Насигьятар 5 - Гирами Китаб

¹ Жан бай, хъебехъ йиз аькьюллу гафарихъ, йиз фикрарин гъавриъ ахъ –

² аьяндарвалихьди ацӀбан бадали, аьгъювалар яв мелзну уьрхбан бадали.

³ Жарарин хпирин мелз йиччвси ширинуб ву, ва, ччимси, гъюдлидар ву дугъан гафар, –

⁴ илтӀикӀиди думу кьутӀкьлишназ кьутӀкьли кьаларин – кьюбиб тереф учӀру мурзназ ханжлин.

⁵ Дугъан ликар ис шула аьжалихьна, гамар илтӀикӀна гъийихдарин дюнʼяйихьна.

⁶ Рякъкан уьмрин дугъу апӀидар фикир, чан жилгъйир кьянидар вуйиб чаз аьгъдар.

⁷ Гьаддиз хъебехъай узухъ, жан бицӀидар, ва тина мапӀанай йиз гафар.

⁸ Ярхлади гъуз дугъхьан, дугъан раккниз багахь махьан,

⁹ дарш харж апӀидива жарадарихъ кьувват жвуван, инсафсузарихъ – жвуван уьмрин йисар;

¹⁰ яв кьувватнахьди ацӀди жарадар, гъягъиди яв жафйир хулаз жарарин.

¹¹ Гъагъиди ил хътабгъури хьидива аьхириъ яв уьмрин, гъеебцциган ва гъучубхиган яв беден:

¹² «Гьаз ибак гъапӀундайкӀан насигьятар узу, тягьнийирра тина апӀуйи йиз юкӀву,

¹³ гьаз узу мялимарихъ хъпехъундайкӀан, ва тербия туврудариз фикир тувундайкӀан?

¹⁴ Сабсан гам узу алдабгъиш – узу беябур апӀиди, адмийирин улихь, вари халкь хьади».

¹⁵ Убхъ жвуван латʼан, адабцӀ жвуван гъуйдиан.

¹⁶ Гьаз гъюрзди кючйиригъ яв штар, гьаз рузиди яв штар вари раццар вуйибси?

¹⁷ Гъит жвуваз сариз дурар, жарадарихъди мапӀан пай.

¹⁸ Гъит яв булагъ ужувлакк ккабхъри, жигьилгандин яв хпир увуз шадвализ ишри.

¹⁹ Йиз ккуни жейран, йиз гюзел масан – дугъан мухри харгнайир гьарсаб вахтна ккядярхъриву, дугъан ккунивали уву пиян духьнайирси апӀри.

²⁰ Гьаз вуяв, йиз бай, жарарин хпири пиян дапӀну, гьаз вуяв жилир хъайирин юруш хабаъ тӀапӀну?

²¹ Фицики ачмишди ву РАББИЙИЗ вари жилгъйир инсанарин, Дугъу ерцура вари рякъяр инсандин.

²² Гьякьсузур чан писвалин чулиъ ахъди, чав апӀури гъаши гунгьаригъ гъярсди.

²³ Насигьят кьабул дарапӀувалиан думу йикӀиди, ахмакьвали жилгъайиан идитиди.