Jeremiah 21 - Tedim Bible

Jerusalem Kisiat Nading Kigenkhol

¹ Zedekiah kumpipa in Malkhiah’ tapa Pashhur leh Ma-aseiah’ tapa Zefaniah-te Jeremiah kiangah a sawl-a,

² “Kote adingin Topa’ kiangah thu hong dot sak in. Babilon kumpipa Nebukhadnezzar in hong sim hi. Topa in a nalamdangte khat kei tungah hong sem leh amah a kilehkik sak kha thei ding hi,” ci-in a dong sak hi.

³ Tua ciangin Jeremiah in dawng kik a, “Zedekiah kiangah hih bangin na gen kik un.

⁴ ‘Topa, Israel mite’ Pasian in a gen-inah, En un, khua kulhpi pua lam-a a hong umcih Babilon kumpipa leh Khaldea mite na dona uh ahi, na khut sung-ua na kep na galhiamte uh bangmah a, kimang lo ka suaksak ding a, amaute khempeuh hih khuapi laizangah kong paipih ding hi.

⁵ Keimahmah in hehna leh thangpaihna lianpi tawh ka ban zan-in, a hat mahmah ka khut tawh note kong do ding hi.

⁶ Hih khuapi sunga teengte a mi a sa ci loin ka thatlum ding a, pulnatna tawh a gam khin ding uh hi.

⁷ Tua khit ciangin, Topa in kong cih-inah, Judah kumpipa Zedekiah leh a nasemte leh, pulnatna, namsau leh kial-a si lo a nungta lai teng pen, amaute a that nuam Babilon kumpipa Nebukhadnezzar leh a galte uh’ khut sungah ka pia ding hi. Amah in amaute namsau tawh a that ding a, hehpih loin, zong a siit kei ding a, itna lungsim a nei kei ding hi,’ va ci un,” a ci hi.

⁸ Topa in Jeremiah hopih a, “Jeremiah aw, hih mite kiangah, ‘Topa in a cih-inah, En un, na mai uhah nuntakna lampi leh sihna lampi ka khung hi.

⁹ Hih khuapi sunga a om mi peuhmah namsau tawh ahi zongin, kial tawh a hi zongin, pulnatna tawh a hi zongin a si ding uh hi. Ahih hangin pusuak khia-a, note a hong do Khalde mite kianga a lut peuhmah a nungta ding uh a, a suakta liailiai ding uh hi.

¹⁰ Bang hang hiam cih leh Topa in kong cih-inah, hih khuapi’ hoih nading hi lo siat nadingin ka lungsim ka khensat khin zo hi. Babilon kumpipa’ khut sungah ka pia ding a, amah in mei tawh a hal ding hi,’ na ci ding hi.

Judah Kumipte’ Tung-a Thu Piang Dingte Genkholhna

¹¹ “Judah kumpite innkuan tungah hih bangin va gen in: ‘Topa’ kammal ngai dih un,

¹² David’ suante aw! Topa in a cih-inah: Zingsang simin man takin thu khen un la, mi bawlsiapa’ khut sung pan a bawlsiatpa hon khia un. Tua bang na hih kei uh leh na siatna bawlnate hangun ka hehna mei bangin a kuang ding a, kuamah in a phelh zo kei ding hi.

¹³ “Mualkuam zang pan kilam to a, zanglei laka suangtum banga sang to Jerusalem aw, Topa in kong cih-inah, nang’ lang khatah ka pang hi. Nangmah in, ‘Kua in kei hong simsuk ding a, i omna-ah kua hong lut ding hiam?’ na ci hi.

¹⁴ Na nasepna gahte tawh kituakin nang kong daantat ding hi, Topa in kong ci hi. Tuulak-a sing hoihte tawh a kilam na kumpi innte uh mei tawh kihal ding a, a kimkot khempeuh ka kangtum sak ding hi,” a ci hi.