà ni ne bè yóm klawihen mowil ke Dwata funen.” Omin le yó tmaba ebè Dwata bè yó.